Л.Энх-Амгалан: Ирэх есдүгээр сарын 1-нээс нэг ангид суух хүүхдийн тоог 45-аас хэтрүүлэхгүй байхыг зорино

Эх сурвалж: Б.Бадамгарав, www.ikon.mn, 2023.05.01

Нийслэлийн Иргэдийн Төлөөлөгчдийн Хурал(НИТХ)-ын ээлжит чуулган өнөөдөр болж байна. 

Энэ үеэр нийслэлийн боловсролын хүртээмж чанарыг сайжруулах бодлогын шийдлүүдийн талаар Боловсрол, Шинжлэх Ухааны сайд Л.Энх-Амгалан мэдээлэл хийж байгаа юм. 

Тэрбээр хүртээмжийг нэмэгдүүлэх 15 шийдлийг мэдээлэв. Тухайлбал, 

Газар зүйн мэдээллийн системд суурилсан төлөвлөлт хийх

Ерөнхий боловсролын сургуулиудыг төрөлжүүлэх, цогцолбор хэлбэрээр хөгжүүлэх

Шинээр баригдах хотхон, хорооллын зураг төсөлд цэцэрлэг сургуулийн барилга төлөвлөх, барих шаардлага тавих, түүнд хяналт тавих

Аж ахуйн нэгж, байгууллага дэргэдээ цэцэрлэг байгуулах санаачилгыг дэмжих, цэцэрлэг, сургуулийн зориулалттай барилга барихад хөнгөлөлттэй зээл олгох, урамшуулах

Хорооны Засаг даргын Ажлын алба, тухайн дүүргийн Гэр Бүл, Хүүхэд, Залуучуудын Хөгжлийн Газар(ГБХЗГ)-ыг зориулалттай барилга байгууламжуудыг бага сургуулийн зориулалтаар түр ашиглах

Нийслэлийн төлөөлөгчид тойргийнхоо нэгээс доошгүй цэцэрлэг, сургуулийн менежментийг сайжруулахад төсөв санхүүгийн болон бодлогын дэмжлэг үзүүлэх гэх зэрэг байна. 

Мөн сайд Л.Энх-Амгалан "Сургуулийг бага, дунд, ахлах гэж төрөлжүүлэх бодлого барина. Ахлах сургуульд багшлах багш нарыг магистрын зэрэгтэй байхыг шаардана. Бага ангид нэг багш бүх хичээлийг орж байгаа нь буруу. 

Улсын хэмжээнд 2,000 орчим багш дутагдалтай байгаа. Түүнээс биш бүгдээрээ Солонгос явсан мэт буруу ойлголт байж болохгүй. Цаашид багшийн ажлын үнэлэмжийг дээшлүүлэх, нийгэмд нэр хүндийг нэмэгдүүлэхэд хамтарч ажиллах шаардлагатай" хэмээв.

Түүнчлэн "Улаанбаатар хотын түгжрэлд нөлөөлөх гол хүчин зүйл нь боловсрол мөн. Өглөө, оройн түгжрэлийн 30-40 хувь нь хүүхдээ сургууль, цэцэрлэгт хүргэхээс өгөхөөс хамаарч байгаа гэсэн тооцоолол бий. Цаашид гэрт ойр сургууль бол хамгийн сайн сургууль байх тогтолцоог нэвтрүүлбэл түгжрэл эергээр нөлөөлнө.

Цэцэрлэг, сургуулийн хэв шинжийг эргэж харах хэрэгцээ үүссэн. Стандартын хувьд мөн уян хатан байх шаардлагатай. 

Бүлэг зохион байгуулалтыг сургуулийнх нь онцлогтой уялдуулж, ирэх есдүгээр сарын 1-нээс нэг ангид суух хүүхдийн тоог 45-аас хэтрүүлэхгүй байх зохицуулалтыг хийнэ гэж зорьж байна. Тэгэж байж боловсролын чанар, хүртээмжийн асуудалд ахиц гаргана" хэмээн мэдэгдлээ.

Улсын хэмжээнд 500 гаруй киоск машин ажиллах эхлэх бэлтгэлийг хангажээ

Эх сурвалж: Б.Чимэг, gogo.mn, 2023.03.10

Орон нутгийн иргэн төрийн үйлчилгээ авахын тулд хот ордог шаардлагагүй болгох нь төрийн үйлчилгээний нэг цэгүүдийн зорилго.

Төр, хувийн хэвшлийн түншлэлээр улсын хэмжээнд 500 гаруй киоск машин ажиллах эхлэх бэлтгэл ажлыг хангажээ. Систем хөгжүүлж, төрийн үйлчилгээг нэвтрүүлэхэд бэлэн болсноор Ерөнхий сайдад болон аймаг орон нутгийн удирдлагууд, иргэдэд өнөөдөр танилцуулсан байна.

Цахим шилжилтийн ажил 2019 оноос эрчимтэй өрнөж, нийслэл, 21 аймаг, 330 суманд төрийн 815 үйлчилгээг операторын горимоор үзүүлэхээр “Төрийн цахим үйлчилгээний зохицуулалтын газар” ажиллаж байна.

Нэг цэг нэртэй ч нэгэн дээвэр доорх олон цэгийн үйлчилгээ үзүүлж, иргэдэд хүндрэл учруулдаг байдлыг халж, аль ч цэгт очсон цаас бичиг нэхэлгүй иргэний зөвшөөрлөөр төрийн үйлчилгээг үзүүлнэ гэж Цахим хөгжил, харилцаа холбооны яамнаас мэдээлэв.

Нийслэлийн 59 сургуулийн хичээл эхлэх цагийг өөрчиллөө

Эх сурвалж: news.mn, 2022.02.18

Хотын төв, түгжрэл ихтэй орчинд буюу Их тойруу болон Яармагт байрлалтай 59 сургуулийн хичээл эхлэх цагт өөрчлөлт оруулахыг дэмжих эсэх талаарх санал асуулгыг www.ulaanbaatar.mn сайтад өрнүүллээ. Үүний үр дүнд нийслэлийн хэмжээнд 59 сургуулийн хичээл эхлэх цагийг өөрчиллөө.

Энэ онд шинээр 22 сургууль цэцэрлэгийн хөрөнгө оруулалтыг баталжээ

  Эх сурвалж: gogo.mn, 2022.02.07

Нийслэлийн удирдах ажилтнуудын шуурхай зөвлөгөөн өнөөдөр боллоо.  Шуурхай зөвлөгөөнийг  Нийслэлийн Засаг даргын цахим хөгжил, хууль, эрх зүй, төрийн үйлчилгээний асуудал хариуцсан орлогч Р.Дагва удирдан зохион байгуулав. Өнгөрсөн шуурхай зөвлөгөөнөөр Нийслэлийн Засаг даргаас өгсөн үүрэг, даалгавар 87.5 хувьтай биелжээ.

Сар шинийн баярыг нийслэл Улаанбаатар хотын хэмжээнд харьцангуй тайван амгалан тэмдэглэн өнгөрүүлснийг мэргэжлийн байгууллагууд онцолж байлаа. Эрүүл мэндийн салбарт элдэв хүндрэл учраагүй бөгөөд “Ковид-19” цар тахлын халдварын тохиолдол нэгдүгээр сарын эхэн үеэс эрс багассан дүн гарчээ. Нийт шинжилгээний 89-90 хувь нь эерэг гарч байсан бол одоо 37-50 хувь болон буурсан байна. Хэвтэн эмчлүүлэх шаардлагатай иргэдийн хувьд орны хүлээлт нэгдүгээр сарын 27-ны өдрөөс байхгүй болсон гэдгийг Нийслэлийн Эрүүл мэндийн газрын дарга Б.Бямбадорж онцоллоо.

Дархлаажуулалт үргэлжилсээр байна. Өнөөдрийн байдлаар:

III тунд нийслэлийн нийт хүн амын 33.4 хувь, зорилтот бүлгийн 52.5 хувь

IV тунд зорилтот бүлгийн 5.1 хувь нь хамрагдаад байна.

Нийслэлчүүдийн сар шинийн өдрүүдийг ая тухтай тэмдэглэх нөхцөлийг бүрдүүлэх үүднээс  цагдаагийн 13.293 алба хаагч, олон нийтийн 656 цагдаа үүрэг гүйцэтгэж,  29.729 хүн, 25.749 автомашин, 9433 аж ахуйн нэгж, байгууллагыг шалгасан байна.  Нийслэлийн хэмжээнд өнгөрсөн 14 хоногийн хугацаанд объектын гал түймрийн 73, аврах ажиллагааны зургаан  удаагийн дуудлагын дагуу онцгой байдлын алба хаагчид үүрэг гүйцэтгэжээ.   Дээрх хугацаанд гал түймрийн утаажилтын бүсээс 285 иргэнийг гаргаж, гал түймрийн аюулаас 14.5 тэрбум төгрөгийн өмч хөрөнгийг хамгаалж ажилласан байна.

2022 он гарснаас хойш нийслэлийн хэмжээнд объектын гал түймрийн 306, аврах ажиллагааны 21,  нийт 327 удаагийн дуудлагатай байсан нь өнгөрсөн оны мөн үетэй харьцуулахад 18.4 хувиар өссөн үзүүлэлт аж.   

Нийт тээврийн хэрэгслийн 68-77 хувь нь хөдөлгөөнд оролцжээ            

Сар шинийн өдрүүдэд хөдөлгөөний нөхцөл байдал ямар байсныг Тээврийн цагдаагийн албаны Замын цагдаагийн газрын дарга С.Жавхлантбаатар танилцууллаа.

“Баярын өдрүүдэд нийт 808 албан хаагч гудамж, замд үүрэг гүйцэтгэсэн. Шинийн 1-ний өдөр нийт тээврийн хэрэгслийн 77 хувь буюу 318 мянган тээврийн хэрэгсэл, шинийн 2-ны өдөр 279 мянган тээврийн хэрэгсэл буюу 68 хувь нь  хөдөлгөөнд оролцлоо. Нийслэлээс гарч буй болон нийслэлд орж ирсэн иргэдийн тоо ердийн үеэс эрс нэмэгдэж, 41 мянган тээврийн хэрэгсэл, 96 мянган иргэн гадагш чиглэсэн хөдөлгөөн хийсэн. Энэ хугацаанд зам тээврийн 186 осол бүртгэгдэж, 13 хүн гэмтсэн байна. Сар шинийн баярыг угтаж, зах, худалдааны төв болон төвлөрсөн 60 цэгт 80 албан хаагчийг нэмэлтээр ажиллуулсан” хэмээн мэдээллээ.

Амгалан дулааны станцад гарсан ослоос өөр ноцтой осол гэмтэл гараагүй. Нийслэлийн хэмжээнд зургаан  байршилд халиа дошин үүссэн бөгөөд Чингэлтэй дүүргийн 11 дүгээр  хороо, Дэнжийн мянгад үүссэн халиа дошноос болж  авто зам руу ус орж, тус хэсэгт бодис давс асгаж, сувгийг сэргээж, усыг урсгажээ.

Газар чөлөөлөх ажлыг эрчимжүүлнэ

Нийслэлийн хэмжээнд улс, нийслэлийн хөрөнгө оруулалтаар хийж  буй бүтээн байгуулалтын ажлыг эрчимжүүлэх, газар чөлөөлөхөд цаг алдахгүй байхыг Нийслэлийн Засаг дарга үүрэг болгосон. 2022 оны хувьд газар зохион байгуулалтын төлөвлөгөөнд нөхөн олговортойгоор газар чөлөөлөх 249 байршлыг НИТХ-аар батлаад буй юм. Үүнээс он дамжин хэрэгжиж буй 69 ажил байгаа бол барилга байгууламжийн нөлөөлөлд өртсөн 115, дэд бүтцийн нөлөөлөлд өртсөн зургаа,  инженерийн шугам сүлжээний нөлөөлөлд өртсөн 26, авто замын ажлын нөлөөлөлд өртсөн 33 газар байгаа юм байна. 2022 онд шинээр хэрэгжих ажлуудаас 22 авто зам, 22 сургууль цэцэрлэгийн хөрөнгө оруулалт батлагджээ.

Улс, нийслэлийн төсөв, орон нутгийн хөгжлийн сангийн хөрөнгөөр хийх ажлуудыг эрчимжүүлэхийг үүрэг болгов

Шуурхай зөвлөгөөний төгсгөлд ирэх 14 хоногт хийж хэрэгжүүлэх ажлын үүрэг чиглэлийг өглөө. Үүнд:

-Нийслэлийн Засаг даргын “2022 оныг  “Иргэн төвтэй жил” болгон зарлах тухай захирамжийн хэрэгжилтийг хангаж, холбогдох байгууллагуудаас санал авч, нэгдсэн төлөвлөгөөг боловсруулж ажиллах.

-Нийслэлийн нутгийн захиргааны байгууллагууд хариуцсан ажлын чиглэлээр нийслэлийн иргэдэд боловсрол мэдлэг олгох, соёлыг төлөвшүүлэх, орлого нэмэгдүүлэх, амьдрах орчныг сайжруулах, эрүүл мэндийг анхаарах, аюулгүй байдлыг хангахад чиглэсэн бодит үр дүнд хүрэхүйц ажлыг санаачлан зохион байгуулж, хэрэгжүүлж ажиллах.

-2022 онд Төсвийн ерөнхийлөн захирагч, төсвийн шууд захирагчтай “Хариуцлагын гэрээ” байгуулах бэлтгэлийг сайтар хангах.

-2022 онд улс, нийслэлийн төсөв, орон нутгийн хөгжлийн сангийн хөрөнгөөр хийх ажлуудыг эрчимжүүлэх.

-Нийслэлийн Засаг даргын эрх шилжүүлсэн захирамж гарснаас ажлын  гурав хоногт үнэлгээний хороог байгуулж, худалдан авах ажиллагааг эхлүүлэхэд шаардлагатай материалыг судалж, захиалагч байгууллагатай хамтран ажиллах.

-Нийслэлийн Засаг даргын эрх шилжүүлсэн захирамж гарснаас ажлын  гурав хоногт үнэлгээний хороог байгуулж, худалдан авах ажиллагааг эхлүүлэхэд шаардлагатай материалыг судалж, захиалагч байгууллагатай хамтран ажиллах.

-Нутгийн захиргааны байгууллагууд дотооддоо халдвараас урьдчилан сэргийлж, ариутгал, халдваргүйжүүлэлтийн ажлыг тогтмол хийж,  дархлаажуулалтыг эрчимжүүлэх.

-Иргэдээс нийслэлийн нутгийн захиргааны байгууллага, албан тушаалтанд гаргасан өргөдөл, гомдлыг бүх талаас нь нягтлан судалж, хууль зүйн үндэслэлтэйгээр эцэслэн шийдвэрлэж, иргэнд хуулийн хугацаанд хариу өгөх.

-“Архив, албан хэрэг хөтлөлтийн тухай хууль”, “Албан хэрэг хөтлөлтийн

-“Архив, албан хэрэг хөтлөлтийн тухай хууль”, “Албан хэрэг хөтлөлтийн нийтлэг журам”, “Байгууллагын архивын үйл ажиллагааны нийтлэг журам” нь шинэчлэгдэн батлагдсантай холбогдуулан архив, албан хэрэг хөтлөлтийн чиглэлээр удирдлага арга зүйгээр хангаж, сургалт зохион байгуулах.

-Иргэд, олон нийтийн амгалан тайван байдал, нийгмийн хэв журам, гэмт хэрэг зөрчил болон гамшиг ослоос урьдчилан сэргийлэх, сэрэмжлүүлэх, аюулгүй байдлыг хангах, хяналт тавих ажлыг эрчимжүүлэн ажиллахыг үүрэг болголоо.

Гандан

Эх сурвалж Mongol TV, 2022.01.23

    

С.Тодгэрэл: Их, дээд сургууль, коллежийн 100 эмэгтэй суралцагчид ногдох эрэгтэй 64 байна

Эх сурвалж: ikon.mn, 2022.01.17

Улсын хэмжээнд 2021-2022 оны хичээлийн жилийн эхний байдлаар 1,453 цэцэрлэг, 848 ерөнхий боловсролын сургууль (ЕБС), 76 техникийн болон мэргэжлийн боловсролын сургалтын байгууллага, 88 их, дээд сургууль, коллеж үйл ажиллагаа явуулж байгааг Үндэсний статистикийн хорооноос мэдээллээ. 

2021-2022 оны хичээлийн жилд:

ЕБС-д 712.4 мянга (65.1%) 

Техникийн болон мэргэжлийн боловсрол, сургалтын байгууллагад 42.6 мянга (3.9%) 

Их, дээд сургууль, коллежид 149 мянган (13.6%) хүүхэд, залуус суралцаж байна. 

Хүснэгт. Бүх шатны боловсролын сургалтын байгууллага, сургалтын байгууллагын төрлөөр, хичээлийн жилийн эхний байдлаар

Сургалтын байгууллагын төрөл	Хичээлийн жилээр
	2018/2019	2019/2020	2020/2021	2021/2022
Цэцэрлэг	1,435	1,439	1,454	1,453
Төрийн	889	910	948	972
Хувийн	546	529	506	481
Ерөнхий боловсролын сургууль	803	820	839	848
Төрийн	656	662	672	682
Хувийн	147	158	167	166
Техникийн болон мэргэжлийн боловсрол, сургалтын байгууллага	86	80	75	76
Төрийн	51	50	46	43
Хувийн	35	30	29	33
Их, дээд сургууль, коллеж	94	95	88	88
Төрийн	18	21	20	20
Хувийн	76	74	68	68

ҮСХ-ны Нийгмийн статистикийн хэлтсийн дарга С.Тодгэрэл “Энэ хичээлийн жилд СӨБ-д хамрагдсан хүүхдийн тоо 191 мянга болж өмнөх хичээлийн жилээс 56 мянгаар буурсан нь КОВИД-19 цар тахлын улмаас 4-5 настай хүүхдийг үндсэн сургалтад хамруулж, гурван настай хүүхдийн хөгжлийг гэр бүлд түшиглэсэн зайны хэлбэрээр дэмжин ажиллаж  байгаатай холбоотой.

Энэ хичээлийн жилд ЕБС-ийн нэгдүгээр ангид 75.5 мянган сурагч шинээр элссэний 88.5 хувь нь СӨБ-д хамрагдсан. Цэцэрлэгийн бүлэг дүүргэлт энэ хичээлийн жилд 24 болж өмнөх хичээлийн жилээс 5-аар буурахад КОВИД-19 цар тахлын улмаас бүлэг дүүргэлтийг 20-25 байхаар зааж, 3 настай хүүхдийг цэцэрлэгт хамруулаагүйтэй холбоотой.   

2021-2022 оны хичээлийн жилийн эхэнд ЕБС-ийн бага ангийн бүлэг дүүргэлт нийслэлийн Сонгинохайрхан, Чингэлтэй, Багануур, Баянгол, Налайх дүүрэгт 36-38 байгаа нь стандартад анги дүүргэлтийг бага ангид 30-35 хүүхэдтэй байхаар тогтоосноос давсан үзүүлэлттэй гарсан” гэв.

График. Анги дүүргэлт, дүүргээр

Хүснэгт. Бүх шатны боловсролын сургалтын байгууллагад суралцагчид, хичээлийн жилийн эхний байдлаар

Сургалтын байгууллагын төрөл	Хичээлийн жилээр
	2018/2019	2019/2020	2020/2021	2021/2022
Сургуулийн өмнөх боловсролд	261	263.3	247	191
Эрэгтэй	133	134.4	126	97.6
Эмэгтэй	128	128.9	121	93.4
Ерөнхий боловсролын сургуульд	593	640.4	680.8	712.4
Эрэгтэй	298	320.5	341.1	357.2
Эмэгтэй	296	319.9	339.7	355.2
Техникийн болон мэргэжлийн боловсрол, сургалтын байгууллагад	37	37.8	40.2	42.6
Эрэгтэй	22.4	22.3	24.2	25.5
Эмэгтэй	14.6	15.5	16	17.1
Их, дээд сургууль, коллежид	158	148.4	147.3	149
Эрэгтэй	64	57.8	57.8	58
Эмэгтэй	93.6	90.6	89.5	91

Болвсролын сургалтын байгууллагад суралцагсдын хүйсийн харьцааг харахад СӨБ болон ЕБС-ийн хувьд 1-1.04-тэй харьцангуй ойролцоо түвшинд гарчээ. 

Харин техникийн болон мэргэжлийн сургалтын байгууллагад суралцагчдын хүйсийн харьцаа 1.49 буюу 100 эмэгтэй суралцагсдад ногдох эрэгтэй нь 149 байсан байна.

Энэхүү үзүүлэлт их, дээд сургууль, коллежийн хувьд эсрэгээрээ буюу 100 эмэгтэй суралцагсдад ногдох эрэгтэй 64 байгааг С.Тодгэрэл нэмж онцоллоо. 

Баянзүрх дүүргийн 17 дугаар хороо загвар цэцэрлэгтэй боллоо

 Эх сурвалж: ikon.mn, 2022.01.11

Нийслэлийн 171 хорооноос 18 нь хорооныхоо нутаг дэвсгэрт цэцэрлэггүй гэсэн судалгаа бий. 

Эдгээр хороонд цэцэрлэг байгуулж, сургуулийн өмнөх боловсролын хүртээмжийг үе шаттайгаар сайжруулахыг БШУЯ зорьж буй. Энэ хүрээнд тус яам болон НҮБ-ын Хүүхдийн сан, Баянзүрх дүүргийн ЗДТГ хамтран 17 дугаар хороонд 100 хүүхдийн хүчин чадалтай цэцэрлэгийг барьж ашиглалтад орууллаа.

Энэхүү цэцэрлэг нь бага насны хүүхдийн цогц хөгжлийг дэмжсэн загвар цэцэрлэг бөгөөд цэцэрлэгийн барилга нь дотоод орчны агаарын чанар, аюулгүй байдлыг хангасан хүүхдэд ээлтэй орчныг бүрдүүлж байгаа онцлогтой. Мөн цэцэрлэгийн халаалтыг цахилгаанаар шийджээ.

НҮБ-ын Хүүхдийн Сангаас БШУЯ-тай хамтран 2018 оноос Баянзүрх дүүргийн 17 дугаар хорооны Бага насны хүүхдийн хөгжлийн стратегийг боловсруулж туршиж 2019 онд дүүргийн хэмжээний стратеги болгон өргөжүүлсэн. Үүний үр дүнд бага насны хүүхдийн хөгжилд эрүүл мэнд, хоол тэжээл, боловсрол, асаргаа халамж, хамгааллын ач холбогдлын тухай эцэг эхчүүдийн ойлголт нэмэгдсэн юм.

Ташрамд дурдахад, Баянзүрх дүүрэгт 2-5 насны 35.6 мянган хүүхэд амьдарч байна. Одоогоор тус дүүрэгт төрийн өмчийн 45, төрийн бус өмчийн 145 цэцэрлэг үйл ажиллагаа явуулж байгаа бөгөөд цэцэрлэгийн насны нийт хүүхдийн 79 хувь нь хамрагдаж байна.

ШИНЭ СПОРТ ЦОГЦОЛБОРЫН МӨСӨН ТАЛБАЙ АШИГЛАЛТАД ОРНО

Эх сурвалж: dnn.mn, 2022.01.03

Чингэлтэй дүүргийн 10 дугаар хорооны нутаг дэвсгэр, Дэнжийн мянгын 39 дүгээр сургуулийн хойд талд 1000 хүний суудалтай спорт цогцолборын мөсөн талбайн ажил эхэлжээ. Мөсөн талбайг ОХУ-аас мэргэжилтнүүд хүрэлцэн ирж, ЧД-ийн БТСГ-ын мэргэжилтнүүдтэй хамтран мөс тавих ажлыг гүйцэтгэж байна. Энэхүү байгууламж нь улсын төсвийн хөрөнгө оруулалтаар баригдсан, А, Б блоктой. Спорт заал, усан бассейн, оффис, мөсөн талбай гэсэн үндсэн хэсгүүдтэй. Өнгөрсөн зун оффисын хэсэг болон спорт заал, гурван зам бүхий 25 метрийн усан бассейн ашиглалтад орсон юм.

ХОТЫН ТҮГЖРЭЛД НӨЛӨӨ ҮЗҮҮЛДЭГ ГЭХ НИЙТ 63 ЕРӨНХИЙ БОЛОВСРОЛЫН СУРГУУЛИЙН УДИРДЛАГУУДТАЙ УУЛЗАЛТ ХИЙЛЭЭ

Эх сурвалж: dnn.mn, 2022.01.03

Улаанбаатар хотын түгжрэлийг бууруулах зорилгоор тодорхой байршлын сургуулиудын хичээл эхлэх болон тарах цагийг өөрчлөх эсэх асуудлыг хэлэлцэж эхэлжээ.

Тодруулбал, Монгол Улсын Засгийн газрын 2021 оны арванхоёрдугаар сарын 8-ны өдрийн хуралдаанаар Их тойруугийн гудамжинд байршилтай ерөнхий боловсролын сургуулийн хичээл эхлэх, дуусах цагийн зохицуулалтыг эцэг, эх, асран хамгаалагч, харгалзан дэмжигчийн ажлын цагтай нягт уялдуулан уян хатан байхаар зохицуулах асуудлыг судалж, турших арга хэмжээ авахыг нийслэлийн Засаг дарга бөгөөд Улаанбаатар хотын захирагч Д.Сумьяабазарт даалгасан байна.

Энэ дагуу нийслэлийн Боловсролын газраас Захиргааны ерөнхий хуулийн 26 дугаар зүйлийн 26.1 дэх хэсэгт “Захиргааны акт, захиргааны гэрээг батлан гаргахын өмнө эрх, хууль ёсны ашиг сонирхол нь хөндөгдөж болзошгүй этгээдэд захиргааны шийдвэр гарахад ач холбогдол бүхий нөхцөл байдлын талаар тайлбар, санал гаргах боломж олгоно” гэж заасныг үндэслэн нийслэлийн ерөнхий боловсролын зарим сургуулийн хичээл эхлэх, дуусах цагт өөрчлөлт оруулах асуудлаар судалгааны дүнг танилцуулах, санал солилцох уулзалтыг зохион байгууллаа.

Уулзалтад Улаанбаатар хотын Их тойруугийн гудамжинд байршилтай түгжрэлд нөлөө бүхий төрийн өмчийн 27, төрийн бус өмчийн 36, нийт 63 ерөнхий боловсролын сургуулийн удирдлагууд оролцов.

Төрийн болон төрийн бус өмчийн ерөнхий боловсролын зарим сургуулийн хичээл эхлэх, дуусах хугацаа, төрийн болон төсөвт байгууллага, аж ахуйн нэгжийн ажлын цагт өөрчлөлт оруулах, багш нарыг нийтийн тээврээр хөнгөлөлттэй үйлчлүүлэх зэрэг асуудлаар санал боловсруулж, холбогдох газарт уламжлахаар бэлтгэл ханган ажиллаж байна гэж нийслэлийн Боловсролын газраас мэдээллээ.

"Зорилтот бүлгийн 6,094 өрхөд зургаан долоо хоногийн турш нийт 36 шуудай түлш олгон

Эх сурвалж: ikon.mn, 2022.01.03; toim.mn

Байгаль орчин, аялал жуулчлалын яамны удирдлагууд, Улаанбаатар хотын Захирагчийн ажлын алба, нийслэлийн Мэргэжлийн хяналтын байгууллага, “Таван Толгой Түлш” ХХК-аас агаар, орчны бохирдлын талаар ээлжит мэдээллээ хийлээ. 

"Арванхоёрдугаар сарын 31-ний байдлаар 22,100 тонн шахмал түлш нөөцтэй байна"

Нийслэлийн Агаарын бохирдолтой тэмцэх газрын дарга Б.Пүрэвсүрэн "Баяр амралтын өдрүүдээр сайжруулсан шахмал түлш борлуулах нийт 608 цэг ажилласан. Хоногийн дундаж борлуулалт 4,000 орчим тонн байлаа. Түгээлт, борлуулалт дээр ямар нэгэн асуудал үүсээгүй бөгөөд арванхоёрдугаар сарын 31-ний байдлаар 22,100 тонн шахмал түлш нөөцтэй байсан. Энэ нөөцөөрөө сар шинийн баярыг өнгөрүүлэх төлөвлөлттэй байгаа. 

Өнгөрсөн 7 хоногийн Даваа гарагт нийслэлийн Засаг даргаас өгсөн чиглэлийн дагуу зорилтот бүлгийн өрхүүдэд шахмал түлш олгох үүрэг хүлээж авсан. Энэ хүрээнд нийслэлийн Нийгмийн халамжийн газраас 6,094 өрхийн мэдээллийг гаргаж өгснийг үндэслэн шахмал түлш олгох гэж байна. Тухайн өрхүүдийн шахмал түлшний картыг цэнэглэж өгөх бөгөөд иргэд өөрсдөө очиж түлшээ авах зохицуулж хийж байгаа. 

Цагдаагийн 102 дугаар иргэдийн мэдээлэл маш их ирж байна. Хэдийгээр үнэн биш дуудлагууд ирсэн ч гэсэн мэдээлж байгаа нь зөв юм. Иргэд хөршдөө, хажуу айлдаа анхаарал хандуулж, хар утаа гарч байгаа талаар мэдээлж байгаа нь чухал. 

Нийслэлийн айл өрхүүдийг стандартын шаардлага хангасан зуухаар хангах асуудлыг үе шаттайгаар зохион байгуулах эрх зүй, эдийн засгийн бааз суурь бий болгох тал дээр ахиц гаргахыг хичээнэ. Нэг удаа төрөөс үнэгүй олгосон, дахин тийм боломж байхгүй. Тиймээс ногоон зээл, өөр санхүүгийн боломжуудыг судална" гэдгийг хэллээ. 

Өнгөрсөн долоо хоногт хийсэн хяналт шалгалтын үеэр түүхий нүүрс түлж байсан нэг зөрчил, Улаанбаатар хотоос сайжруулсан шахмал түлш гаргах гэж байсан хоёр удаагийн үйлдлийг илрүүлжээ. 

Зорилтот бүлгийн 6,098 өрхөд хүндрэл чирэгдэлгүй байх үүднээс долоо хоног бүр зургаан шуудай нүүрсийг зургаан долоо хоногийн турш олгох юм байна. 

БАЯНГОЛ ДҮҮРГИЙН 20 ДУГААР ХОРООНД 640 ХҮҮХДИЙН СУУДАЛТАЙ СУРГУУЛЬ БАРИГДАЖ ДУУСЛАА

 Эх сурвалж: Нийслэлийн хөрөнгө оруулалтын газар, 2021.09.03

Баянгол дүүргийн 20 дугаар хороонд байрлах 320 хүүхдийн хүчин чадалтай 19 дүгээр дунд сургуулийн барилгын насжилтын хугацаа дууссан бөгөөд уг сургуулийн барилгыг нураан, Нийслэлийн Хөрөнгө оруулалтын газраас захиалагчийн техникийн хяналт хийж, шинээр орчин үеийн стандартад нийцүүлэн 640 хүүхдийн хүчин чадалтай сургуулийн барилга барьж, ашиглалтад оруулахад бэлэн боллоо.

Барилга угсралт гүйцэтгэгч байгууллага: Гэрэлтжин ХХК

Зохиогчийн хяналтыг Би И Эс Ай Жи Эн ХХК

26 сургууль, цэцэрлэг ашиглалтад орлоо

 Эх сурвалж: НЗДТГ, 2021.09.02

Улаанбаатар хотод 2021 онд улс, нийслэл, дүүргийн төсөв, гадаадын зээл, тусламжийн хөрөнгөөр хэрэгжих боловсролын байгууллагын нийт 152 төсөл, арга хэмжээ бий. Үүнээс 112 сургууль, цэцэрлэгийн барилга нь он дамжин хэрэгжиж байгаа юм. Нийслэлийн Боловсролын газраас гаргасан мэдээллээр энэ онд 57 цэцэрлэг, 32 сургууль, бага сургууль, цэцэрлэгийн есөн цогцолбор, хоёр спорт заал, нэг насан туршийн боловсролын төв, нэг дотуур байр, нийт 102 барилга ашиглалтад орох урьдчилсан төлөвлөгөөтэй байна. 2021 он гарснаас хойш Улаанбаатар хотод нийт найман сургууль, бага сургууль, цэцэрлэгийн хоёр цогцолбор, 16 цэцэрлэг, нэг дотуур байрны барилга ашиглалтад орлоо. Ингэснээр нийслэлийн хэмжээнд цэцэрлэгийн хүчин чадал 2700 ороор, сургуулийн хүчин чадал 5900 суудлаар нэмэгдээд байгаа юм.    

Монгол Улсын 2021 оны төсөвт дөрвөн сургууль, арван цэцэрлэг, бага сургууль, цэцэрлэгийн нэг цогцолбор, нэг спорт заал, нийт 16 барилга, байгууламж шинээр барих хөрөнгө баталсан. Харин Хан-Уул дүүрэг 2021 оны орон нутгийн төсөвтөө гурван цэцэрлэг шинээр барих хөрөнгө баталжээ. 2021-2022 оны хичээлийн жилд БШУ-ы сайдын тушаалын дагуу гурван ээлжээр хичээллэж болзошгүй байсан найман сургуулийн ойр орчмынх нь сургалтын зориулалтаар ашиглаж болох 10 байрыг түрээслэх замаар 107 бүлгийн 4511 хүүхдийг, 13 байрыг түрээслэх замаар 11 цэцэрлэгийн 49 бүлгийн 1165 хүүхдийг хамруулаад байна.   

Ташрамд дурдахад, энэ хичээлийн жилд нийслэлд төрийн болон төрийн бус өмчийн ерөнхий боловсролын 280 сургуульд 331.560 сурагч хамрагдаж байна. Үүнээс нэгдүгээр ангид 38.842 сурагч элсэн суралцаж байгаа юм. Харин албан бус насан туршийн боловсролын найман төвд 910 гаруй сурагч суралцаж буй.

СХД, 22 ДУГААР ХОРОО, ЦЭЦЭРЛЭГИЙН БАРИЛГЫН АЖИЛ

 Эх сурвалж: Нийслэлийн хөрөнгө оруулалтын газар, 2021.08.31

Нийслэлийн Хөрөнгө оруулалтын газраас захиалагчийн техник хяналт хийсэн Сонгино Хайрхан дүүргийн 22 дугаар хороонд түлхүүр гардуулах гэрээний нөхцөлтэй 150 хүүхдийн багтаамжтай цэцэрлэгийн барилгын ажил дуусч, ашиглалтад оруулахаар ажиллаж байна. 

Гүйцэтгэгч байгууллага: Түмэн алт ХХК

100 айл, Цагаан байруудыг дахин төлөвлөлтөд хамруулахыг хүслээ

 Эх сурвалж: Т.Гэрэл, www.pressnews.mn, 2021.08.30

Эх сурвалж: Г.Мөрөн, www.ikon.mn, 2021.08.30

Нийслэлийн Засаг даргын шуурхай зөвлөгөөний үеэр Сүхбаатар дүүргийн Засаг дарга Х.Болормаа дүүргийнхээ талаар танилцуулав.

Сүхбаатар дүүрэг 20.8 мянган га газар нутагтай, 145 мянга гаруй хүн ам, 39 мянган өрх бүхий 20 хороотой нийслэлийн ууган дүүргийн нэг. Тус дүүрэг нь нийслэлд анх удаа хөдөлгөөнт оффис, хог хаягдлын ухаалаг систем нэвтрүүлсэн төдийгүй гэрэлтүүлэг, түүнийг дагалдсан камержуулалтаараа тэргүүлдэг.

Дүүргийн 9-12 дугаар хорооны нутаг дэвсгэр дахин төлөвлөлтөд хамаардаг. Дээрх хороодод өнөөдрийн байдлаар 7,817 өрхийн 30,476 иргэн амьдарч буй юм.

2030 он гэхэд энэ тоо 25.9 мянган өрхийн 91 мянга хүн болон өсөх судалгаа гарсныг дүүргийн Засаг дарга онцолж байв.

Түүнчлэн тус дүүргийн нутаг дахь 100 айл, Цагаан байруудыг дахин төлөвлөлтөд яаралтай хамруулах шаардлагатай байгаа аж. Ингэхдээ зөвхөн орон сууц барих бус, сургууль, цэцэрлэг барьж, нийгмийн дэд бүтцийг хамтад нь бий болгохыг хүслээ. Тус дүүргийн хувьд хамгийн тулгамдсан асуудал нь шар ус, борооны үер буудаг газруудад суурьшсан айл өрхүүд гэнэ.

Дүүргийн зүгээс зөвшөөрөлгүй буусан айлуудыг нүүх шаардлага тавьдаг ч иргэд 11-25 жилийн турш суурьшсан, үл хөдлөх хөрөнгө барьж байгуулсан учир албадан нүүлгэхэд хүндрэл учирдаг.

Сүхбаатар дүүргийн 15-20 дугаар хорооны нутаг, усан сан бүхий газрын онцгой хамгаалалтын бүс, Сэлбэ голын ай сав дагуу газар эзэмшиж, ашиглаж,  өмчилсөн 847 иргэн, аж ахуйн нэгж байдаг. Тиймээс энэ асуудлыг шийдэхийн тулд үерийн далан сувгийг цогц байдлаар байгуулах, инженерийн шугам сүлжээ бий болгоход анхаарахыг мөн хүслээ.

БАЯНГОЛ ДҮҮРГИЙН 21 ДҮГЭЭР ХОРОО, 240 ХҮҮХДИЙН ОРТОЙ ЦЭЦЭРЛЭГ

 Эх сурвалж: Нийслэлийн хөрөнгө оруулалтын газар, 2021.08.24

Сургууль, цэцэрлэгийн тоог нэмэгдүүлэх ажлын хүрээнд Баянгол дүүргийн 21 дүгээр хороонд 240 хүүхдийн ортой цэцэрлэг барьж байна. Төрийн болон хувийн өмчийн цэцэрлэггүй байсан, цэцэрлэгийн асуудал тулгамдсан тус хороонд сургуулийн өмнөх насны 874 хүүхэд оршин суудаг бөгөөд үүнээс 692 хүүхэд өөр, дүүрэг хорооны цэцэрлэгт хамрагдаж сурдаг бол 182 хүүхэд цэцэрлэгт огт хамрагдаж чаддаггүй байна. 

 Улсын төсвийн хөрөнгө оруулалтаар хэрэгжиж буй 278 дугаар цэцэрлэгийн барилгын ажлын гүйцэтгэгч компаниар Монгол дээвэр ХХК болон Цац орхон ХХК-ийн түншлэл ажиллаж энэ оны хичээлийн шинэ жилээр ашиглалтад орохоор төлөвлөн 95 хувийн гүйцэтгэлтэй ажиллаж байна. Ийнхүү шинэ цэцэрлэг ашиглалтад орсоноор хамран сургах тойргийн цэцэрлэгийн хүрэлцээ нэмэгдэж, хүүхдүүд таатай орчинд суралцах давуу тал бүрдэх юм.

Чингэлтэй дүүрэгт 150 хүүхдийн ортой цэцэрлэг нэгээр нэмэгдэхэд бэлэн боллоо

 Эх сурвалж: НХОГ, 2021.08.10

Чингэлтэй дүүргийн 16-р хороонд цэцэрлэгийн насны 1188 хүүхэд оршин суудаг. Тус хороо нь төрийн өмчийн хоёр, төрийн бус өмчийн гурван цэцэрлэгтэй бөгөөд 653 хүүхэд харьяа хорооны цэцэрлэгт хамрагддаг бол 229 хүүхэд өөр дүүрэг, хороонд хамрагдан сурч, 306 хүүхэд цэцэрлэгт огт хамрагдаж чаддаггүй гэсэн судалгаа бий.

Тэгвэл сургууль, цэцэрлэгийн тоог нэмэгдүүлэх ажлын хүрээнд 150 хүүхдийн ортой цэцэрлэгийг Чингэлтэй дүүргийн 16-р хороонд барьж байна.

Шинэ цэцэрлэгийг улсын төсвийн хөрөнгө оруулалтаар “Саран инж девелопмент” ХХК 2019 онд барьж эхэлсэн бөгөөд энэ оны хичээлийн шинэ жилээр ашиглалтад орохоор төлөвлөж байна.