Эх сурвалж: Нийслэлийн хөрөнгө оруулалтын газар, 2021.08.31
Нийслэлийн Хөрөнгө оруулалтын газраас захиалагчийн техник хяналт хийсэн Сонгино Хайрхан дүүргийн 22 дугаар хороонд түлхүүр гардуулах гэрээний нөхцөлтэй 150 хүүхдийн багтаамжтай цэцэрлэгийн барилгын ажил дуусч, ашиглалтад оруулахаар ажиллаж байна.
Гүйцэтгэгч байгууллага: Түмэн алт ХХК
Эх сурвалж: Т.Саран, www.ikon.mn, 2021.08.30
Улаанбаатар хотын хоёр дахь “Өглөөний гудамж”-ийн нээлт өнөөдөр боллоо.
Энэ талаар Сүхбаатар дүүргийн Засаг даргын Тамгын газрын хэвлэл мэдээллийн ажилтнаас тодруулахад "Энэхүү гудамж нь номын сантай. Ажлын зар байршуулж болно.
Иргэддээ зориулан Сүхбаатар дүүргийн Засаг даргын Тамгын газраас эрүүл аюулгүй орчныг бүрдүүллээ. Модоо ашиглаад сандал, хогийн сав хийсэн. Зарим нэг аж ахуйн нэгж олж авсан зүйлээ байршуулах уут зүүхийг дэмжиж хэрэгжүүлж эхлээд байна" гэлээ.
“Өглөөний гудамж”-ийг нийтийн эзэмшлийн 600м2 талбайд богино хугацаанд орчин үеийн шийдлээр тохижуулжээ. Байгальд ээлтэй байлгах, хог хаягдлыг багасгах, хуванцар савны хэрэглээг багасгах зорилгоор уух зориулалттай цэвэршүүлсэн усны цорготой, иж бүрэн гэрэлтүүлэгтэй, моднуудын дор сандалтай, номын булантай, үнэгүй интернэт ашиглах боломжтой орчин бүрдүүлсэн байна.
"Өглөөний гудамж" нь Жамъян гүний гудамж буюу Blue Sky-н урд талд байрлалтай. /Ийгл телевизтэй байр, хуучнаар Бамбарууш кафе хоёрын дунд гудамж/
Эх сурвалж: А.Жаргал, www.ikon.mn, 2021.08.30
Дэлхийн банкны санхүүжилтээр хэрэгжиж буй “Улаанбаатар хотын Цэвэр агаар Нэмэлт Санхүүжилтийн Төсөл” (УБЦАНСТ) нь Улаанбаатар хотын агаарын чанарыг сайжруулах, ногоон хөгжлийг дэмжих чиглэлээр Mонгол Улсын Засгийн газар болон Нийслэлийн Засаг даргын 2020-2024 оны мөрийн хөтөлбөрт тусгагдсан арга хэмжээнүүдийг хэрэгжүүлэхэд дэмжлэг үзүүлэх зорилготой.
“Барилгын дулааны шинэчлэл” хөтөлбөр энэ жилээс хэрэгжиж эхэлсэн бөгөөд уг хөтөлбөрийн хүрээнд 2021-2023 онуудад нийслэлийн 9 сургууль, цэцэрлэг болон 15 угсармал орон сууцны блокийг дулаалахаар төлөвлөөд байна. 2021 онд газар хөдлөлийн тэсвэртэй байдлын үнэлгээ хийгдсэн, дулаан алдагдал ихтэй дараах орон сууцны болон олон нийтийн барилгуудад дулаан хамгаалалтын шинэчлэлтийн ажлыг хийхээр төлөвлөн ажиллаж байна. Үүнд:
• Чингэлтэй дүүргийн 83 дугаар цэцэрлэг;
• Баянгол дүүргийн 114 дүгээр цэцэрлэг;
• Баянгол дүүргийн 133 дугаар цэцэрлэг;
• Чингэлтэй дүүргийн 37 дугаар сургууль;
• Сонгинохайрхан дүүргийн 18 дугаар хорооны 10 дугаар байр;
• Сонгинохайрхан дүүргийн 18 дугаар хорооны 15 дугаар байр;
• Сонгинохайрхан дүүргийн 19 дүгээр хорооны 8Б дугаар байр;
• Баянгол дүүргийн 13 дугаар хорооны 2А дугаар байр
Энэхүү ажлын үр дүнд 3500 орчим хүүхэд, багш, ажиллагсад, 290 гаруй айл өрх дулаан байрандаа ая тухтай сурах, ажиллах, амьдрах боломж бүрдэнэ.
Эх сурвалж: Т.Өлзийбаяр, www.ikon.mn, 2021.08.30
БЗД-ийн 18 дугаар хороо 84 дүгээр сургуулийн өмнөх 53 тоосгон гараашийг буулгах ажлыг эхлүүлжээ.
Энэ талаар БЗД-ийн газрын албаны ахлах мэргэжилтэн Д.Энхтөр "Дуудлага худалдаа зарлаж гарааш бариагүй. Ямар ч нөхөн төлбөр яригдахгүй. Зөвшөөрөлгүй газарт нөхөн олговор олгох хуулийн заалт байхгүй. Гарааш эзэмшигч иргэд газар ашигласны төлбөр 10 гаруй мянган төгрөгийг жил бүр төлдөг байсан. Хоёр жилийн өмнөөс тухайн төлбөрийг авахаа больсон юм.
84 дүгээр сургуулийн өмнөх 53 тоосгон гараашийг буулгаж, ногоон байгууламж, авто зогсоол, явган хүний зам барина. Гараашуудыг буулгасны дараа дүүргийн тохижилт үйлчилгээний хэлтсээс дараагийн ажлаа эхэлнэ.
Тухайн объект дээр шаардах хуудас наасан. Гарааш эзэмшигч иргэд ямар нэгэн бүртгэлгүй учраас хүн бүртэй холбогдох боломжгүй. Эд хөрөнгийг бүртгэлжүүлж аваад газар чөлөөлөх үйл ажиллагааг зохион байгуулж байна" хэмээн тайлбарлав.
