Эх сурвалж: ikon.mn, 2022.05.03
Нийслэлийн төв талбайд өнөөдөр хиймэл зүлэг дэвслээ.
Ногоон байгууламж ховортой Улаанбаатар хотод энэ нь онцгой үйл явдал байв. Зүлгэн дээр залуус гутлаа тайлж амрах, гар бөмбөг тоглох, ном унших гэх мэтээр цагийг өнгөрүүлж байна.
Дээрх талбайд "Нийтийн хөл бөмбөг" төслийн хүрээнд Улаанбаатар хотын хөл бөмбөгийн аварга шалгаруулах “UB cup” тэмцээнд зориулан зассан аж. Нээлтийн өдөрлөг тавдугаар сарын 8-18-ны өдрүүдэд Сүхбаатарын талбайд болох юм байна.
Эх сурвалж: ikon.mn, 2022.05.01
Монголын хуульчдын холбооноос хуулийн байгууллагуудтай хамтран зохион байгуулдаг хуульчийн про боно өдөрлөг энэ жил "Хүүхдийг гэмт хэргээс сэргийлэх нь Та бидний үүрэг" сэдвийн дор Д.Сүхбаатарын талбайд өнөөдөр 10:00 цагт эхэллээ.
Тус өдөрлөгт Шүүхийн ерөнхий зөвлөл, Шүүхийн тусгай архив, Нийслэл дэх захиргааны хэргийн анхан шатны шүүх, Сүхбаатар Чингэлтэй дүүргийн Иргэний хэргийн анхан шатны шүүх, Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх оролцож, иргэдэд шүүхийн үйлчилгээтэй холбоотой зөвлөгөө мэдээлэл өгч ажиллаж байна.
Энэ үеэр Шүүхийн тусгай архив иргэдэд архивын лавлагаа, тодорхойлолт үнэ төлбөргүй гаргаж өгч байгаа юм.
Тус өдөрлөг өнөөдөр 17:00 цаг хүртэл үргэлжилнэ гэж Шүүхийн ерөнхий зөвлөлөөс мэдээллээ.
Эх сурвалж: Болормаа Хөххүү. 2022.03.18
Нийслэлийн Засаг даргын 2022 оны 03 дугаар сарын 14-ний өдрийн “Газрын зөрчил арилгах” тухай захирамжаар төвийн зургаан дүүргийн хэмжээнд сургууль, цэцэрлэгийн орчим болон орц, гарц хаасан, авто замын үзэгдэх орчин хязгаармагдмал байршил бүхий зөвшөөрөлгүй барьсан тоосгон гараашуудыг буулгаж, газар чөлөөлөлтийн ажлыг эхлүүлээд байгаа. Уг захирамжаар Сүхбаатар дүүргийн хэмжээнд 24 байршилд 551 гарааш буулгах шийдвэр гарсан. Энэ дагуу өнөөдөр нийслэлийн ИТХ-ын төлөөлөгч, дүүргийн Засаг дарга Х.Болормаа холбогдох хэлтсийн дарга нарын хамт 3, 7, 8, 10 дугаар хороонд ажиллалаа. Энэ үеэр гарааш эзэмшигчидтэй уулзаж, газар чөлөөлөх явц, чөлөөлсөн талбайд ямар тохижилт, бүтээн байгуулалт хийх талаарх тэдний саналыг сонсов. Цаашид тухайн талбайн газар чөлөөлөлтийг эхлэхээс өмнө дүүргийн ЗДТГ-аас Ажлын хэсэг байгуулан иргэдтэй уулзалт хийж, санал, хүсэлтийг нь хүлээн авна. Үүний дараа иргэдийн саналд үндэслэн чөлөөлсөн газарт ногоон байгууламж, авто зогсоол, хүүхдийн тоглоомын талбай бүхий тохижилт, бүтээн байгуулалтын ажлыг хийхээр төлөвлөж байгаа гэдгийг Засаг дарга хэлсэн юм.
Эх сурвалж: ikon.mn. 2022.03.17
Төрийн үйлчилгээний ангилал зэрэглэлийн ажилчдыг хувийн хэвшил рүү шилжүүлэхийг Төрийн үйлчилгээний албан хаагчид эсэргүүцэн Д.Сүхбаатарын талбайд өнөөдөр тайван жагсаал зохион байгууллаа.
ТҮ-1-3 зэрэглэлээр цалинждаг ажилтнуудын ажлын байрны баталгаа, нийгмийн хамгааллын асуудал хүндэрч байгаа талаар өчигдөр Монголын Боловсрол, шинжлэх ухааны ҮЭ-ийн холбооноос мэдээлэл хийх үеэр МҮЭ-ийн холбооны ЕНБД Х.Буянжаргал "Орон нутагт цалингаа бүтэн авч чадаагүй, ажлын байрны баталгаандаа санаа зовниж байгаа тухай санал гомдол ирүүлэх болсон талаар мэдээлэл өгөөд, өнөөдөр МБШУҮЭХ, Сургуулийн өмнөх ҮЭ-ийн хороо, МҮЭ-ийн холбооноос хамтарсан тайван жагсаал хийх болсон" гэдгийг хэлсэн.
Ийнхүү тэд өнөөдөр тайван жагсаал зохион байгуулав.
УИХ-ын 2020 оны 12 дугаар сарын 24-ний хуралдаанаар Монгол улсын Засаг, захиргаа, нутаг дэвсгэрийн нэгж, түүний удирдлагын тухай хуулийн 20.1.18 дугаар заалтад орон нутгийн өмчийн боловсрол, эрүүл мэнд, нийгэм, соёлын байгууллагуудын тухай хууль энэ оны 1 дүгээр сарын 1-нээс хэрэгжиж эхэлсэнтэй холбогдож дээрх ажилтнуудын цалин хөлс хугацаандаа олгогдохгүй, сэтгэл санааны хүнд нөхцөлд орсон гэдгийг зохион байгуулагчдын зүгээс онцлов.
Жагсаалд оролцогчдын төлөөлөл "Төрийн үйлчилгээний ажилчдыг боловсролын салбартаа авч үлдэхийн тулд өнөөдөр тайван жагсаалд оролцож байна. Тогооч нар байхгүй бол хүүхдүүд маань хоол цайгүй болно. Жижүүр байхгүй бол мөн л хэцүү" гэв.
"Төрийн үйлчилгээний ажилчид 470-570 мянган төгрөгийн үндсэн цалин авч ажилладаг бөгөөд 50-аас дээш насныхан ихэнх хувийг нь эзэлдэг. Улаанбаатар хотод гэхэд 266 цэцэрлэгийн 3,399 ажилчин үүнд хамрагдахаар байгаа юм. Ингэж шилжихээр ажлын байрны баталгаа алдагдах, нийгмийн хамгаалал алдагдаж амьдрал нь дордоно. 30 гаруй жил улсад ажиллачхаад өнөөдөр хашаагүй, орон гэргүй олон хүн ажиллаж байгаа. Тэтгэвэрт гарахад хэдхэн жил дутуу хүнийг хаана ажилд авах вэ" хэмээн Сургуулийн өмнөх боловсролын ҮЭ-ийн нэгдсэн хорооны дарга Д.Саранцэцэг хэлж байсан удаатай.
