Түрээсийн скүүтэр хэрэглээнд нэвтэрч эхэллээ

Эх сурвалж: Jet sharing Mongolia facebook page. 2023.05.28

3000ш түрээсийн scooter-ийг УБ хотын хэрэглээнд нэвтрүүлж эхэллээ.

Scooter хэрхэн ажилладаг вэ? 

1. Appstore болон Playstore-с Jet Scooter application-ийг татах.

2. Хэрэглэгчээр бүртгүүлэх.

3. Зүүн доор байрлах меню хэсэгээс wallet цэсэн дээр дарснаар хэтэвч-ээ цэнэглэх. ( Хамгийн багадаа 4000 төгрөгөөр) 

4. Жолоон дээр байрлах QR кодийг Jet application-аар уншуулснаар аялалаа эхлэх боломжтой. 

5. Тариф-аа сонгон эхлэх товчийг дарна уу. 

6. Газрын зураг дээр байрлах "P" үсгээр тэмдэглэгдсэн бүх зогсоол дээр Scooter-ийг байршуулан аялалаа дуусгах боломжтой.

Дүрэм:

1. Замын хөдөлгөөний дүрмийг зөрчилгүй, бусдад саад болохгүй газар scooter- ээ байршуулна уу.

2. Газрын зураг дээрх улаанаар тэмдэглэгдсэн бүс рүү орохыг хориглоно. 

3. Зөвхөн 18 нас хүрсэн хүн-д түрээслэхийг зөвшөөрнө.

4. Scooter-ийг нэг-ээс дээш хүн унахыг хориглоно.

5. Зам гарахдаа scooter-ээ аюулгүй байдлийг хангаж явган гарна уу.

Ашиглах дүрэмийг зөрчсөн тохиолдолд таны аккаунт хаагдах боломжтойг анхаарна уу!

1 минут 200₮-өөс эхэлнэ

App Store болон Google Play - ээс Jet Scooter application-ийг татна уу.

Эх сурвалж: tseg.mn facebook хуудсанд 2023 оны 5 дугаар сарын 29-нд нийтлэгдсэн бичлэг

Зөвшөөрөлгүй түц

 

Өнөөдрөөс эхлэн дөрвөн өдөр түр хаагдах замууд

Эх сурвалж: Б.Манлай, www.ikon.mn, 2023.05.04

Унгар улсын Үндэсний Ассамблейн дарга Көвер Ласло тэргүүтэй төлөөлөгчид 2023 оны тавдугаар сарын 4-7-ны өдрүүдэд Монголд албан ёсны айлчлал хийнэ.

Уг айлчлалын үеэр зарим замын хөдөлгөөнийг түр хаахаар болсныг ТЦА мэдээллээ.

Тодруулбал, өнөөдрөөс эхлэн Ням гарагт Наадамчдын гудамж, Чингисийн өргөн чөлөө, Энхтайваны өргөн чөлөө, Их Монголын гудамж, Жанжин Д.Сүхбаатарын талбай, Бага тойруу орчмын замын хөдөлгөөнийг зочин зорчих үед аюулгүй байдлыг хангах зорилгоор тодорхой хугацаанд түр хязгаарлах юм байна.

Замын хөдөлгөөнд оролцогчид эдгээр өдрүүдэд хамгаалалтад үүрэг гүйцэтгэж байгаа цагдаагийн алба хаагчийн хууль ёсны шаардлагыг биелүүлж, шаардлагагүй тохиолдолд хөдөлгөөнд оролцохгүй байх, бусад хөдөлгөөнд оролцогч нарт хүндэтгэлтэй хандаж, анхаарал болгоомжтой явахыг зөвлөлөө.

“INTERNATIONAL FAIR” олон улсын оролцогчдын үзэсгэлэн маргааш нээлтээ хийнэ

Эх сурвалж: www.ikon.mn, 2023.05.04

Монголын барилгын салбарын хөгжлийг түүчээлэгч аж ахуй нэгж байгууллагууд, барилгын салбартай ажил үйлсээрээ холбогдсон мянга мянган барилгачид болон үзэгчид нэгэн дээвэр дор  цугладаг “BARILGA EXPO 2023” олон улсын үзэсгэлэн, яармаг 16 жилийн туршид тасралтгүй зохион байгуулагдаж, жил ирэх тусам оролцогчдын тоо, борлуулалтын хэмжээ өссөөр, Монгол улсын эдийн засагт хувь нэмрээ оруулаад зогсохгүй барилгын салбарт томоохон дэмжлэг болсоор ирсэн билээ.  

Бид 2023 оны үзэсгэлэнгээ өргөжүүлэн Монголын барилгын зах зээлд олон улсын нэр хүндтэй брэндүүдийг танилцуулахаар BARILGA EXPO үзэсгэлэнгийн 2-р хэсгийг “International fair” олон улсын оролцогчдын үзэсгэлэнг анх удаа зохион байгуулах гэж байна.

Тус олон улсын оролцогчдын үзэсгэлэн нь 5 дугаар сарын 05-07-ны хооронд “Мишээл экспо” төвд зохион байгуулах ба маргааш 12 цагт нээлтээ хийнэ. Үзэсгэлэнд Хятад, Солонгос, Казакстан, Итали, Турк, Герман зэрэг улсын 80 орчим компанийн оролцогчид барилгын материал, дэвшилтэт технологио танилцуулна.

Манай улсын барилгын салбар нь дотоодын нийт бүтээгдэхүүний 3.7 хувийг эзэлдэг бөгөөд барилгын үйлдвэрлэлд ашиглаж байгаа материал бүтээгдэхүүнийхээ 60-70 орчим хувийг импортоор хангадаг “хэрэглэгч орон”. Тиймээс дотоодын зах зээлд гаднын барилгын материал, бүтээгдэхүүний эрэлт өндөр бөгөөд “International fair” 2023 олон улсын үзэсгэлэн, яармагаар дамжуулан барилгын салбарын томоохон брэндүүдийг монголын зах зээлд таниулан нэвтрүүлэх, эдийн засгийн эргэлтийн нэмэгдүүлэх цаашлаад дотоодод үйл ажиллагаа явуулж буй компаниуд олон улсын компаниудтай хамтын ажиллагааны харилцаа холбоо тогтоох, туршлага судлах боломжууд бий болж байна.

Үзэсгэлэнгийн өдрүүдэд гаднын зочид төлөөлөгчид, салбарынхандаа зориулан Монголын барилгын салбарын зах зээл, бизнесийн орчныг танилцуулах, гаднын компаниудын дэвшилтэт технологийн талаарх илтгэл, семинарыг “Мишээл экспо” - ийн хурлын танхим болон тайзан дээр зохион байгуулна.

Д.Батням: Арматурын үнэ буурсан бол цементийнх тогтворжсон

Эх сурвалж: Б.Манлай, www.ikon.mn, 2023.05.04

Барилгын материалын үнэ ханш, чанарын талаар Барилгын хөгжлийн төвөөс өнөөдөр хэвлэлийн хурал зохион байгууллаа.

"Монгол Улсын хэмжээнд импортолж буй барилгын материалын ихэнх хувийг БНХАУ, ОХУ-аас авдаг. Энэ жилийн барилгын олон улсын үзэсгэлэнд БНСУ, Итали, Турк, Казахстан улсын барилгын технологийг нэвтрүүлэхээр оролцуулж байна. 

Барилгын материалын үнийн судалгааг 2-3 төрлөөр гаргадаг. Цар тахлын үед барилгын материалын үнэ өссөнөөс ААН-үүдэд дарамттай их байлаа.

Сайдын өгсөн тушаалын дагуу 890 нэр төрлийн барилгын материалын үнийн судалгааг гаргаж, ААН-үүдийн үнийн өсөлтийг мөн тооцож ажилласан.

Одоогийн байдлаар барилгын материалын үнэ харьцангуй тогтворжсон. Арматурын үнэ 12%-аар буурсан бол цементийн үнэ тогтвортой байна. Гэхдээ цар  тахлын өмнөх үеийн үнэд хүрээгүй. Цаашид барилгын материалын үнэ буурах хандлагатай.

Барилга экспо үзэсгэлэнд БНХАУ болон бусад улсын барилгын материал үйлдвэрлэгчдийг оролцуулж байгаа. Ингэснээр барилгын материалыг үйлдвэрээс нь шууд авах боломжтой болж байгаа юм" хэмээн Барилгын Хөгжлийн Төвийн Барилга, барилгын материалын үйлдвэрлэлийн хэлтсийн дарга Д.Батням мэдээллээ.

Барилгын материалын чанарын тухай тэрбээр "Барилгын чанарт анхаарч, шалгалт хийдэг. Сая арматурын шалгалтыг хийж багагүй зөрчил илрүүлсэн. Барилгын тухай хуульд зааснаар тохирлын гэрчилгээгээр барилгын материалын чанарыг тодорхойлдог. Тохирлын гэрчилгээ авах шаардлагыг дотоодын болон импортын бараанд тавьдаг" гэв.

Г.Батсүх: Орон сууцны үнэ цаашид буурах хандлагатай

Эх сурвалж: Б.Манлай, www.ikon.mn, 2023.05.04

Барилгын хөгжлийн төвөөс өнөөдөр хэвлэлийн хурал зохион байгуулах үеэр барилгын салбарын сэргэлт, орон сууцны үнийн талаар мэдээлэл өглөө.

Барилга.мн-ийг үүсгэн байгуулагч, ТУЗ-ийн дарга Г.Батсүх "Эдийн засгийн өсөлт, бууралтаас барилгын салбарын өсөлт, бууралт хоцорч явдаг. Цар тахлын үед бага зэргийн уналттай байсан. Одоо барилгын ажлууд төдийлөн эхлээгүй. Энэ сараас барилгын ажил эхэлж, сэргэж байна.

Цар тахлын үед эдийн засгийг дэмжих 10 их наядын хөтөлбөр, ипотекийн зээлийн хэмжээ нэмэгдэж, бэлэн мөнгөний урсгал их орсонтой холбоотойгоор орон сууц, үл хөдлөх хөрөнгийн эрэлт огцом нэмэгдсэн юм. Үүнээс шалтгаалаад шинэ, хуучин орон сууцны үнэ өссөн.  Зах зээлийн хоёр дахь арилжаа явагдаж байгаа учраас ямар нэгэн зохицуулалт байдаггүй. Иргэдийн хувьд эрэлт, нийлүүлэлтийн зарчмаараа үнийн өсөлт бууралтаа хариуцаад явдаг.

Барилгын материалын үнэ цар тахлын үед дунджаар 85%-аар өссөн. Төсөвт өртөг ч энэ хэмжээгээр өссөн учир шинэ орон сууцны үнэ нэмэгдсэн. Шинээр орон сууц барьж буй компаниуд үнээ өсгөсөн тал бий.

2023 он гараад ипотекийн зээлийн хэмжээ буурч, эдийн засаг дахь бэлэн мөнгийг хумих бодлого явагдсан. Үүнийг дагаад өнөөдрийн байдлаар орон сууц, үл хөдлөх хөрөнгийн үнэ бага зэрэг буурч байна.

Импортын барилгын материалын үнэ буурч байгаа болохоор орон сууцны үнэ цаашид харьцангуй буурах хандлагатай байна гэж ойлгож болно" хэмээн ярилаа.

Унгар улсын Үндэсний Ассамблейн дарга Көвер Ласло, түүний гэргий Бэкк Мариа нарыг Д.Сүхбаатарын талбайд угтан авлаа

Эх сурвалж: Г.Мөрөн, www.ikon.mn, 2023.05.04

Улсын Их Хурлын дарга Г.Занданшатар, гэргий Г.Отгонгэрэлийн хамт өнөөдөр Монгол Улсад албан ёсны айлчлал хийж буй Унгар улсын Үндэсний Ассамблейн дарга, ноён Көвер Ласло, гэргий Бэкк Мариа нарыг Жанжин Д.Сүхбаатарын талбайд угтан, мэндчиллээ.

Улсын Их Хурлын дарга Г.Занданшатар, гэргий Г.Отгонгэрэл нар эрхэм зочдын хамт Их Эзэн Чингис хааны хөшөөнд хүндэтгэл үзүүлсний дараа Төрийн ордны Ёслол хүндэтгэлийн өргөөний Баганат танхимд саатан, Эрхэмсэг ноён Көвер Ласло хүндэт зочны дэвтэрт сэтгэгдлээ үлдээн, гарын үсэг зурав.

Үргэлжлүүлэн Улсын Их Хурлын дарга Г.Занданшатар, Унгар улсын Үндэсний Ассамблейн дарга, ноён Көвер Ласло нарын албан ёсны хэлэлцээ Төрийн ордонд эхэллээ хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.

Уулын дугуйчдын уралдаан Хүй долоо худагт болно

Эх сурвалж: Б.Манлай, www.ikon.mn, 2023.05.04

Монгол наадам цогцолбор ОНӨТҮГ болон Монголын дугуйн холбоо хамтран “Морь хурдан уу, дугуй хурдан уу” нэртэй уулын дугуйн уламжлалт тэмцээнийг тавдугаар сарын 13-нд Хүй долоо худагт зохион байгуулахаар болжээ. Өөрөөр хэлбэл, хурдан морины уралдааны замаар дугуйчид хүч сорино хэмээн мэдээллээ.

Тамирчдын аюулгүй байдлыг харгалзан хамгийн аюулгүй, дугуйчдад тохиромжтой замтай учраас Хүй долоо худагт тус тэмцээнийг зохион байгуулдаг бөгөөд тамирчид нийт 25 км замыг туулан барианд орох аж.

Монгол наадам цогцолбор ОНӨТҮГ нь дугуйн спортыг хөгжүүлэхэд хувь нэмрээ оруулах хүрээнд Монголын дугуйн холбооны үйл ажиллагаанд дэмжлэг үзүүлдэг байна.

Монголын дугуйн холбоо 1959 онд байгуулагдсан, 10,000 гишүүн 17 салбар хороо, 40 клубтэй. Энэ жил тус холбооноос 36 тэмцээн уралдаан зохион байгуулахаар төлөвлөжээ.

 

Эх сурвалж: Монгол наадам цогцолбор ОНӨТҮГ

Эх сурвалж: Б.Сондор, www.gogo.mn, 2023.05.04

Монгол наадам цогцолбор ОНӨТҮГ болон Монголын дугуйн холбоо хамтран “Морь хурдан уу, дугуй хурдан уу” нэртэй уулын дугуйн уламжлалт тэмцээнийг тавдугаар сарын 13-нд Хүй долоо худагт зохион байгуулах гэж байна. Энэ хүрээнд Монгол наадам цогцолбор ОНӨТҮГ, Монголын дугуйн холбооны төлөөллүүд уулзаж, уралдааны зарим нөхцөлийг хэлэлцлээ.

Тамирчдын аюулгүй байдлыг харгалзан хамгийн аюулгүй, дугуйчдад тохиромжтой замтай учраас Хүй долоо худагт тус тэмцээнийг зохион байгуулдаг бөгөөд тамирчид нийт 25 км замыг туулан барианд орох юм.

Монгол наадам цогцолбор ОНӨТҮГ нь дугуйн спортыг хөгжүүлэхэд хувь нэмрээ оруулах хүрээнд Монголын дугуйн холбоотой 2014 оноос хойш хамтран ажиллаж, үйл ажиллагаанд нь дэмжлэг үзүүлж буй юм. Монголын дугуйн холбоо 1959 онд байгууллагдсан бөгөөд өдгөө 10,000 гишүүн 17 салбар хороо, 40 клубтэйгээр үйл ажиллагаагаа явуулж байна. Энэ жил тус холбооноос 36 тэмцээн уралдаан зохион байгуулахаар төлөвлөжээ.

ГЕГ: Он гарсаар Монгол Улсад 18780 ширхэг суудлын автомашин импортлогджээ

Эх сурвалж: Э.Оргил, www.gogo.mn, 2023.05.03

ГЕГ-аас 2023 оны эхний дөрвөн сарын экспорт, импортын мэдээг нэгтгэн хүргэлээ.

Монгол Улсын хэмжээнд 2023 оны эхний дөрвөн сарын байдлаар нийт импорт 2.7 тэрбум ам.долларт хүрч 311 сая ам.доллар буюу 13.2 хувиар өссөн. Үүнд нөлөөлсөн гол зүйл нь нефтийн бүтээгдэхүүн бөгөөд 44 хувиар өссөн байна.

Мөн машин, тоног төхөөрөмж, тэдгээрийн эд ангийн импорт 31.5 хувиар өссөн нь импортын өсөлтөд голлон  нөлөөлжээ. Импортын бүтцийг авч үзвэл нийт импортын:

10.8 хувийг хүнсний бүтээгдэхүүн

21.1 хувийг нефтийн бүтээгдэхүүн

37.3 хувийг автомашин, машин механизм, техник тоног төхөөрөмж тэдгээрийн эд анги

30.8 хувийг бусад бараа бүтээгдэхүүн эзэлж байна.

Энэ оны эхний дөрвөн сарын байдлаар Монгол Улсад 18780 ширхэг суудлын автомашин, 5712 ширхэг ачааны автомашин импортлогдсон байна.

"Шинэ цэвэрлэхийн барилгын ажил 426 хүний хүчээр 67%-тай өрнөж байна. Ирэх оны 10 сард ашиглалтад оруулна"

Эх сурвалж: Б.Манлай, www.ikon.mn, 2023.05.03

Шинэ цэвэрлэх байгууламжийн бүтээн байгуулалтын ажил тавдугаар сарын 1-нээс үргэлжилнэ хэмээн Хотын инженерийн байгууламжийн хэлтсээс мэдээлж байв. Харин шинэ байгууламжтай болсноор Улаанбаатарт өмхий үнэр гарахгүй байх эсэх, бүтээн байгуулалтын ажлын явцын талаар Улаанбаатар хотын Төв цэвэрлэх байгууламжийг шинээр барих төслийн технологийн инженер Б.Анхбатаас тодрууллаа.

- Цэвэрлэх байгууламжийн барилгын бүтээн байгуулалтын ажил эхэлсэн үү, ажлын явц хэдэн хувьтай байгаа вэ?

- Улаанбаатар хотын шинэ цэвэрлэх байгууламжийн барилга угсралтын бэлтгэл ажил 2023 оны гуравдугаар сарын 28-наас эхэлсэн. Үндсэн 17 барилгыг угсрах ажил 67%-тай хийгдэж байна. Өнөөдрийн байдлаар бүтээн байгуулалтын талбай дээр нийт 426 хүн ажиллаж байгаагийн 200 орчим нь хятад ажилчин. Үлдсэн нь монголчууд.

Энэ жил барилга угсралтын ажлыг 85%-д хүргэж, дуусгах төлөвлөгөөтэй. Ирэх жил тоног төхөөрөмж нийлүүлэх, угсрах, тохируулах, турших ажлууд хийгдэнэ. Ингээд шинэ цэвэрлэх байгууламжийн барилгын ажлыг 2024 оны аравдугаар сард дуусгахаар төлөвлөж байна. Ямар нэг саад гарахгүй бол хугацаандаа ашиглалтад орно.

Өнгөрсөн жилүүдийн хувьд цар тахлаас шалтгаалаад ажиллах хүчний хомсдолд орж, бараа материалын татан авалт гацаж, ашиглалтад орох цаг хугацаанаас хойш татсан. Мөн тээврийн өртөг, цемент, арматурын үнэ өссөн нь төслийн үйл ажиллагаанд нөлөөллөө.

Энэ жилийн хувьд хил нээгдэж, бараа материалын татан авалт, барилгын бүтээн байгуулалтын ажил хэвийн явагдаж байна. Санхүүжилт гүйцэтгэлээр тооцогддог. Гэхдээ ханшийн зөрүүгээс шалтгаалсан санхүүжилтийн асуудал гарч байна.

- Шинэ цэвэрлэх байгууламж нь хэдэн объекттой байх бол?

- Төслийн хүрээнд нийт 33 объект баригдана. Харуулын байр, дулаан хуваарилах, үнэргүй болгох систем, цахилгааны дэд станц, гарааш, агуулах, захиргааны гээд барилгууд бий.

Технологитой холбоотой 25 барилга байна.

- Технологийн хувьд өмхий үнэр гарахгүй байх уу, ямар онцлогтой вэ?

- Одоо баригдаж байгаа цэвэрлэх байгууламж нь битүү. Өөрөөр хэлбэл, ашиглалтад орсны дараа өмхий үнэр гарахгүй.

Хамгийн орчин үеийн тоног төхөөрөмжтэй байна. Манайд тусгайлан зориулж тоног төхөөрөмж үйлдвэрлэж байгаагаараа онцлогтой. Азидаа эхний 10-т орох томоохон байгууламж. 

Байгууламжийн тоног төхөөрөмж Герман, Швед, Япон зэрэг улсаас нийлүүлэгдэнэ. Зарим тоног төхөөрөмж Хятадад байдаг хамтарсан үйлдвэрээс ирнэ. Тухайлбал, насос гэхэд атомын цахилгаан станцын насос үйлдвэрлэдэг үйлдвэрүүдээс авна. Хамгийн сайн үйлдвэрийн тоног төхөөрөмжийг сонгож байгаа.

Шинэ цэвэрлэх байгууламжийн хүчин чадал хоногт 250,000 метр куб бохир ус хүлээн авч цэвэрлэнэ. Одоо ажиллаж байгаа цэвэрлэх байгууламж хоногт 180,000 орчим метр куб бохир ус цэвэрлэдэг. Хүн амын тоогоор нь авч үзвэл, нэг сая орчим хүнд тохирсон хүчин чадалтай. ААН, үйлдвэрийн бохирыг тооцоололд оруулсан.

Технологийн хувьд механик болон биологийн цэвэрлэгээтэй, лагийн бүрэн боловсруулалт хийгдэнэ. Лагийн бүрэн боловсруулалт гэдэг нь лагийн тодорхой хэсгийг эсгээд хий гарган шатааж өөрийн дотоодын дулаан, цахилгаанаа хангах ашигт үйлийн коэффициент өндөртэй байгууламж гэж ойлгож болно.

Гэхдээ үйлдвэрүүдийн урьдчилан цэвэрлээгүй ус буюу стандарт хангаагүй өндөр бохирдолтой ус нийлүүлэгдвэл цэвэрлэх байгууламж ажиллахгүй. Учир нь үйлдвэрийн хэт өндөр бохирдолтой ус нийлүүлж болохгүй. Өөрөөр хэлбэл, үйлдвэрүүд үс ноос байвал цэвэрлэх, бүх хогоо бохиртоо хийхгүй, ангилах стандартаа барих хэрэгтэй, бүх хогоо 00 руугаа хийхгүй байхыг хичээнэ гэсэн үг.

Бусад улсад үйлдвэрүүд хэт бохирдолтой ус цэвэрлэх байгууламжид нийлүүлбэл шууд хааж, торгууль ногдуулдаг туршлага байдаг. 

Одоо гарч байгаа өмхий үнэрийг арилгах ажлыг Ус Сувгийн Удирдах Газар хариуцдаг. Бохирыг дөрвөн жил байгалийн аргаар хатаадаг байсныг өдөрт нь хатаадаг болгосон байсан. Хуучин цэвэрлэх байгууламжийн хүчин чадлаас хэд дахин их бохир нийлүүлэгдэхээр цэвэрлэж чадахгүй байгаагаас өмхий үнэртэж байгаа байх.

Цэвэрлэх байгууламж нь нэг хүнээс гарах бохирдлыг тооцоолоод цэвэрлэдэг стандарттай. Дэлхийн бүх улсад ингэж тооцоолдог.

Манай улсад мах, ноос боловсруулах үйлдвэрүүд, эмнэлгүүд бохироо урьдчилсан цэвэрлэх байгууламжтай байх ёстой. Одоо ажиллаж байгаа цэвэрлэх байгууламж ахуйн зориулалттай. Тиймээс эко үйлдвэр байхын тулд заавал бохироо урьдчилсан цэвэрлэх байгууламжийг хийх хэрэгтэй. Энэ стандартыг мөрдөх нь сул байна.

- Байгууламжийн төслийн нийт өртөг нь хэд вэ?

- Төслийн нийт өртөг 262.7 сая ам.доллар. БНХАУ-ын нэг тэрбум ам.долларын нэн хөнгөлөлттэй зээлээр баригдана. 262.7 сая ам.долларын 95%-ийг Хятадын зээлээс үлдсэн 5%-ийг Монгол Улсын Засгийн газраас гаргаж байгаа.

Байгууламжийн бүтээн байгуулалтыг БНХАУ-ын "Төмөр зам IV анги" гүйцэтгэж байна.

БНСУ-ын сүлжээ кофе шоп “Coffee namu” Монголд нээгдлээ

Эх сурвалж: www.ikon.mn, 2023.05.03

Nomadd брэнд БНСУ-ын сүлжээ кофе шоп “Coffee Namu”-гийн мастер франчайзын эзэмшигч боллоо

Nomadd брэнд дэлгүүрээ Шангри Ла моллд нээгээд 2 жил орчим үйл ажиллагаа явуулсан билээ. Энэ хугацаанд тус брэндийн менежментийн баг хэрэглэгчдэдээ арай өөр төрлийн experience (туршлага) мэдрүүлэхийг зорин, сүүлийн үеийн чиг хандлагуудыг судалж байв. Ингээд ихэвчлэн цайны цагаар, эсвэл ажлаа тараад дэлгүүрээр үйлчлүүлдэг хэрэглэгчдийн хувьд бүтээгдэхүүн худалдан авах зуураа тав тухтай орчинд түр амсхийх хэрэгцээ шаардлага байгааг олж харжээ.

Магадгүй цайны цагаараа тав тухтай, халуун дулаан орчинд аяга кофе ууж, зүсэм бялуу амтлах зуураа таалагдсан бүтээгдэхүүнээ худалдан аваад, завгүй амьдралаасаа түр амсхийх таатай мэдрэмжийг өөртөө бэлэглэх завшаан юм.

Ингээд Nomadd-ын хамт олон БНСУ-ын сүлжээ кофе шоп “Coffee Namu”-гийн Монгол дахь мастер франчайз эзэмшигч болж, 2020 онд салбаруудаа нээхээр төлөвлөж байв. Гэвч цар тахлын улмаас нээлтийн үйл ажиллагаа хойшилсоор төлөвлөсөн хугацаанаасаа 3 жилийн дараа буюу өдгөө 2023 оны 5 сарын 1-нд албан ёсоор нээгдэж байна. 

2023 оны 5 сарын 1-нээс 5 сарын 5-ны хооронд нээлтийн урамшуулал зарласан байгаа тул та бүхэн Coffee namu кофе шопоор зочлон аяга кофе, зүсэм бялуу амтлан тав тухтай үйлчлүүлээрэй.

Хаяг: Улаанбаатар хот, Сүхбаатар дүүрэг, 1-р хороо, IC Tower 2 давхарт

Утас: 7570-4422, 7772-4422

www.facebook.com/coffeenamumongolia

www.instagram.com/coffeenamumongolia

Номын баяртай давхацсан тул автомашингүй өдөр, марафоныг зургаадугаар сарын 3-нд болгожээ

Эх сурвалж: Б.Манлай, www.ikon.mn, 2023.05.03

Олон улсын марафон тавдугаар сарын 27-нд болно, энэ өдөр автомашингүй өдөр байна хэмээн Нийслэлийн Биеийн тамир спортын газраас мэдээлж байв. Гэвч уг арга хэмжээ хойшлогдсон байна.

Энэ талаар тус газраас лавлаж асуулаа.

Нийслэлийн Биеийн тамир спортын газрын Спорт, нийтийн биеийн тамирын хэлтсийн дарга С.Саранцэцэг "Нийслэлийн Засаг даргын захирамжаар жил бүрийн тавдугаар сарын гурав дахь долоо хоногийн Бямба гарагт олон улсын марафоныг зохион байгуулдаг.

Өнгөрсөн жил Соёлын тухай хуульд тавдугаар сарын гурав дахь долоо хоногт Сүхбаатарын талбайд номын баяр зохион байгуулахаар хууль батлагдсан тул 2022 онд тавдугаар сарын дөрөв дэх долоо хоногт олон улсын марафоныг зохион байгуулж байсан юм. Энэ жил мөн энэ хугацаандаа зохион байгуулахаар удирдамжаа гаргаад төлөвлөсөн байсан.

Гэвч тавдугаар сарын 20-д гаргаад манай улсад хоёр улсын ерөнхийлөгч ирэх гэж байгаа юм билээ. Энэ айлчлалтай холбогдуулаад номын баярыг хойшлуулах асуудал гарсан ч хуульчлагдсан учир хойшлуулаагүй. Харин олон улсын марафоныг 2023 оны зургаадугаар сарын 3-н хүртэл хойшлуулаад байна.

Олон улсын марафонд ирж оролцох гадаадын тамирчдын онгоцны тийз, зочид буудлын захиалгыг хойшлуулах ажлыг зохицууллаа. Кени улсаас хоёр эрэгтэй, нэг эмэгтэй элит тамирчин ирэхээр тийзээ захиалсан байсан.

Энэ жилийн гүйлтэд Япон, ОХУ, Кенийн тамирчид оролцоно.

Зургаадугаар сарын 3-ны Бямба гарагт болох Улаанбаатар марафон 09:00-17:00 цаг хүртэл үргэлжилнэ. Тамирчид Сүхбаатарын талбайгаас барианаас гарна. Марафоны үеэр өглөө 06:00-18:00 цаг хүртэл маршрутын дагуу замын хөдөлгөөнийг хаадаг" гэв.

Харин Нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө цахим хуудсандаа "Улаанбаатар марафон - 2023 олон улсын гүйлт 2023 оны 06 дугаар сарын 03-ны өдөр болно. Жич: Автомашингүй өдөр" хэмээн бичсэн байна.

Түүний мэдээлснээр, зургаадугаар сарын 3-нд олон улсын гүйлт болж, автомашингүй өдөр байх нь.

Гүйлтэд оролцох иргэдээс харьяа эрүүл мэндийн төвдөө даралтаа үзүүлж гүйж болох эсэх тухай эмчийн бичиг шаарддаг. Тухайн өдөр иргэний даралтыг бид үзсэн ч эрсдэлтэй байж болно. Бэлтгэлгүйгээр огцом гүйхэд булчин шөрмөс татах, толгой эргэх, даралт ихсэх хүндрэлүүд гардаг болохыг зөвлөв.

“Улаанбаатар марафон-2023” олон улсын гүйлтийн онлайн бүртгэл, хураамжийг 2023 оны тавдугаар сараас 10-30-ны өдрийн 17:00 цаг хүртэл http://ubmarathon.hipay.mn цахим хуудас, hipay аппликэйшнээр явуулж байгаа аж.

Энэ жилийн марафонд 30,000 орчим хүн оролцох юм байна. Өнгөрсөн жил 24,000 хүн оролцож гүйжээ.

У.Санчир: Явган хүний зам дээр машинаа гаргаж тавьдаг үйлдлээс үүдэн тухайн замд эвдрэл, гэмтэл үүсэж байна

Эх сурвалж: П.Сайнжаргал, www.ikon.mn, 2023.05.03

“Авто замын салбар дахь асуудал шийдэл: Явган замын хавтан, авто замын хашлагын төлөвлөлт, гүйцэтгэл ба хяналт” сэдэвт хэлэлцүүлэг өнөөдөр Авлигатай Тэмцэх Газар (АТГ)-ын байранд боллоо.

Энэ үеэр Улаанбаатар хотын Захирагчийн ажлын албаны Дугуйн ба явган хүний зам тохижилтын хэлтсийн ахлах ажилтан У.Санчирын танилцуулсан илтгэлийг хүргэж байна. 

"Явган хүний замд шон байрлуулах, хөтөч хавтан тасалдах зэрэг түгээмэл асуудал байна"

Тэрбээр "Улаанбаатар хотын хэмжээнд 1,064 километр явган хүний зам бий. Хийц бүтээцийн хувьд дийлэнх хэсэг нь бетон хавтан, байгалийн чулуу, бетон цутгамлаар хийсэн байгаа.

Тухайлбал, байгалийн чулуун хийцлэлтэй 70,000 метр квадрат талбай бүхий явган хүний замтай бөгөөд цаг агаарын байдлаас шалтгаалан халтиргаа гулгаа их үүсдэг.

Тэгвэл нийслэлийн явган хүний замыг бүхэлд нь бетон хучилтаар хийх боломжтой юу?

Зарим тохиолдолд газрын доор инженерийн байгууламж, шугам сүлжээ байдаг учраас бетон болон асфальт ашиглах боломжгүй болгодог.

Иймд тухайн замыг буцааж сэргээх бололцоогоор хангаж хавтан болон байгалийн чулуугаар нийслэлийн явган хүний замыг засаж, сайжруулж байна" гэдгийг илтгэлдээ дурдав. 

Явган зорчиход үүсдэг асуудлууд болон зам дээрх саадын талаар... 

Хараагүй хүний хөтөч хавтан дээр хогийн сав, сандал байрлуулах

Хөтөч хавтан тасалдах 

Явган хүний замд шон байрлуулах

Явган замын засвар үйлчилгээ дутмаг, хог хаягдлыг цэвэрлэдэггүй зэрэг асуудал үүсдэг. 

Мөн явган хүний зам дээр машинаа гаргаж тавьдаг үйлдлээс үүдэн тухайн замд эвдрэл, гэмтэл үүсэж байна. Энэ бол зам барихад гаргасан гүйцэтгэлийн алдаа бус иргэдийн ухамсрын асуудал гэдгийн нэмж хэллээ. 

"Энэ онд нийслэлийн хэмжээнд 69,000 метр квадрат явган хүний зам барихаар төлөвлөсөн"

Үргэлжлүүлэн энэ жил нийслэлд хийх зам засвар, бүтээн байгуулалтын талаар Дугуйн ба явган хүний зам тохижилтын хэлтсийн ахлах ажилтан У.Санчир мэдээлэл өгөв. 

Энэ тухай "Нийслэлийн зам хөгжлийн газраас 2022, 2023 онд нийт 60,000 гаруй метр квадрат явган зам барихаар төлөвлөсөн. Энэ хүрээнд өнгөрсөн онд 18,000 метр квадрат замын ажил гүйцэтгэсэн. Энэ онд 44,000 метр квадрат явган хүний замын бүтээн байгуулалтыг хийж гүйцэтгэнэ.

Улаанбаатар хотын Захирагчийн ажлын албанаас нийслэлийн 20 байршилд явган хүний зам барих шаардлагатай байршлуудын судалгааг гаргасан. 

Түрүүн дурдсанчлан Нийслэлийн зам хөгжлийн газрын 44,000 метр квадрат зам дээр Улаанбаатар хотын Захирагчийн ажлын албанаас 25,000 метр квадратыг нэмж хийж гүйцэтгэнэ. Өөрөөр хэлбэл, энэ онд нийслэлийн хэмжээнд 69,000 метр квадрат явган хүний замын бүтээн байгуулалт хийх төлөвлөгөө гаргасан. 

Нийслэлийн тохижилт бүтээн байгуулалтын ажил улирлын чанартай байдаг. Тохижилтын ажил гол төлөв тавдугаар сараас эхэлж, аравдугаар сарын 15-н хүртэл хүртэл үргэлжилдэг" хэмээн ярилаа. 

“Явган хүний зам тавихдаа эхлээд зураг төслөө гаргадаггүй нь нэг том алдаа”

Эх сурвалж: Л.Амарцэцэг, www.gogo.mn, 2023.05.02

"Төрийн байгууллагууд явган хүний замын ажлын төлөвлөлтийг зөв тодорхойлох ёстой. Эд хүйтрээд, газар хөлдөх үеэр замаа ухаж, хуулаад тавьчихдаг.  

Сонгон шалгаруулалт, зураг төсөл боловсруулалтын хугацаанаас шалтгаалж оны сүүлд багтааж юм хийсэн болж харагдах гэж замаа эвдээд, хуулаад тавьчихдаг. Энэ зөвхөн гүйцэтгэгч компанийн буруу биш.

Захиалагч зураг төсөл гаргуулахдаа эхлэлийн цэгээ зөв тодорхойлж, маш сайн мэдэж байх ёстой" хэмээн БХТ-ийн Магадлалын хэлтсийн дарга Э.Хангал явган замын хавтан, авто замын хашлагын төлөвлөлт, гүйцэтгэл ба хяналт сэдэвт хэлэлцүүлгийн үеэр хэллээ.

Тэрээр “Барилгын дүрэм, норм, технологийн дарааллыг хуульчилсан байдаг. Стандарт бол тухайн бүтээгдэхүүнд чиглэдэг. Явган замын хавтан, материалд тусдаа стандарттай. Хотын стандартын бичиг баримтууд хангалттай сайхан байна. Хамгийн гол нь үүнийг сурталчлах хэрэгтэй. Зураг төсөл боловсруулж буй хүмүүст танилцуулах, шаардлага тавих ёстой.  

Явган хүний замын хавтангийн ажлыг мэргэшсэн инженер хийнэ гэж байхгүй. Харин мэргэшсэн инженерийн хяналтад явагдана. Стандарт тодорхой, нээлттэй байх ёстой. Гэтэл зам, засварын ажил дууссаны дараа шаардаж, шахвал хүнд суртлын асуудал бий болж эдийн засагт хүндрэл учирна.

Хотын стандартын бичиг баримтууд хангалттай сайхан байна. Хамгийн гол нь үүнийг сурталчлах хэрэгтэй

Явган хүний замын ажлын төлөвлөлтийг зөв тодорхойлох хэрэгтэй байна. Эд хүйтрээд, газар хөлдөх үеэр замаа ухаж, хуулаад тавьчихдаг. Сонгон шалгаруулалт, зураг төсөл боловсруулалтын хугацаанаас шалтгаалж 12 сард багтааж юм хийсэн болж харагдах гэж замаа эвдээд, хуулдаг. Энэ зөвхөн гүйцэтгэгч компанийн буруу гэж болохгүй.  

Мөн зураг төслийн болон захиалагчийн нэг алдаа байна. Төлөвлөлт, сонгон шалгаруулалт явагдаад, санхүүжилт орсны дараа зураг төслөө гүйцэтгэдэг. Захиалагч зургийн даалгавар өгөхдөө  эхлэлийн цэгээ маш сайн мэдэж байх ёстой" гэлээ.

Дугуйн ба явган хүний зам тохижилтын хэлтсийн ахлах ажилтан У.Санчир “Нийслэлийн хэмжээнд явган  хүний 1064 км зам байдаг. Хийц бүтээцийн хувьд ихэнх хэсэг нь бетон, хавтан, байгалийн чулуу, бетон цутгалмаар хийгдсэн байдаг. Байгалийн чулуун хийцлэлтэй 70 мянган м2 талбай бүхий явган хүний замтай. Тухайн замуудад цаг агаарын байдлаас шалтгаалан халтиргаа гулгаа их үүсдэг.  

лаанбаатарын явган хүний замыг бетон хучилтаар хийх боломжтой юу гэвэл инженерийн байгууламж, дулааны шугам, хоолой газар доор байдаг тул боломжгүй байдаг. Харин тухайн замыг буцааж сэргээгдэхээр хавтан болон байгалийн чулуугаар нийслэлийн явган хүний замыг засаж, сайжруулж байна. Өнгөрсөн онд 18,000 метр квадрат замын ажил гүйцэтгэсэн. Энэ жил нийслэлд 69 мянган метр2 явган хүний зам хийж гүйцэтгэнэ.

Тохижилт, бүтээн байгуулалтад бараа материалын чанар, техник, технологийн хөгжил, аж ахуй нэгжүүдийн боловсон хүчний асуудал тулгарч байна. Явцын дунд улирлын чанартай мөн жолооч машинаа явган хүний зам дээр тавьдгаас эвдэрч байна.

Улаанбаатар хотын Захирагчийн ажлын албанаас нийслэлийн 20 байршилд явган хүний зам барих шаардлагатай байршлуудын судалгааг гаргасан” гэв.

Хэлэлцүүлгээр явган замын стандарт, яагаад жил болгон замын хашлагыг сольдог вэ,үүний цаана авлигын ямар нэг шалтгаан, нөхцөл байна уу, цаашид авлига үүсгэхгүй байхад яаж анхаарах вэ, явган замын стандарт, хяналтыг  сайжруулах талаар хэлэлцсэн юм.

Г.Ганбат: Үнэн хэрэгтээ явган хүний зам, замын хашлага чинь өөрөө авлигын соёл болчихлоо

Эх сурвалж: П.Сайнжаргал, www.ikon.mn, 2023.05.03

“Авто замын салбар дахь асуудал шийдэл: Явган замын хавтан, авто замын хашлагын төлөвлөлт, гүйцэтгэл ба хяналт” сэдэвт хэлэлцүүлэг өнөөдөр Авлигатай Тэмцэх Газар (АТГ)-ын байранд болсон юм. 

Энэхүү хэлэлцүүлэгт Барилгын Хөгжлийн Төв, Хотын стандарт, хяналтын газар, АТГ болон бусад холбогдох байгууллагын төлөөлөл оролцов. 

АТГ-ын Урьдчилан сэргийлэх, соён гэгээрүүлэх хэлтсийн ахлах ажилтан, ахлах комиссар Б.Тэрбиш: Сүүлийн жилүүдэд явган замын хавтан сольж байгаа үйл ажиллагаатай холбоотой иргэдийн өргөдөл, гомдол АТГ-ын 110 утсаар болон бичгээр их ирж байна.

Бодит жишээ яривал, Манлайбаатар Дамдинсүрэнгийн гудамжны авто замын тохижилтыг 2020 оны найм, есдүгээр сард гүйцэтгэсэн. Гэтэл хавтангууд нь шинээрээ байхад хүүхдийн хичээл эхлэхтэй зэрэг шинэ замыг хуулж эхэлсэн талаарх гомдол ирсэн. Иргэдийн зүгээс дөнгөж өмнөх жил нь сольсон хавтанг яагаад дахин засаж байгаа юм бэ гэх шүүмж хэлсэн. 

Түүнчлэн өмнөхөөс нь дордуулж тэгш бус гадаргуутай явган хүний зам тавьсан гэх асуудал байна. Энэ мэтчилэн замын хавтан, хашлагатай холбоотой маш олон жишээ бий. 

Явган хүний замын ажлыг хариуцаж, энэ чиглэлээр акц зохион байгуулж буй нэгжүүдийн авлигын эрсдэлийн түвшнийг харвал: 

Нийслэлийн ЗДТГ

Хот байгуулалт хөгжлийн газар дээгүүр байр эзэлж байна.

"Хэрэв авлигатай тэмцье, хариуцлага тооцъё гэвэл явган хүний замаас л эхлэх ёстой"

БХТ-ийн Магадлалын хэлтсийн дарга Э.Хангал: Явган хүний замын засварт захиалагч, гүйцэтгэгч аль аль тал хяналттай хандах нь чухал. Зураг төсөл, материал чанарын шаардлага хангаж байгаа эсэхийг хянах хэрэгтэй. Жишээлбэл, зураг төсөл дээрээ хөтөч хавтан нь харагддаг ч бодит байдалд хөтөч хавтангүй байх зэрэг асуудал бий. 

Хамгийн гол нь захиалагч зургийн даалгавар өгөхдөө хаанаас эхлэх вэ гэдгээ тодорхойлох ёстой.

АТГ-ын дэргэдэх олон нийтийн зөвлөлийн дарга Г.Ганбат: Бүх шатанд хяналт тавих хэрэгтэй байна. Хотын стандарт байгаа ч хяналтгүй, улмаар Улаанбаатар өнөөдөр галзуу хүний хот болсон шүү дээ. 

Үнэн хэрэгтээ явган хүний зам, замын хашлага чинь өөрөө авлигын соёл болчихлоо. Монголын 3.4 сая хүн өдөр болгон тэр замаар алхаж байгаа. Алхах болгондоо дотроо гаслаад л зүгээр хүлээн зөвшөөрөхөөс өөр аргагүй явж байна. Үүнд ямар ч хяналт, хариуцлага алга. Хэрэв авлигатай тэмцье, хариуцлага тооцъё гэвэл явган хүний замаас л эхлэх ёстой. 

Өнгөрсөн жил 5 их наяд төгрөгийн авлигыг АТГ илрүүлэн ажиллаж байна. Энэ бол Монгол Улсын төсвийн тал хэсэг. Замын хашлагаас эхлээд л ийм их авлигын асуудал байна гэсэн үг. 

"Сайн засаглал хэвлэлийн эрх чөлөөг боомилдоггүй"

Эх сурвалж: Э.Намуунцэцэг, www.ikon.mn, 2023.05.03

Өнөөдөр хэвлэлийн эрх чөлөөний өдөр. НҮБ-ын Ерөнхий ассемблей 1993 оноос жил бүрийн тавдугаар сарын 3-ны өдрийг "Дэлхийн хэвлэлийн эрх чөлөөний өдөр" болгон тунхагласан байдаг. 

НҮБ-ын Ерөнхий нарийн бичгийн даргын илгээлтэд "Дэлхийн өнцөг булан бүрд хэвлэлийн эрх чөлөө дайралтад өртсөөр байна. Худал мэдээлэл, үзэн ядалтын үг хэллэг нь үнэнийг гуйвуулж, бодит баримт ба зохиомж, шинжлэх ухаан ба нууц хуйвалдаан хоорондын заагийг бүдгэрүүлж байна.

Хэвлэл мэдээллийн салбар цөөн хэдэн хүмүүсийн гарт төвлөрч, бие даасан хараат бус мэдээний агентлаг байгууллагууд санхүүгийн чадавхгүй болж, сэтгүүлчдийг барих нухчин дарах гэсэн хууль дүрэм журам нэмэгдэж байгаа. Энэ нь олон нийтийн мэдээлэл авах, үг хэлэх, үзэл бодлоо илэрхийлэх боломжийг улам бүр хязгаарлах, хяналт тогтоохыг оролдож байна" хэмээн тэмдэглэжээ.

Манай улс уг өдрийн хүрээнд Монголын Сэтгүүлчдийн Нэгдсэн Эвлэл болон бусад байгууллага хамтран "Хүний эрхэд суурилсан ирээдүйг бүтээх нь: Үзэл бодлоо илэрхийлэх эрх чөлөө хүний эрхийн хөшүүрэг" сэдэвт форум зохион байгуулсан юм. 

Үргэлжлүүлэн Хэвлэлийн эрх чөлөөний төлөөх нэгдсэн акцыг Д.Сүхбаатарын талбайд хэвлэл мэдээллийн салбарынхан, хүний эрхийн байгууллагууд хамтран хийсэн байна. 

Тэд "Сайн засаглал хэвлэлийн эрх чөлөөг боомилдоггүй", "Хэвлэн нийтлэх эрх чөлөө үгүй бол бусад эрхээ хамгаалах боломжгүй", "Үг хэлэхгүй бол үзэл бодолгүй, Үзэл бодолгүй бол эрх чөлөө үгүй" зэрэг уриа барьсан байв.