"Ulaanbaatar cup" 3Х3 сагсан бөмбөгийн тэмцээний Чингэлтэй дүүргийн шилдгүүд тодорчээ

Эх сурвалж: Т.Саран, www.ikon.mn, 2023.04.29

"Ulaanbaatar cup" 3Х3 сагсан бөмбөгийн тэмцээний Чингэлтэй дүүргийн шилдгүүд тодорсон байна.

Энэхүү тэмцээнийг нийслэлийн Засаг даргын тамгын газар болон Монголын 3x3 сагсан бөмбөгийн холбоо хамтран зохион байгуулж байгаа юм.

Чингэлтэй дүүргийн аваргаар "Dugaraa team" тодорсон бол хоёрдугаар байрт "Black Mamba" баг шалгарч финалд оролцох эрх, мөнгөн шагналыг хүртлээ.

"Ulaanbaatar cup" сагсан бөмбөгийн тэмцээний аваргаар шалгарсан баг долдугаар сард болох FIBA 3x3 их дуулгад оролцох эрх авна. Энэхүү тэмцээн Сүхбаатар дүүргийн аварга шалгаруулах тэмцээнээр цааш үргэлжилж байгааг Монголын 3х3 сагсан бөмбөгийн холбооноос мэдээллээ.

"Playtime" хөгжмийн наадмын эхний арга хэмжээ Сүхбаатарын талбайд өнөөдөр 13:00 цагаас эхэлнэ

Эх сурвалж: П.Зоригт, www.ikon.mn, 2023.04.30

"Playtime" хөгжмийн наадмын энэ жилийн эхний арга хэмжээ Сүхбаатарын талбайд өнөөдөр 13:00-20:00 цагийн хооронд зохион байгуулагдана. 

Энэхүү "Pre-event"-д дараах хамтлагууд уран бүтээлээ толилуулахаар болжээ. 

A dawn is

Kade x Grey

The shy poopers

Eccession

Vagaband

Deaf cats

Teresa in the moon 

Нийслэлийн Аялал жуулчлалын газар, "Амьд хөгжмийн наадам" ТББ-тай хамтран “Playtime” хөгжмийн наадмыг энэ оны долдугаар сарын 6,7,8-ны өдрүүдэд Монгол шилтгээн цогцолборт 21 дэх жилдээ зохион байгуулахаар болсон билээ. 

Энэ жилийн хувьд "Playtime хөгжмийн наадамд АНУ, БНСУ, БНХАУ, Испани, Их Британи, Герман, ОХУ зэрэг улс орны 20 уран бүтээлч хүрэлцэн ирнэ.

Мөн Монголын 170 гаруй уран бүтээлч оролцох юм хэмээн нийслэлийн Аялал жуулчлалын газраас мэдээлэв.

Эх сурвалж. tseg.mn

"Бага, дунд орлоготой иргэдэд зориулсан хямд өртөгтэй орон сууцны төсөл хэрэгжүүлнэ"

Эх сурвалж: П.Зоригт, www.ikon.mn, 2023.04.30

Нийслэлийн орон сууцны корпорац ХК-ийн гүйцэтгэх захирал М.Говьсайхан, БНСУ-ын Кёнги Хот байгуулалт, орон сууцны корпорацийн гүйцэтгэх захирал Ким Суншиг нар Нүүрстөрөгчийн хийн ялгарлыг бууруулах, ухаалаг хотыг байгуулах хамтын ажиллагааны Санамж бичиг байгуулав.

Санамж бичиг зурах үйл ажиллагаанд Монголын талаас Нийслэлийн орон сууцны бодлогын газрын дарга Г.Ганхүү болон БНСУ-ын талаас Кёнги Хот байгуулалт, орон сууцны корпорацын удирдлагууд оролцлоо.

Хамтын ажиллагааны хүрээнд гэр хорооллын дахин төлөвлөлт, орон сууцны томоохон бүтээн байгуулалт болон бага, дунд орлоготой иргэдэд зориулсан хямд өртөгтэй орон сууцны төсөл хамтран хэрэгжүүлэх аж.

Түүнчлэн орон сууцны түрээсийн олон талт үйл ажиллагаа, удирдлагын тогтолцоог хөгжүүлэхэд дэмжлэг үзүүлэх, харилцан туршлага солилцох, хамтарсан форум зохион байгуулах, хөрөнгө оруулалтыг дэмжин ажиллах гэх мэт олон зорилтыг тусгажээ.

Агаарын бохирдол, уур амьсгалын өөрчлөлт дэлхий нийтийн тулгамдсан асуудал болсон энэ үед иргэдийн эрүүл, аюулгүй орчинд амьдрах нөхцөлийг бүрдүүлсэн ухаалаг хотыг байгуулахад хамтран ажиллах нь тус хамтын ажиллагааны гол ач холбогдол оршиж буй аж.

 

Эх сурвалж: Нийслэлийн орон сууцны корпорац

“BARILGA EXPO 2023” үзэсгэлэнгийн “Барилгын материал, техник технологи” хэсэг нээлтээ хийлээ

Эх сурвалж: www.ikon.mn, 2023.04.28

Барилгын салбарын шилдэг аж ахуй нэгжүүдийн бүтээгдэхүүн, барилгын материал, дэвшилтэт техник, технологи, хаус болон шинэ орон сууцны шилдэг төслүүдийг танилцуулдаг “BARILGA EXPO 2023” үзэсгэлэн, яармаг 16 дахь жилдээ та бүхнийхээ өмнө өндөр үүдээ нээлээ.

“BARILGA EXPO 2023” олон улсын үзэсгэлэн, яармагийн “Барилгын материал, техник технологи” хэсгийн үзэсгэлэн өнөөдөр нээлтээ хийж, 4 дүгээр сарын 30-ны өдрийг хүртэл үргэлжилнэ.

Нээлтийн арга хэмжээнд БХБЯ, БХТ, салбарын холбоодын төлөөллүүд болон үзэсгэлэн, яармагийн ерөнхий ивээн тэтгэгч, ивээн тэтгэгч компаниудын удирдлагууд оролцлоо.

Тус хэсэгт барилгын материал үйлдвэрлэгч болон ханган нийлүүлэгч 100 гаруй ААНБайгууллагууд барилгын салбарт хамгийн сүүлийн үед нэвтрүүлсэн шинэ техник, технологио танилцуулах болно.

Барилгын салбарын сүүлийн үеийн дэвшилтэт техник технологитой танилцан, урамшуулалтай худалдан авалт хийж, мэргэжилтнүүдийн үнэ төлбөргүй илтгэлийг “Барилгын материал, техник технологи” үзэсгэлэн, яармагаас авах боломжтой.

Харин олон улсын оролцогчид болон шинэ орон сууцны үзэсгэлэн дараах өдрүүдэд Мишээл экспод зохион байгуулагдана.

5-р сарын 05-07-нд “International fair”,

5-р сарын 12-14-нд “Шинэ орон сууц, Үл хөдлөх хөрөнгө”

Иймд, Та бүхнийг өргөнөөр хүрэлцэн ирж, барилгын салбарын хөгжил, дэвшилтэй танилцахыг урьж байна.

Ерөнхий зохион байгуулагч: БАРИЛГА МН

Хамтран зохион байгуулагч:

БАРИЛГА, ХОТ БАЙГУУЛАЛТЫН ЯАМ

БАРИЛГЫН ХӨГЖЛИЙН ТӨВ

ИТАЛИ УЛСЫН ЭЛЧИН САЙДЫН ЯАМ

Ерөнхий ивээн тэтгэгч:

“ACTIVE GARDEN RESIDENCE”

“ХОВД ЭКО ЦЕМЕНТ” ХХК

Ивээн тэтгэгч:

“GREEN GARDEN RESIDENCE”

“МОНЦЕМЕНТ БИЛДИНГ МАТЕРИАЛС” ХХК

“МОНКОН КОНСТРАКШН” ХХК

www.barilgaexpo.mn

Өнгөрсөн амьдралаа эргээд харахад сэтгэл ханамжтай байна гэж ахмадуудын 93 хувь нь өөдрөг үнэлгээ өгсөн ч...

Эх сурвалж: П.Сайнжаргал, www.ikon.mn, 2023.04.28

"Ахмад настны нийгэм, улс төрийн оролцоо" сэдэвт судалгааны үр дүнгийн тайланг тоймлон хүргэж байна. 

Энэхүү судалгааг нийслэлийн зургаан дүүрэг болон Дорнод, Дундговь, Төв, Орхон аймгийн 500 ахмад настан, 500 залуусын дунд явуулжээ. Ингэхдээ 

Залуус ахмадуудын тухай 

Ахмадууд өөрсдийнхөө тухай 

Ажил олгогчид ахмадуудын тухай хэмээн гурван бүлэгт хувааж судалсан байна. 

Дээрх судалгаанд "Ахмадууд өөрсдийнхөө тухай" хэрхэн дүгнэсэн талаарх үр дүнг танилцуулъя. 

"Ахмадууд тэтгэврийнхээ ихэнх хэсгийг үр хүүхдийнхээ хэрэгцээнд зарцуулж байна"

Судалгаанд хамрагдсан ахмадууд (500 иргэн) тэтгэврийн хэмжээ, нийгмийн амьдрал дахь оролцоо, биеийн эрүүл мэнд гуравт сэтгэл ханамж тааруухан байна гэж хариулсан. Харин өнгөрсөн амьдрал, гэр бүлийн байдал, амьдарч буй орчин нөхцөлдөө өөдрөг үнэлгээ өгчээ.

Тус судалгааны тайланд "Өнөөдөр ахмадуудын дийлэнх хэсэг нь тэтгэврийн зээлтэй байна. Манай судалгаанд хамрагдсан ахмадуудын 60.6 хувь нь тэтгэврийн зээлтэй байсан. Тэдний тэтгэврийн зээлийн ихэнх хэсэг нь хүүхдүүддээ машин авч өгөх, ач зээ нарынхаа сургалтын төлбөрийг төлөх, хэн нэгний буяны үйлсэд зарцуулагдаж байна. 

Гэтэл зээл нь дээрх бүх зарлагыг барагдуулж чаддаггүй бөгөөд ямар нэгэн байдлаар үлдэгдэл төлбөр байсаар. Улмаар ахмадууд маань бүх төлбөрийг гүйцэд төлж чадаагүйдээ үргэлж сэтгэл дундуур явдаг ажээ.

Тэгвэл ахмадууд яагаад тэтгэврийн хэмжээндээ сэтгэл дундуур байна вэ?

Энэ нь дараах хоёр шалтгаантай. 

Олон жил ажилласан ахмадууд өөрсдийн хөдөлмөр, бүтээмжийг хангалттай хэмжээнд үнэлүүлж чадсангүй гэдэг ойлголт.

Өөрийн тэтгэврээр үр хүүхдэдээ хангалттай тусалж чадахгүй байна гэх зэрэг шалтгаанаар ахмадууд сэтгэл ханамжгүй байна" хэмээн дурдсан байна. 

"Судалгаанд хамрагдсан ахмадуудын 85 хувь нь хооллолт тааруу болсон тухайгаа ярьжээ"

Тэд хооллолтдоо сэтгэл ханамжгүй буюу 85.3 хувь нь хооллолт тааруу болсон хэмээх үзжээ. Түүнчлэн ахмад хүмүүс өөрийн үнэ цэнийг мэдэх, өөрөөрөө бахархах нь хамгийн муу үзүүлэлттэй байгааг дараах график харуулж байгаа юм. 

Ажил хөдөлмөр эрхэлж байх үедээ хүн өөрийн хооллолтдоо ямар нэгэн байдлаар анхаардаг. Харин тэтгэвэрт гарсны дараа энэ байдал өөрчлөгддөг гэдгийг судалгааны тайланд дурдсан байна. 

Ахмад настны яриа: 

Орхон аймгийн иргэн, ахмад багш Ш.Г "Ганцаараа амьдарч байгаа хүн хоол хийж идэхээ больчихдог юм байна. Уг нь ч би тэтгэвэр гайгүй өндөр тогтоолгосон. Түүнээсээ ч жаахныг хадгаламжид хийдэг. Өнжөөд л нэг хоол хийх юм. Тэгээд ч тэрийгээ барахгүй муудуулчихна. Харин хүүхдүүд ирэх сургаар гайгүй хоол хийхийг хичээнэ. 

Би долоо хоногийн хуваарь гаргаад зарим өдөр нь теннис тоглоно. Заримдаа биллиард цохино. Сургууль дээрээ очиж хичээлээ заахаар л хамаг юм сайхан болчихдог юм" гэжээ.

 

Эх сурвалж: Ахмад настны нийгэм, улс төрийн оролцоо судалгааны тайлан (2022 он)

20 жилийн хугацаанд Монгол Улсын хүн амын 19.9 хувь нь газраа өмчлөн авчээ

Эх сурвалж: Г.Мөрөн, www.ikon.mn, 2023.04.28

Газрын харилцааны тулгамдсан асуудлыг оновчтой тодорхойлон, шийдвэрлэх боломжийг эрэлхийлэх, газар өмчлөлийн 20 жилийн туршлагыг хэлэлцэх, цаашдын чиг хандлагыг тодорхойлох, өндөр түвшний судалгааны арга зүйн шинэ технологи, программыг нэвтрүүлэх зорилготой “Газрын харилцааны тулгамдсан асуудал ба газар өмчлөл 20” онол, практикийн бага хурал өчигдөр боллоо.

Энэ үеэр Газар зохион байгуулалт, геодези, зураг зүйн газрын дарга Ж.Батсайхан "Монгол Улсын иргэнд газар өмчлүүлэх тухай хуулийг баталсны 20 жилийн ой тохиож байна. Энэ хугацаанд Монголын хүн амын 19.9 хувь нь газраа өмчилж авсан" хэмээн танилцуулав.

Харин нийслэлд газар өмчлөлийн явц 12.7 хувь байна. Тухайлбал, гэр хорооллын 7,238.4 га газрыг 132,238 иргэн өмчилсөн байгаа бол зуслангийн бүсэд 3,515 иргэн 209.6 га газар өмчилжээ. 

Дүүргээр нь авч үзвэл Сонгинохайрхан дүүрэгт 73,661 иргэн 3,978 га газар өмчилсөн нь бусад дүүргээс тэргүүлэх үзүүлэлт болж байна.

Эх сурвалж: НЗДТГ-ын хэвлэл мэдээлэл олон нийттэй харилцах хэлтэс

Үйл явдал

Эх сурвалж: www.ikon.mn, 2023.04.28

ЭТТ байранд 

08:30 цагт “Эрдэнэс Тавантолгой” ХК-ийн ТУЗ-ийн хурал болно.

Улаанбаатар чуулга

08:30 цагт Хөгжлийн Банктай холбогдох шүүх хурал үргэлжилж байна. 

Төрийн ордонд 

УИХ-ын чуулганы хуралдаан болно.

МҮХАҮТ-д 

09:00 – 11:30 цагт Экспортлогч ЖДҮ ба Оюуны өмч хэлэлцүүлэг болно.

ШУА-д

09:30 цагт Дэлхийн оюуны өмчийн өдрийг тохиолдуулан “Бүтээлч хандлага, инновацыг эрчимжүүлцгээе”  сургалт хэлэлцүүлэг болно. Энэ үеэр оюуны өмчийн шинжээч, итгэмжлэгдсэн төлөөлөгч, оюуны өмчийн үнэлгээчид болон мэргэшсэн сургагч багш нараас зөвлөгөө авах боломжтой. 

Төрийн ордонд

10:00 цагт Монгол Улсын Ерөнхийлөгчийн санаачилгаар хэрэгжүүлж буй “Эрүүл монгол хүн” үндэсний хөдөлгөөний үйл ажиллагааны чуулган болно.

11:00 цагт Шүүр ажиллагааны талаар ЗГХЭГ-ын дэд дарга буюу Засгийн газрын Хяналт хэрэгжүүлэх газрын дарга Б.Баасандорж мэдээлэл өгнө.

Үндэсний мэдээллийн төвд

11:00 цагт  “Нийгмийн амьдралд боловсролын байгууллагуудын оролцоо” сэдвээр Монголын ахмад багш нарын холбооноос мэдээлэл хийнэ.

Соёлын өвийн Үндэсний төвд

11:00-15:00 цагт  Соёл, урлагийн газар, ШУА-ийн Хэл зохиолын хүрээлэн хамтран “Соёлын биет бус өвийн эх хэл, аман уламжлал ба түүний илэрхийллийн ай: нөхцөл байдал, туршлага, гарц шийдвэл” хэлэлцүүлэг зохион байгуулна.

“Мишээл Экспо”-д

12:00 цагт “BARILGA EXPO 2023” олон улсын үзэсгэлэн, яармагийн “Барилгын материал, техник технологи” хэсгийн үзэсгэлэн нээгдэнэ.

Хангарди ордны 14 давхарт

13:30 цагт гарааш буулгалт, чөлөөлсөн талбайд хийх тохижилтын талаар Улаанбаатар хотын Ерөнхий менежер М.Баяраа мэдээлэл өгнө.

Богдхан уулын Арцатын аманд илүү талбайд газар ашиглаж, бохирдуулсан ААН-үүдэд шаардлага хүргүүлжээ

Эх сурвалж: А.Мишээл, www.gogo.mn, 2023.04.28

Тусгай хамгаалалттай газарт гэрээгээр хүлээсэн үүргээ биелүүлээгүй газар ашиглагчдад хугацаатай албан мэдэгдлийг Богдхан уулын дархан цаазат газраас өгсөн байна. Газар ашиглагчдын үйл ажиллагаанд БОАЖЯ, Хамгаалалтын захиргаанаас хяналт шалгалтын ажил тогтмол хийж байна. Тус ажлын хүрээнд дөрөвдүгээр сарын 26-27-ны өдрүүдэд:

Богдхан уулын Арцатын аманд ашиглалтын талбайгаа хогоор дүүргэж, орчныг бохирдуулж байгаа "Н ..." ХХК-ийн газар дээр ажиллаж сонсох ажиллагааны хугацаатай мэдэгдэл өгчээ.

Богдхан уулын Арцатын аманд ашиглалтын талбайгаас хэтрүүлэн хашаа барьж, нийтийн эзэмшлийн гудамж, зам талбайг хааж барилгын үйл ажиллагаа явуулж буй "Марал аялал"ХХК, "Соргог байгаль" ХХК, "Үжин ресурс" ХХК тус тус аж ахуй нэгжүүдэд илүү талбайд газар ашиглаж буй зөрчлөө арилгаж нийтийн эзэмшлийн зам талбайг чөлөөлөх албан мэдэгдэл хүргүүлжээ.

Мөн Арцатын аманд ашиглалтын талбайн гаднаа буюу нийтийн эзэмшлийн талбайд байгууллагын агуулахын эд зүйлсээ овоолж орчны бохирдуулж байгаа "Улаанбаатар цахилгаан түгээх станц" ТӨҮГ-т хугацаатай мэдэгдэл хүргүүлэн, хашаандаа байгаа нүхэн жорлонгоо солих, хог хаягдлаа яаралтай цэгцлэх талаар хугацаатай албан мэдэгдэл хүргүүлсэн байна.

Хүүшийн аманд газар ашиглах эрх зөрчигдөөд буй "Гоц Монгол" ХХК-ийн газар дээр Байгаль орчны хяналтын улсын байцаагчид хяналт шалгалтын ажил хийжээ.

Тусгай хамгаалалттай газарт үйл ажиллагаа явуулахдаа холбогдох хууль, тогтоомж зөрчих, газар ашиглах гэрээнд заасан нийтлэг үүргээ биелүүлээгүй иргэн, аж ахуй нэгж, байгууллагуудад хатуу арга хэмжээ авч байгааг анхааруулж байна.

Нийслэлийн хэмжээнд 160,885 золбин нохой тоологджээ

Эх сурвалж: Б.Манлай, www.ikon.mn, 2023.04.28

Энэ онд нийслэлд явуулсан золбин нохойн тооллогын дүнг Хотын ерөнхий менежер М.Баяраа танилцууллаа.

"Улаанбаатар хотын хэмжээнд эзэнгүй нохойн тооллого хийгдлээ. Өмнө нь 2018 онд тооллого хийгдэж байсан.

Тооллогоор нийслэлийн суурьшлын бүсэд 327,279 га талбайд 160,885 эзэнгүй нохой байна. Нэг га газарт зургаан эзэнгүй нохой байна гэсэн үг.

Сүхбаатар, Баянзүрх, Сонгинохайрхан, Хан-Уул, Чингэлтэй, Баянгол дүүрэгт эзэнгүй нохой хамгийн их тоологдсон.

Тодруулбал, Баянгол дүүрэгт 1,415, Баянзүрх дүүрэгт 64,202, Сонгинохайрхан дүүрэгт 49,726, Хан-Уул дүүрэгт 32,840, Чингэлтэй дүүрэгт 3,809, Сүхбаатар дүүрэгт 8,889 эзэнгүй нохой.

Нийслэлийн статистикийн газраас ирүүлсэн мэдээгээр хотын хэмжээнд 48,128 нохой, 2139 муур тэжээвэр буюу эзэнтэй байна.

Он гарснаас хойш 29,679 золбин муур, нохойг устгасан. Тендер шалгаруулалт дуусахаар эхний ээлжид 3,000 гаруй эзэнтэй нохойн үржлийг зогсоох мэс ажилбарыг хийнэ" гэв.

Зоонозын өвчин судлалын төвийн амьтан судлаач н.Баяр "Улаанбаатар хотын төвийн зургаан дүүргийн нийт талбайд мэргэжилтнүүд золбин нохойн тооллогыг хийлээ.

Олон нийтийн талбайд хүний хараа хяналтаас гадуур чөлөөтэй явж байгаа нохойг золбин гэж нэрлэдэг.

Төвийн зургаан дүүргийн нийт талбайн 1/4-ийг санамсаргүй түүврийн аргаар сонгоод тооллогыг хийж, нийт талбайд харьцуулж дүнг гаргах аргаар тоолсон. Ингэхэд нэг га-д дунджаар зургаа орчим золбин нохой байна.

160,000 гаруй золбин нохой байна. Сонгинохайрхан, Баянзүрх дүүрэгт хамгийн их золбин нохой тоологдсон бол Чингэлтэй дүүрэгт золбин нохой хамгийн бага.

Нийт золбин нохойн 70 орчим хувь нь гэр хороололд, үйлдвэр орчмын газарт 25 орчим хувь, орон сууцны хороолол орчимд 5 орчим хувь нь байна.

Гэр хороолол буюу хашаандаа нохой тэжээдэг иргэд нохойдоо анхаарал халамжтай байвал золбин нохойн тоо буурах боломжтой" хэмээн танилцуулав.

Н.Сугар: Гарааш чөлөөлсөн газар олон нийтийн амралт, зугаалгын талбай болно. Барилга барихгүй

Эх сурвалж: Б.Манлай, www.ikon.mn, 2023.04.28

Улаанбаатар хотын зарим байршлын гараашийг буулгаж буй. Уг ажлын талаар Хотын ерөнхий менежер мэдээлэл өглөө.

Ерөнхий менежер М.Баяраа "Нийслэлийн Засаг даргын захирамжаар 132 байршлын 2,355 гараашийг буулгаж, 46,418 га талбайг чөлөөллөө. Гарааш буулгах ажил нийслэлийн зургаан дүүрэгт явагдсан.

Баянгол дүүрэгт 33 байршлын 782

Баянзүрх дүүрэгт 21 байршлын 273

Чингэлтэй 5 байршлын 29

Сүхбаатар 30 байршлын 715

Хан-Уул дүүрэгт 21 байршлын 155

Сонгинохайрхан дүүрэгт 22 байршлын 401 гараашийг буулгаж, газрыг чөлөөллөө.

Тухайн чөлөөлсөн газарт оршин суугчдын хүсэлтийг харгалзан авто зогсоол, цэцэрлэгт хүрээлэн, тоглоомын , спортын талбай байгуулах эсэхийг шийдэх юм.

Дөрөвдүгээр сарын 21-ний байдлаар зургаан байршилд тохижилтын ажлыг хийхээр төлөвлөсөн" хэмээн танилцууллаа.

Нийслэлийн Засаг даргын зөвлөх Н.Сугар "Гарааш буулгах ажил нь түгжрэлтэй холбоотой. Учир нь алхах орчин, амарч суух талбай тухтай болсноор иргэдийн алхах сонирхол нэмэгддэг. Тэгснээр ойрхон газарт тээврийн хэрэгслийг сонгохоос татгалздаг болох нөхцөлийг бүрдүүлэхийг зорьж байгаа.

Гарааш чөлөөлсөн талбай дээр оффис, барилга байгууламж, орон сууц барихгүйг эхнээсээ хэлж байсан.

Хувь хүн эзэмшлийн газар дээрээ гарааш барьчихсан байж байгаад өөрийн газраа чөлөөлөөд объект барих цөөн тохиолдол бий.

Зарим байршилд тухайн ойр орчмын иргэд хорооны байр, өрхийн эмнэлэг барьж өгөх хүсэлтийн дагуу хийгдэж байгааг хэлье. Гэхдээ энэ нь маш цөөхөн.

Гарааш чөлөөлсөн газар олон нийтийн амралт, зугаалгын талбай болно гэдгийг нийслэлийн удирдлагуудын зүгээс хэлж байгаа юм" хэмээн мэдээллээ.

М.Балдандорж: Шинээр ашиглалтад орж байгаа барилгын шугам хоолой, бусад материал чанаргүй байна

Эх сурвалж: Б.Манлай, www.ikon.mn, 2023.04.28

Зарим орон сууцны хорооллоос зэвтэй ус гарч байгаа асуудлаар холбогдох байгууллагуудад хариуцлага тооцсон эсэх талаар УБЗАА-ны Хотын инженерийн байгууламжийн хэлтсийн дарга М.Балдандорж мэдээлэл өглөө.

Тэрбээр “Хуулиар хүлээсэн чиг үүргийн хүрээнд холбогдох байгууллагад шаардлагатай мэдээллийг гаргаж өгөх албан бичиг хүргүүлсэн. Одоо шугам угаах гэх мэт түр арга хэмжээ авч байгаа. Гүйцэтгэгч компани болон орон сууцны конторуудад шугам сүлжээгээ шинэчлэх шаардлага тавьсан. Холбогдох материал олдохгүй байгаатай холбоотойгоор хууль, хяналтын байгууллагад мэдээлэл өгч, хамтран ажиллаж байна.

Шинээр ашиглалтад орж байгаа барилгын шугам хоолой, бусад материал чанарын шаардлага хангахгүй байна. Иймээс норм, дүрэмтэй нь уялдуулах, хяналт тавих механизмыг сайжруулах зэргээр Барилга, хот байгуулалтын яамтай уулзаж, хүсэлт тавин, хамтран ажиллаж байна” гэв.

120 хүний бүрэлдэхүүнтэй нийслэлийн иргэдийн бүлэг 170 тонн хог цэвэрлэжээ

Эх сурвалж: Б.Манлай, www.ikon.mn, 2023.04.28

Хот, нийтийн аж ахуйн тохижилт үйлчилгээнд дэмжлэг үзүүлэх, нийтийн эзэмшлийн гудамж, талбайд ил задгай үүссэн хог хаягдлыг цэвэрлэх иргэдийн бүлэг дөрөвдүгээр сарын 12-ноос ажиллаж эхэлсэн билээ.

120 хүний бүрэлдэхүүнтэй тус бүлэг өнөөдрийн байдлаар 40 байршлын 3,101,036 ам метр талбайн хог хаягдлыг цэвэрлэж, 170 тонн хог хаягдлыг төвлөрсөн хогийн цэгүүдэд хүргүүлжээ.

УБЗАА-ны Орчны бохирдол, хог хаягдлын удирдлагын хэлтсээс сар бүр цэвэрлэх талбайн хуваарь, төлөвлөгөөг батлан, төрийн бус байгууллагууд өдөр тутмын гүйцэтгэлийн чанарт хяналт тавьдаг байна.

Иргэдийн бүлэг арваннэгдүгээр сарын 30-ныг хүртэл ажиллах аж.

Ким Жун Гү: Түгжрэлийг бууруулаад буй БНСУ-ын технологийг Улаанбаатарт нутагшуулахад дэмжин ажиллана

Эх сурвалж: Б.Билгүүн, www.ikon.mn, 2023.04.28

Нийслэлийн Засаг дарга бөгөөд Улаанбаатар хотын Захирагч Д.Сумъяабазар Бүгд Найрамдах Солонгос Улсаас /БНСУ/-аас Монгол Улсад суугаа Онц бөгөөд Бүрэн эрхт Элчин сайд Ким Жун Гү тэргүүтэй төлөөлөгчидтэй өнөөдөр уулзлаа.

Шинээр томилогдсон Элчин сайдтай танилцах уулзалтын үеэр талууд Улаанбаатар болон Сөүл хотын харилцаа, хамтын ажиллагаа, цаашдын ажлын талаар санал солилцжээ. 

БНСУ-аас Монгол Улсад суугаа Онц бөгөөд Бүрэн эрхт Элчин сайд Ким Жун Гү нь энэ оны нэгдүгээр сарын 24-нд Монгол Улсын Ерөнхийлөгчид Жуух бичгээ өргөн барьсан билээ.

Уулзалтын эхэнд Нийслэлийн Засаг дарга бөгөөд Улаанбаатар хотын Захирагч Д.Сумъяабазар "БНСУ-аас Монгол Улсад суух Онц бөгөөд Бүрэн эрхт Элчин сайдаар томилогдсон танд баяр хүргэж, амжилт хүсье. БНСУ-ын Засгийн газрын зүгээс өнгөрсөн хугацаанд Монгол Улсын ардчилал, шинэчлэл, тогтвортой хөгжлийг тууштай дэмжиж ирсэн. Ардчилал, хүний эрх, эрх чөлөө, зах зээлийн эдийн засаг зэрэг нийтлэг үнэт зүйлс бүхий гуравдагч хөрш болох БНСУ-тай хамтын ажиллагааг бүх салбарт өргөжүүлэн хөгжүүлэхэд таатай байх болно" хэмээлээ.

Мөн Улаанбаатар хотын төвлөрлийг сааруулж, түгжрэлийг бууруулах чиглэлд хийж, хэрэгжүүлж буй ажлуудын талаар тэрбээр танилцуулж, тэдгээрийг төсвийн болон олон улсын байгууллагын санхүүжилт, төр, хувийн хэвшлийн түншлэлийн зарчмаар үе шаттай хэрэгжүүлэхээр төлөвлөж буйг онцолсон юм.

БНСУ-аас Монгол Улсад суугаа Онц бөгөөд Бүрэн эрхт Элчин сайд Ким Жун Гү "Түгжрэл, төвлөрөл бол аль ч улсын нийслэлд тулгамдаж байдаг томоохон асуудал. Иймд манай улсад нэвтрээд буй технологи, инновацыг Монгол Улсад, Улаанбаатар хотод нутагшуулахад дэмжин ажиллах болно. Түүнчлэн KOICA зэрэг байгууллагын Улаанбаатар хоттой хамтран хэрэгжүүлж буй төсөл, хөтөлбөр амжилттай хэрэгжихэд анхаарч ажиллан, тусламж үзүүлэхийг хүсэж байна" гэсэн юм.

Монгол Улс болон БНСУ нь 1990 онд дипломат харилцаа тогтоосон билээ. Харин Улаанбаатар хот нь БНСУ-ын нийслэл Сөүл хоттой 1995 онд, Инчон хоттой 2017 онд ах дүүгийн харилцаа тогтоосон бөгөөд Намянжү, Пусан, Кёнсанбуг, Тэжон хоттой найрамдалт харилцаатай.

 

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс

Амралтын өдрүүдэд 10:00-16:00 цагт нийслэлийн 33 байршилд нөөцийн махны өргөтгөсөн худалдаа зохион байгуулна

Эх сурвалж: Г.Мөрөн, www.ikon.mn, 2023.04.28

Нөөцийн махны хүртээмжийг нэмэгдүүлэх зорилгоор дөрөвдүгээр сараас эхлэн долоо хоног бүрийн амралтын өдрүүдэд 33-35 байршилд, ажлын өдрүүдэд 10 байршилд өргөтгөсөн худалдаа зохион байгуулж байна.

Мөн есөн дүүргийн хэмжээнд 481 хүнсний болон сүлжээ дэлгүүрээр нөөцийн махыг байнга борлуулж буй. Өргөтгөсөн худалдааны үеэр махыг гулуузаар борлуулж байгаа бол хүнсний дэлгүүрүүдэд жижиглэнгээр худалдаалж байгаа юм.

Энэ долоо хоногийн амралтын өдрүүд буюу дөрөвдүгээр сарын 29, 30-ны 10:00-16:00 цагийн хооронд Баянгол, Баянзүрх, Сонгинохайрхан, Хан-Уул дүүрэгт тус бүр зургаа, Чингэлтэй дүүрэгт дөрөв, Сүхбаатар дүүрэгт гурав, Багануур, Налайх дүүрэгт тус бүр нэг, нийт 33 байршилд өргөтгөсөн худалдаа зохион байгуулна. 

Нөөцийн махны нийлүүлэлт, хүртээмж, чанар аюулгүй байдалд УБЗАА, Нийслэлийн Хүнс, хөдөө аж ахуйн газар, Нийслэлийн Мал эмнэлгийн газар, дүүргүүдийн ЗДТГ, Татварын хэлтэс хамтран байнгын хяналт тавьж байна.

САМБАЛХҮНДЭВИЙН ЦЭЦЭРЛЭГТ ХҮРЭЭЛЭНГИЙН БҮТЭЭН БАЙГУУЛАЛТЫН АЖИЛ ЭХЭЛЛЭЭ

 Эх сурвалж : Чингэлтэй дүүрэг. 2023.04.27

Нийслэлийн иргэдийн эрүүл, аюулгүй амьдрах нөхцөлийг бүрдүүлэх зорилгоор 2015 онд Монгол Улсын Их Хурлаас баталсан Улаанбаатар хотыг 2030 он хүртэл хөгжүүлэх ерөнхий төлөвлөгөөнд Самбалхүндэвийн оршуулгын газрыг олон улсын жишигт нийцүүлэн Дурсгалын цэцэрлэгт хүрээлэн болгох төслийг хэрэгжүүлэхээр тусгасан. Уг төслийг нийслэлийн Засаг даргын 2021 оны А/733 тоот захирамжаар төр, хувийн хэвшлийн түншлэлийн хүрээнд хэрэгжүүлэхээр болсон юм.

 

Энэ түншлэлийн хүрээнд “Нью Семетри” ХХК Чингэлтэй дүүргийн 20-дугаар хороо Далан давхар (Самбалхүндэв)-ийн оршуулгын газарт дурсгал хүндэтгэлийн цэцэрлэгт хүрээлэн бүхий оршуулгын мэдээлэл үйлчилгээний нэгдсэн төв барих төслийг хэрэгжүүлж байгаа бөгөөд төслийн хоёр дахь шатны ажил болох тохижилт бүтээн байгуулалтын ажил дөрөвдүгээр сарын 27-ны өдөр эхэллээ.

 

Бүтээн байгуулалт, ногоон байгууламж бүхий тохижилтын ажил 10 га талбайд 2 жилийн хугацаанд хийгдэж дуусах юм. Цэцэрлэгт хүрээлэнгийн 70 хувь нь ногоон байгууламж байх бол 30 хувьд нь буяны сүм, бурхан бологсдын чандар шүтээн залах хэсэг, иргэдийн зорчих явган зам, амрах суух хэсэг, орчны гэрэлтүүлэг зэргийг цогцоор нь шийдсэн тохижилтын ажлуудыг хийнэ.

 

Төслийн хүрээнд тус оршуулгын газрын 10 га талбай дахь талийгаачдын булшийг холбогдох хууль тогтоомж, стандарт, нийтээр хүлээн зөвшөөрсөн зан суртахуун, ёс заншилд нийцүүлэн газраас гарган чандарлаж, чандарыг шинээр байгуулах Дурсгал, хүндэтгэлийн цэцэрлэгт хүрээлэнд залахаар төлөвлөжээ.

Д.Мөнх-Эрдэнэ: Театрын өмнөх машины зогсоолын асуудлыг ирэх долоо хоногт шийднэ

Эх сурвалж: П.Сайнжаргал, www.ikon.mn, 2023.04.27

Драмын театрын урд талын талбайн автомашины зогсоолын талаарх шүүмжлэл олон нийтийн сүлжээнд өрнөсөн.

Тэгвэл театрын өмнөх зогсоолыг хэрхэн ашиглаж, ямар арга хэмжээ авах талаар Нийслэлийн Засаг даргын Ахлах зөвлөх Д.Мөнх-Эрдэнээс тодрууллаа.

Тэрбээр "Төлбөртэй, төлбөргүй ч бай төв театрынхаа өмнө машины зогсоол ажиллуулж байгаа нь зохимжгүй. Театрын өмнөх талбай нь өргөн цэлгэр, тохилог орчин байх ёстой. Гэтэл шороотой олон машины тоосыг арчаад л явцгааж байна. 

Зогсоолын зориулалтаар ашиглах бус, уужим талбай байх нь зүйтэй. Энэ талаар ирэх долоо хоногоос шийдвэр гарна. Тэр үед мэдээлэл өгөх боломжтой" хэмээн хэлэв. 

За манайхаан, Театрынхаа чанх урд төлбөртэй авто зогсоол ажиллуулдаг улс, хот дэлхийд байхгүй биз дээ!? Арга хэмжээ авсан нь зөв байх аа, тийм ээ? pic.twitter.com/avme47SoGn

— Munkh-Erdene Dembereltseren (@MunkhErdene81) April 26, 2023

ФОТО: Цахим орчинд хүүхдийн гадуурхал, дээрэлхэлтийг бууруулах “Найз байя” аян нээлтээ хийлээ

Эх сурвалж: М.Батчимэг, www.ikon.mn, 2023.04.27

Үе тэнгийн дарамт, дээрэлхэлт, хүүхдийн эсрэг хүчирхийллээс урьдчилан сэргийлэх “Найз байя” үндэсний аян өнөөдөр нээлтээ хийлээ.

Тус аян нь хүүхдүүдийн дунд тулгамдаж буй үе тэнгийн дарамт, ялгаварлан гадуурхалтыг бууруулах, урьдчилан сэргийлэх чиглэлээр хүүхэд, эцэг эх асран хамгаалагч, багш нарын мэдлэг, ойлголтыг нэмэгдүүлэх зорилготой аж.

Өнөөдрөөс эхлэн зургадугаар сарын наймны өдөр хүртэл үргэлжлэх уг аяныг Хөдөлмөр, нийгмийн хамгааллын яам, Дэлхийн Зөн Монгол ОУБ-аас санаачлан хэрэгжүүлж байгаа бөгөөд энэ хугацаанд цахим орчинд хүүхдийн гадуурхал, дээрэлхэлтийг бууруулахад чиглэсэн нөлөөллийн ажлуудыг зохион байгуулахаар болжээ.  

Тухайлбал:

Олон улсын хүүхдийг зодож шийтгэхийн эсрэг өдөр /дөрөвдүгээр сарын 30/,

Олон улсын гэр бүлийн өдөр /тавдугаар сарын 15/,

Олон улсын хүүхдийн эрхийг хамгаалах өдөр /зургаадугаар сарын 01/-ны өдрүүдэд 21 аймаг есөн дүүргийн хэмжээнд нөлөөллийн ажил зохиох аж.

Аяны үр дүнг хэмжих зорилгоор 14 орон нутгийн нийт 6,252 сурагч, багш, эцэг эхчүүдийн дунд хийгдсэн судалгаагаар хүүхдүүдийн тал нь үе тэнгийн дарамт, ялгаварлан гадуурхалт эргэн тойронд нь тохиолддог гэжээ. Харин эцэг эхчүүдийн 32 хувь нь энэ талаар мэдэхгүй гэж хариулсан байна.