“Паркаа аваръя” хөдөлгөөнөөс НИТХ-ын дарга Ж.Батбаясгаланд шаардлага хүлээлгэн өгөв

 Эх сурвалж: gogo.mn, 2022.01.31

Нийслэлийн Иргэдийн Төлөөлөгчдийн Хурлын дарга Ж.Батбаясгалан өнөөдөр “Паркаа аваръя хөдөлгөөн”-ий үүсгэн байгуулагч Д.Мөнх-Эрдэнийг хүлээн авч уулзлаа.

Тус хөдөлгөөнөөс хүүхдийн паркийн газрыг одоогийн эзэмшигчдээс буцаан авч, нийслэлийн иргэдийн мэдэлд ирүүлэх асуудлаар Нийслэлийн ИТХ-ыг хуралдуулах шаардлагыг тавив.

Нийслэлийн ИТХ-ын тэргүүлэгчдээс 2021 оны дөрөвдүгээр сарын 14-ний өдөр “Үндэсний соёл амралтын хүрээлэн” ХХК-ийн эзэмшил газрыг зөвхөн хүүхэд, залуучуудын хөгжлийг дэмжих, чөлөөт цагаа зөв боловсон өнгөрүүлэх амралт, зугаалгын зориулалтаар ашиглуулах талаар судалж, санал боловсруулах үүрэг бүхий ажлын хэсгийг байгуулан, ажиллаж байна.

Эх сурвалж: НИТХ

БЗД-т дулааны шугам гэмтэж, айл өрхүүд халаалт, хэрэглээний усгүй болжээ

Эх сурвалж: gogo.mn, 2022.01.28

Нийслэлийн Баянзүрх дүүргийн 5 дугаар хороо Кино үйлдвэр орчимд дулааны шугамд гэмтэл гарсны улмаас айл өрхүүд халуун ус, халаалтгүй болжээ. 

Тус хорооны замын зорчих хэсгийг хааж, эвдрэл гэмтлийг засварлахаар ажиллаж байна. 

Бүгд Найрамдах Энэтхэг Улс байгуулагдсаны 73 дахь ойн баярыг тэмдэглэв

Эх сурвалж: gogo.mn, 2022.01.28

Монгол Улс дахь Энэтхэгийн Элчин Сайдын яам Бүгд Найрамдах Энэтхэг Улс байгуулагдсаны 73 дахь ойг тэмдэглэжээ.

БНЭУ-ын Элчин Сайдын Яам Үндэсний их баяр наадмыг тэмдэглэн өнгөрүүлдэг уламжлалын дагуу Бүгд Найрамдах Улс тунхагласны 73 дахь өдрийг эх оронч үзлээр тэмдэглэсэн байна.

ЭСЯ-ны байранд Төрийн далбаа мандуулсны дараа Элчин сайд Сингх цугларсан зочдод хандан, Улсын Онцгой Комиссоос тогтоосон, халдвар хамгааллын уламжлалыг мөрдөж, Энэтхэгийн Ерөнхийлөгчийн ард түмэнд хандан илгээсэн үгийн хэсгээс уншжээ. Дараа нь гуравдагч хөрш болох 'Монгол Улстай Энэтхэгийн Оюун санааны, "Стратегийн түншлэл"-ийн бат бөх байдлын талаар тэмдэглэн үг хэллээ.

Энэтхэгийн Ерөнхийлөгч хэлсэн үгэндээ ардчилсан уламжлалыг баримталсан засаглалын дүрэмд тусгагдсан Энэтхэгийн Үндсэн хууль үргэлж хамааралтай байдгийг дурдаж, Энэтхэгийн янз бүрийн салбар дахь ололт амжилт, Засгийн газраас ялангуяа жендэрийн тэгш байдлыг хангах, нийгэм, эдийн засгийн сорилттой тэмцэх, зохицуулах чиглэлээр хэрэгжүүлж буй үр дүнтэй арга хэмжээг онцлов.

Энэтхэгийн Элчин Сайдын Яаманд болсон арга хэмжээнд монгол оюутнууд "Ванде Матрам" дууг эгшиглүүлжээ.

Элчин сайдын яаманд болсон ёслолын дараа зочид Сүхбаатарын талбайд очин хоёр долоо хоногийн өмнө Сүхбаатрын талбайд байрлуулсан Мөсөн  "Таж Махал"-ын хөшөөний том хуулбарыг үзсэн байна. Энэ хөшөөг Цагаан сарын дараа хүртэл дэлгэнэ.

Зочид дараа нь Шинэ Дели хотоос Бүгд Найрамдах Улсын баярын жагсаалын 90 минутын шууд дамжуулалтыг том дэлгэцээр үзэж, Энэтхэгийн төрийн далбааг мандуулсан цэргийн сүр хүч, 75 агаарын хөлгийн агаарын шоу, Энэтхэгийн соёлын гайхамшигт олон янз байдлыг харуулсан үзүүлбэрүүдийг үзсэн байна.

Орон сууцгүй 1000 багш тус бүрд 10 сая төгрөгийн тусламж олгохыг шаарджээ

Эх сурвалж: gogo.mn, 2022.01.28

Монголын Багш нарын Үйлдвэрчний Эвлэлийн Холбооны дарга Д.Мөнхбаатар БШУЯ-ны Төрийн нарийн бичгийн дарга Л.Цэдэвсүрэнд хандан дараах шаардлагыг хүргүүлжээ.

"Монголын Багш нарын Үйлдвэрчний Эвлэлийн холбоо нь боловсролын салбарт МУ-ын Үндсэн хуувьд заасан хүний эрхийг дээдлэх, хууль дээдлэх ёс, шударга байдал, тэгш эрхийн зарчмыг хэрэгжүүлэхийн төлөө идэвхтэй үйл ажиллагаа явуулдаг. Иймээс дараах шаардлагуудыг хүргүүлж байна.

1. 2020 оны 12-р сард тус яамны 110 албан хаагчийн эрүүл мэндийн урьдчилсан сэргийлэх үзлэгийг Сөүл сениорс товер ХХК-ийн Сонгдо эмнэлэгт 26 сая 444 мянган төгрөгийн өртгөөр хийлгэжээ. Энэ нь нэг албан хаагчид дунджаар 240 мянган төгрөг оногдож байна. Яамны зүгээс ажилтнуудынхаа эрүүл мэндэд анхаарсан сайн жишгийг дэмжинэ. Гэвч боловсролын салбарын нийт ажилтан, алба хаагчид ийм хөнгөлөлт, дэмжлэгийг хүртэж чадахгүй байгаа нь үндсэн хуулийн тэгш эрхийг зөрчсөн. Иймд энэ оны эхний улиралд багтаан салбарын багш албан хаагчдыг хувийн эмнэлэг болон гурав дахь шатлалын улсын эмнэлэгт 240 мянган төгрөгөөс доошгүй өртөг бүхий эрүүл мэндийн үзлэг, шинжилгээнд хамруулахыг шаардаж байна.

2. Мөн дээрх хугацаанд яамны нэр бүхий 15 албан хаагчид орон сууцны дэмжлэг нэрийн дор 10-40 сая төгрөг олгожээ. Эдгээр алба хаагчдын АТГ-т мэдүүлсэн хөрөнгө орлогын мэдүүлгийг нягтлан үзэхэд дийлэнх нь орон сууцтай болох нь тогтоогдож байгаа нь албан тушаалын давуу байдал бий болгосон байх үндэслэлтэй. Манай холбооноос багш, ажилтнуудыг орон сууцад хөнгөлөлттэй нөхцөлөөр хамруулахыг шаардаж байсан ч шийдвэрлэж өгөөгүй хэр нь яамны алба хаагчдад давуу эрх олгосон нь ялгаварлан гадуурхалтыг бий болгож, үндсэн хууль зөрчсөн үйлдэл болох нь харагдаж байна. Иймээс энэ оны эхний улиралд багтаан өөрийн гэх орон сууцгүй мянган багшид тус бүрд 10-аас доошгүй сая төгрөгийн мөнгөн тусламж олгохыг шаардаж байна.

3. БШУЯ-ны дансыг үзэхэд 2016 оноос хойш НҮБ, түүний төрөлжсөн байгууллагуудаас ихээхэн хэмжээний тусламж, дэмжлэг үзүүлж, төсөл хөтөлбөр хэрэгжүүлсэн байх бөгөөд тэдгээрийн тайлан, түүнийг хэрхэн зарцуулсан нь тодорхой бус байна. Иймд НҮБ болон тэдгээр байгууллагуудаас үзүүлсэн хандив тусламжийн санхүүгийн зарцуулалтын тайланг тус бүр бичгээр гаргаж өгнө үү" гэжээ.

Агаарын бохирдолтой тэмцэх, эрчим хүч, усны хангамж сайжруулах ЖАЙКА-гийн төслүүд

Эх сурвалж: gogo.mn, 2022.01.28

Япон улсын ЖАЙКА байгууллага Монголд эрчим хүчний салбарт тулгамдсан асуудлуудыг шийдвэрлэхэд тусалж, дэмжлэг үзүүлсээр ирсэн билээ. Тухайлбал, 1992 оноос хойш Монгол улсын хамгийн их хүчин чадалтай Дулааны 4-р цахилгаан станцад

Япон мэргэжилтэн, сайн дурын гишүүд илгээх

буцалтгүй тусламжаар 2013 оноос иенийн хөнгөлөлттэй зээлээр ДЦС 4-ийн үр ашгийг нэмэгдүүлэх төслийг хэрэгжүүлж,

турбины тохируулах системийг шинэчлэн,

хяналт удирдлагын системийг автоматжуулах зэрэг ажлыг хийж, станцын горим, найдвартай ажиллагааг дээшлүүлж, улмаар цахилгаан эрчим хүчний найдвартай байдлыг ханган, нийгэм эдийн засгийн хөгжилд дэмжлэг үзүүлсэн байна.

ИТОЧҮ Корпорацийн Улаанбаатар дахь төлөөлөгчийн газрын захирал Шимада Акиюки:

“1990-ээд оноос Япон улсын ХАЁТ буюу буцалтгүй тусламж, иений хөнгөлөлттэй зээлээр 4 удаагийн төслийг ДЦС-4 ТӨХК дээр хэрэгжүүлсэн. Үүнээс Иточү корпорац нь Мицүбиши хүнд үйлдвэр корпорацтай хамтран гурван төсөл дээр ажилласан” гэлээ.

ЖАЙКА нь Монгол улсын эрчим хүчний  нийлүүлэлтийг нэмэгдүүлэх, эх үүсвэрийг төрөлжүүлэх буюу сэргээгдэх эрчим хүчний хэрэглээг нэмэгдүүлэх зорилгоор Өмнөговь аймгийн Цогтцэций суманд Монгол улсын хоёр дахь салхин цахилгаан станцыг барьж, ашиглалтад оруулсан байна.  Ньюком компани болон Япон улсад сэргээгдэх эрчим хүчийг хөгжүүлж буй Softbank  группийн охин компани болох SB Energy  компанийн хувь нийлүүлэн байгуулсан Clean Energy Asia компанид Европын сэргээн босголтын банк болон ЖАЙКА-гийн хамтарсан хөрөнгө оруулалт хийж эрчим хүчний салбар дахь анхны хилийн чанад дахь хувийн хэвшлийн хөрөнгө оруулалтын төслийг хэрэгжүүлжээ.

Клин Энержи Ази ХХК-ийн Гүйцэтгэх захирал Р.Мягмар:

“Цэций салхин цахилгаан станц нь 2017 оны аравдугаар сараас ажиллаж эхэлсэн ба 50 мегаватт буюу Монгол Улсын эрчим хүчний хэрэглээний 5 хувьтай тэнцэх хэмжээний цахилгаан эрчим хүчийг үйлдвэрлэдэг. Энэ нь байгальд ээлтэй, жилд 200 гаруй мянган  тонн нүүрс, 1.5 сая тонн ус хэмнэдэг төсөл” гэдгийг хэллээ.

Хөдөө аж ахуй, Эрчим хүч, Уул уурхайн салбар хариуцсан ажилтан Накамүра Кэйго /Ph.D/:

“ЖАЙКА-гийн зүгээс агаар болон усны бохирдол, хог хаягдлын менежментийг сайжруулах чиглэлээр дэмжлэг үзүүлсээр ирсэн. Түүнчлэн уур амьсгалын өөрчлөлтийн чиглэлээр мөн хамтын ажиллагааг хэрэгжүүлж байна” гэж  хэллээ.

Байгаль орчны салбарын 2 төсөл

    "Агаарын бохирдлын хяналтын чадавхыг бэхжүүлэх төсөл"

    "Улаанбаатар хотын ундны усыг нэмэгдүүлэх -Гачуурт эх үүсвэр төсөл”

Цэвэр усны хангамж

Усны хангамжийг сайжруулах, ЖАЙКА-гийн төсөл хэрэгжих хүртэл гэр хороололд усны хангамж хүрэлцэхгүй, зарим тохиолдолд эрүүл ахуйн шаардлага хангаагүй ус ашиглахаас өөр аргагүйд хүрэх асуудлууд тулгарч байсан бөгөөд Улаанбаатар хотын усан хангамжийн хүчин чадлыг нэмэгдүүлэх зайлшгүй шаардлага тулгарсан байна.

Төслийн хүрээнд Улаанбаатараас 26 км-ын зайд орших Гачууртын эх үүсвэрийг шинээр байгуулсан бөгөөд төслийн үр дүнд Ус Сувгийн Удирдах Газрын тоног төхөөрөмжийн хүчин чадал сайжрахын хамт Улаанбаатар хотын иргэд ялангуяа гэр хорооллын 390 мянга гаруй иргэн болон орон сууцанд амьдардаг 43500 гаруй оршин суугчийн цэвэр, аюулгүй усаар хангах боломжийг бүрдүүлсэн байна.

Агаарын бохирдол

Улаанбаатар хотын тулгамдсан асуудлуудын нэг бол агаарын бохирдол. Агаарын бохирдлын хяналтын чадавхийг бэхжүүлэх зорилгоор хэрэгжсэн нэг, хоёрдугаар шатны төслийн хүрээнд:

Нийслэлийн агаарын бохирдлыг бууруулах газар болон бусад холбогдох байгууллагуудын боловсон хүчний чадавхийг бэхжүүлж,

агаарын чанарын хяналтын тогтолцоо, техник тоног төхөөрөмжийн хангамжийг сайжруулах чиглэлээр амжилттай ажиллажээ.

Мөн иргэдэд мэдээлэл хүргэх зорилгоор тодорхой цэгүүдэд дэлгэц байрлуулан суурин харуулын хэмжилтийг шууд харуулах нөхцөлийг бүрдүүлсэн.

Одоо хэрэгжиж буй гуравдугаар үе шатанд агаарын бохирдлыг бууруулах илүү бодит, үр дүнтэй арга хэмжээг хэрэгжүүлэхэд чиглэсэн дэмжлэгийг үзүүлэхээр ажиллаж байна.

Нийслэлийн агаарын бохирдолтой тэмцэх газрын Агаарын чанар, хяналт, зохион байгуулалтын хэлтсийн дарга Т.Даваажаргал:

“Төсөл хэрэгжихээс өмнө манай байгууллагын агаарын бохирдлыг хэмжих эх үүсвэрүүд учир дутагдалтай, багаж, тоног төхөөрөмж, хүний нөөцийн чадамжийн хувьд сул талтай байсан” гэв.

2010 оноос төсөл хэрэгжиж эхэлснээр:

Олон улсын стандарт шаардлагад нийцсэн багаж, тоног төхөөрөмжтэй болсон.

Багаж, тоног төхөөрөмжийг ажиллуулдаг боловсон хүчнүүд Япон болон Монголд урт ба дунд хугацааны сургалтад хамрагдсан

Агаарын бохирдлыг хэмжих иж бүрэн лабораторитой болсон

Лаборатори, боловсон хүчнийхээ чадавхыг ашиглан агаарын бохирдлын эх үүсвэр тус бүрд хэмжилт хийж хэмжилтийн дүнг үндэслэн агаарын бохирдлыг бууруулах байгаль орчны бодлогыг тодорхойлох, гүйцэтгэх ажлуудыг хийж гүйцэтгэж байна.

Ухаалаг аюулгүй хотыг бий болгоё

Эх сурвалж: gogo.mn, 2022.01.28

Их хотын бөөгнөрлөөс үүдэн хүн амын аюулгүй байдлыг хамгаалах, болзошгүй эрсдэлийг урьдчилан мэдэж шийдвэрлэх, ухаалгаар эрсдэлийг бууруулах хэрэгцээ шаардлага нэн тэргүүнд байдаг.

Энэхүү асуудлыг технологийн тусламжтайгаар дэлхийн бусад улс орнууд шийдвэрлэж чадсан юм. Ухаалаг хяналтын камер дээр суурилсан аналитик, нэмэлт программууд хосолсноор амар тайван нийслэл хотыг бүрдүүлэх ба болзошгүй эрсдэлийг бууруулах боломжийг олгох юм.

Axis брэндийн хяналтын камерын төрлүүд нь хэрэглээнээсээ хамааран 11 нэр төрөл байдаг. Үүн дээр IP сүлжээний зарлан мэдээлэх системийг уялдуулснаар аюулгүй, ухаалаг хотыг бий болгох боломж бүрдэх юм.

Нэг хяналтын камер дээр дараах 8 төрлийн ухаалаг аналитикийг хийх боломжтой.

Ингэснээр цаг хугацаа, эдийн засгийн хувьд өгөөжтэй бөгөөд дараах байдлаар нийтийн эзэмшлийн зам талбайд байгаа камерыг илүү ухаалгаар ашиглах боломжтой юм.

Дээрх ухаалаг аналитикийг нэвтрүүлэн байгаль орчин, хотын аюулгүй байдлаа ухаалгаар шийдвэрлэх боломж бүрдэж байна.

“Таван Богд Солюшнс” ХХК нь “Axis” брэндийн албан ёсны “Solution Gold Partner” эрхтэй компани юм.

Тэдэнтэй холбогдох: 7500-7777 (2)

Вэбсайт: https://tbsolutions.mn/

Facebook: https://www.facebook.com/TavanBogdSolutions

Нийтийн тээврийн автобусны "Хөдөлмөрийн аварга жолооч"-ийг тодруулав

Эх сурвалж: gogo.mn, 2022.01.28

Нийтийн тээврийн үйлчилгээ эрхлэгч аж ахуй нэгжүүдийн  үйлчилгээний соёл, чанар, хөдөлгөөний аюулгүй байдлыг ханган салбараа хөгжүүлэх үйлсэд идэвх зүтгэл, үр бүтээлтэй ажилласан 2021 оны хөдөлмөрийн аварга байгууллага, албан хаагчдаа тодрууллаа.

2021 оны Хөдөлмөрийн аварга байгууллагаар:

“Зорчигч тээврийн нэгтгэл" ОНӨААТҮГ, 

"Тэнүүн-Огоо" ХХК,

Хөдөлмөрийн аварга инженер техникийн ажилтнаар 

“Зорчигч тээврийн нэгтгэл” ОНӨААТҮГ-ын  А.Даваасүрэн , Т.Энхсаруул,

Хөдөлмөрийн аварга засварчнаар:

“Зорчигч тээврийн нэгтгэл” ОНӨААТҮГ-ын  Р.Даваасүрэн ,

"Тэнүүн-Огоо" ХХК-ны Б.Лхагвасүрэн,

Хөдөлмөрийн аварга жолоочоор:

“Зорчигч тээврийн нэгтгэл” ОНӨААТҮГ-ын С.Батчулуун, 

"Автобус нэгдэл" ХХК-ны Д.Гантулга,

Хөдөлмөрийн аварга шалгагчаар:

"Сити баз консалтинг" ХХК-ны  Б.Цэцэгмаа, Б.Энхжаргал нар тус тус шалгарлаа.

Эх сурвалж: Нийтийн тээврийн газар

2022 оныг “Хотын иргэний жил” болгоно

 Эх сурвалж: gogo.mn, 2022.01.28

Нийслэлийн Засаг даргын зөвлөлийн хурал өнөөдөр боллоо. Хурлаар 2022 оныг “Хотын иргэний жил” болгон зарлах тухай асуудлыг хэлэлцжээ. Нийслэлийн Засаг дарга бөгөөд Улаанбаатар хотын Захирагчийн 2020-2024 оны үйл ажиллагааны хөтөлбөр, Нийслэлийг 2021-2025 онд хөгжүүлэх таван жилийн үндсэн чиглэл, Нийслэлийн хөгжлийн 2022 оны төлөвлөгөө болон бусад холбогдох баримт бичиг, стратеги төлөвлөгөөг хэрэгжүүлэх зорилгоор энэ оныг “Хотын иргэний жил” болгон зарлах саналыг гаргаад байгаа юм. Нийслэл Улаанбаатар хотын зүгээс 2022 онд хотын иргэдэд боловсрол олгох, соёлыг төлөвшүүлэх, орлогыг нэмэгдүүлэх, амьдрах орчныг сайжруулах, эрүүл мэндийг анхаарах, аюулгүй байдлыг хангах чиглэлээр ажиллах юм.

2022 онд зургаан зорилтыг дэвшүүлэн, иргэд олон нийт рүү чиглэсэн арга хэмжээг хэрэгжүүлэхээр төлөвлөөд байгаа талаар Нийслэлийн Ерөнхий архитектор Н.Нацагдорж танилцууллаа. Тодруулбал, “Хотын иргэний мэдлэг боловсрол”, “Хотын иргэний соёл”, “Хотын иргэний орлого”, “Хотын иргэний орчин”, “Хотын иргэний эрүүл мэнд”, “Хотын иргэний аюулгүй байдал” зэрэг зорилтуудыг дэвшүүлсэн байна. Ингэхдээ хоёр сар тутамд нэг зорилтыг хэрэгжүүлэн ажиллахаар тооцоолжээ.

Тухайлбал, нэг болон хоёрдугаар сард “Хотын иргэний мэдлэг боловсрол” зорилтыг хэрэгжүүлэх бөгөөд энэ хүрээнд  иргэдэд хууль, эрх зүйн мэдлэг, мэдээлэл олгох, төрийн үйлчилгээний шинэчлэлийн чиглэлээр төрийн албан хаагчдын соёлтой харилцааг хэвшүүлэх, төрийн үйлчилгээг цахимд шилжүүлэх чиглэлээр зарим арга хэмжээг зохион байгуулах боломжтой. Мөн шаардлагатай байршлуудад сургууль, цэцэрлэгийн тоо, хүртээмжийг нэмэгдүүлэн, менежментийг шинэчлэн сайжруулах тухай танилцуулсан юм.

Харин гурав болон дөрөвдүгээр сарыг иргэний соёлын сар болгон зарлаж, автобусны буудлыг тохижуулан, тоог нэмэгдүүлэх, авто зогсоолын менежментийг сайжруулах болон бусад чиглэлээр хэд хэдэн арга хэмжээ зохион байгуулах аж. Нийслэлийн хэмжээнд 1081 нийтийн тээврийн зогсоол байгаа бөгөөд иргэдийн 51 хувь нь автобусаар зорчдог гэсэн судалгаа гарсан. Иймд автобусны зогсоолыг тодорхой стандартын дагуу шинэчлэх шаардлагатай. Харин авто зогсоолын нэгдсэн системийг бий болгож, стандарт хангасан төрөлжсөн авто зогсоолын тоог нэмэгдүүлэх чиглэлээр шаардлагатай судалгааг хийгээд байна.

Тав болон зургаадугаар сард хотын иргэний орлогыг дэмжих чиглэлээр арга хэмжээ зохион байгуулах талаар танилцууллаа. Ингэхдээ гудамж, зам, талбайд худалдаа, үйлчилгээ эрхлэх боломжийг хангаж, иргэд чөлөөт цагаа зөв боловсон өнгөрөөх амралт зугаалгын орчныг бүрдүүлэхэд анхаарч байгаа юм. Энэ хүрээнд нийслэлийн есөн дүүргийн 31 байршилд хамаарах 12.211 ам метр талбайд худалдаа, үйлчилгээ эрхлэх боломж бололцоог бүрдүүлэхээр шаардлагатай судалгааг хийгээд байгаа аж.

Нийтийн эдэлбэр гудамж, зам, талбайд худалдаа, үйлчилгээ эрхлэх орчин нөхцөлийг бий болгосноор хөдөлмөр эрхлэлтийг дэмжиж, иргэний орлогыг нэмэгдүүлэхэд тодорхой хэмжээний дэмжлэг болно гэж үзэж буй. Энэ мэтчилэн хоёр сар тутамд тодорхой зорилтыг дэвшүүлэн, зорилтот арга хэмжээнүүдийг зохион байгуулахаар танилцууллаа. Зөвлөлийн хурлын гишүүдийн зүгээс дээрх зорилтуудад нэг бүрчлэн анхаарч, гэр хорооллын бүсийг орхигдуулахгүй байх, төр-хувийн хэвшлийн түншлэлийг сайжруулан, дээрх арга хэмжээнүүдэд хамтран ажиллах, уг зорилтот жилийг ирэх онуудад улам сайжруулан, үргэлжлүүлэх саналтай байгаагаа илэрхийлж байлаа. Ийнхүү  2022 оныг “Хотын иргэний жил” болгон зарлах тухай асуудлыг хэлэлцэн зөвлөлийн гишүүд дэмжиж буйгаа илэрхийлсэн юм.

Эх сурвалж: Ulaanbaatar.mn

Ногоон байгууламжийг арчилж, ургуулах талаар Үндэсний цэцэрлэгт хүрээлэнгээс сургалт явуулна

Эх сурвалж: gogo.mn, 2022.01.28

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд ногоон байгууламжийн цогц сургалтыг нийслэлийн есөн дүүргийн холбогдох байгууллагынханд зохион байгууллаа.

Тодруулбал, тус сургалтыг нийслэлийн ногоон байгууламжийн 23 хувийг бүрдүүлдэг “Үндэсний цэцэрлэгт хүрээлэн” ОНӨТҮГ-ын мэргэжлийн, мэргэшсэн инженерүүдээс бүрдсэн баг нэгдүгээр сарын 12-25-нд цахим, танхимын хэлбэрийг хослуулан, халдвар хамгааллын дэглэмийг сахин зохион байгуулсан юм.

Дүүргүүдийн ЗДТГ-тай хамтарсан тус сургалтаар модны үр, тарьц суулгац бэлдэх, мод үржүүлгийн газар байгуулах, модыг зөв тарьж, арчлан ургуулах тухай болон цэцэг, зүлэг тарих, ногоон байгууламж бүтээх, цэцэрлэгт хүрээлэн бий болгох төлөвлөлт, ногоон байгууламжийн дөрвөн улирлын арчилгаа зэрэг цогц мэдлэг мэдээллийг холбогдох албан хаагчдад олголоо. 

Тэрбумаар тоологдох мод тарихын тулд иргэдэд экологийн боловсрол олгож, удирдан зохион байгуулах ажилчдад ногоон байгууламжийн талаарх мэдлэгийг бүрэн дүүрэн олгох нь нэн чухал юм. Иймд 12 жилийн ажлын туршлагатай, Монголын цорын ганц цогцолбор цэцэрлэгт хүрээлэн болох “Үндэсний цэцэрлэгт хүрээлэн” ОНӨТҮГ энэхүү сургалтыг  бүх аймаг, нийслэлийн  хэмжээнд  хийх  зорилт тавин ажиллаж байна.

Цар тахалтай зэрэгцэж өрнөсөн бүтээн байгуулалт

Эх сурвалж: gogo.mn, 2022.01.27

Өнгөрсөн жилийн хугацаанд цар тахлын улмаас дэлхий даяар бүтээн байгуулалтын төслүүд зогсож, хүнд хохирол амссан цаг үе байсан. Цар тахлын нөхцөл байдлаас болж хүндрэлтэй цаг үе тохиосон ч Нийслэлийн шинэ удирдлагын баг өнгөрсөн нэг жил нөхцөл боломжоо дайчлан ажиллажээ.

Сургууль, цэцэрлэг буюу хүүхэд, өсвөр үед чиглэсэн бүтээн байгуулалт

Сургууль, цэцэрлэгийн хүрэлцээг нэмэх чиглэлд анхаарч, сургууль, цэцэрлэгийн барилгуудыг шинээр барьж, стандартад нийцүүлэх замаар хүүхдүүдэд сургуулийн орчноос ирдэг нөлөөллийг эерэг болгохыг зорьсон байна.

Өнгөрсөн нэг жилийн хугацаанд нийслэлд (2020 оны IV улирлаас 2021 оны гуравдугаар улирал) найман сургууль, нэг сургуулийн өргөтгөл ашиглалтад оров. Цэцэрлэгийн тухайд (2020 оны IV улирлаас 2021 оны III улирал) 23 цэцэрлэг, дөрвөн цэцэрлэгийн өргөтгөл ашиглалтад орлоо.

Авто зам, гэр хорооллын дахин төлөвлөлт буюу насанд хүрэгчдэд чиглэсэн бүтээн байгуулалтууд

Оргил цагуудад авто зам дээр үүсдэг түгжрэл, өвлийн улиралд үүсдэг утаа үүнд том хувь нэмэр оруулж буй. Энэхүү нөлөөллийг бууруулах чиглэлээр нийслэлээс өнгөрсөн нэг жилийн хугацаанд авто замын сүлжээг өргөтгөх, гэр хорооллыг дахин төлөвлөж барилгажуулах чиглэлээр багагүй ажлыг хийсэн байна.

2021 оны 11 дүгээр сарын 04-ний өдрийн байдлаар:

 16 байршилд нийт 20.9 км шинэ зам

8 байршилд 32.6 км дугуйн зам,

2 байршилд 577 метр урт гүүр

12 байршилд 26736 м2 явган зам,

-Хотын гол болон туслах 176 гудамж замуудад 45 000 м2 нөхөөс, 32 гудамжинд 300 000 у/м, гэр хорооллын замын 120 000 м2 талбайг хусаж тэгшлэх, 20 000 м2 тэмдэглэгээ, гүүрэн гарцын 101 у/м хэв гажилтын заадас, 20 у/м гүүрийн төмөр бетон хайс засвар, 198 м ус зайлуулах шугамын ажил бүрэн дуусжээ.

Гэр хорооллын газрыг дахин төлөвлөн барилгажуулах төсөл нь газар, үл хөдлөх эд хөрөнгө өмчлөгч, эзэмшигч болон хувийн хэвшил, нийслэл гурван талаас зөвшилцөн, гэрээ байгуулж, нэг зорилгын дор нэгдэж чадсанаар хэрэгжих нөхцөл бүрддэг. Төсөл хэрэгжсэн нийт хугацаанд  2073 нэгж талбарын газрыг чөлөөлж 10740 айлын орон сууцыг ашиглалтад оруулсан байна. Харин өнгөрсөн нэг жилийн хугацаанд 174 нэгж талбарыг чөлөөлж, 453 айлын орон сууцыг ашиглалтад оруулжээ.

 “Өглөөний Улаанбаатар” төслийн хүрээнд “Цагийн хязгаартай автомашингүй гудамж” бий болгохыг зорьсон бөгөөд  Жуулчны гудамжинд байгуулсан нь залуучууд төдийгүй иргэдийн талархлыг хүлээгээд буй.

Дээрх гудамж ашиглалтад орсноор тус газар үйл ажиллагаа явуулдаг байгууллагууд 06:00-23:30 цагийн хооронд ажилладаг болж, үйлчлүүлэх хүний тоо, орлогын хэмжээ ч өссөн байна. Хотын дарга дүүрэг бүрд ийм жишиг гудамж байгуулахыг үүрэг болгосон.

Эх сурвалж: НЗДТГ-ын Хэвлэл мэдээлэлтэй харилцах хэлтэс

НОБГ: Үнс нурам ил задгай асгасан зөрчил их илэрч байна

Эх сурвалж: gogo.mn, 2022.01.27

Нийслэлийн Онцгой байдлын газраас гал түймэр, угаарын хийн хордлогоос урьдчилан сэргийлэх нэгдсэн арга хэмжээг есөн дүүрэгт зохион байгуулж байна.

Энэ нь угаарын хийн хордлогоос урьдчилан сэргийлэх, галлагаанаас үүдэлтэй болзошгүй гал түймрийн аюул, хүүхдийг болзошгүй аюул ослоос хамгаалах мэдээлэл, сурталчилгааг иргэдэд хүргэх зорилготой юм.

Хяналт, шалгалтаар

цахилгааны холболт, ашиглалт, угсралтын аюулгүй байдал алдагдсан,

гэр хооронд, бусад объект хоорондын аюулгүйн зай хэмжээ зөрчигдсөн,

үнс нурам ил задгай асгасан, үнсний сав таггүй, пийшин зуух гэмтэлтэй, яндангийн хамгаалалт хийгдээгүй, залгаас буруу,

бага насны хүүхдийг гэртээ цоожилж орхидог,

шуурхай албаны автомашин очих боломжгүй мухар гудамж, өндөрлөг газар, өндөр хүчдэлийн шугаман дор буусан зэрэг зөрчил илэрсэн айл өрхөд аюулгүй байдлыг хангах талаар зөвлөмж, анхааруулга өгч ажиллаж байна.

Нэгдсэн арга хэмжээг дүүргийн Засаг даргын Тамгын газар, Цагдаагийн газар, хэлтэс, хороодын Засаг дарга, түүний ажлын алба, “Таван толгой түлш” ХХК, “Улаанбаатар цахилгаан түгээх сүлжээ” ТӨХК-ийн инженер, техникийн ажилтан нар хамтран зохион байгуулж буй юм.

Байшин сууцны чанарыг сайжруулахад зориулсан зээл олгох, хүүг бууруулах цогц шийдлийг салбар яамд Засгийн газарт танилцуулна

Эх сурвалж: ikon.mn, 2022.01.26

Байгаль орчин, аялал жуулчлалын сайд Б.Бат-Эрдэнэ өнгөрсөн мягмар гарагт Барилга, хот байгуулалтын дэд сайд Э.Золбоо болон тус яамны Хот байгуулалт, газрын харилцааны бодлогын хэрэгжилтийг зохицуулах газрын дарга Л.Гүнболд нарыг хүлээн авч уулзжээ. Мөн уулзалтад Байгаль орчин, аялал жуулчлалын дэд сайд Г.Түвдэндорж, Орчин бохирдлыг бууруулах үндэсний хорооны ажлын албаны дарга Б.Алтанзул, БОАЖЯ-ны Хүрээлэн буй орчин, байгалийн нөөцийн удирдлагын газрын дарга Г.Энхмөнх нар оролцсон байна. 

Хоёр яамны удирдлагуудын уулзалтын зорилго нь агаар, орчны бохирдлыг бууруулах ажлын хүрээнд гэр хорооллын айл өрхүүдэд эдийн засагт дарамт үүсгэхгүйгээр инженерийн дэд бүтцийн асуудлыг шийдвэрлэх боломжийг судлах, хийж буй ажлуудаа танилцуулж харилцан санал солилцох байв. 

Уулзалтын эхэнд Байгаль орчин, аялал жуулчлалын сайд Б.Бат-Эрдэнэ хэлсэн үгэндээ “2021 байдлаар ипотекийн зээлд хамрагдсан өрхийн 30 хувь нь гэр хорооллоос орон сууцанд шилжсэн бол 70 хувь нь орон сууцнаас орон сууцанд шилжсэн байна. Гэр хорооллын иргэд орон сууцанд орох гэхэд урьдчилгаа төлбөр бүрдүүлэхэд хүндрэлтэй, өрхийн орлого банкны шалгуурт хүрдэггүй зэрэг олон шалтгаан байдаг. Иймд зээлийн хүртээмжийг нэмэгдүүлэх асуудлыг бодлогоор дэмжих шаардлагатай. Айл өрхүүдэд эдийн засгийн дарамт үүсгэлгүй амьдарч буй байшин сууцанд инженерийн дэд бүтцийг шийдэх, хийн болон бусад шинэ технологийг нэвтрүүлэх, олон улсын хөрөнгө оруулалт татаж төсөл хөтөлбөр хэрэгжүүлэх асуудлыг салбарын яамд хамтран эхлүүлэх нэн шаардлагатай байна” хэмээн онцоллоо. 

Мөн тэрбээр агаарын бохирдол, утааны асуудлаас гадна Улаанбаатар хотын хөрсний бохирдол аюул дагуулж байгааг дурдаад “Ногоон стандартын эрхзүйн орчныг бүрдүүлж, төрөөс татварын бодлогоо гаргаж олон улсын хөрөнгө оруулалтаар шийдвэрлэх боломжийг нээхэд салбарын яамд хамтран ажиллах нь зүйтэй. Иргэд өрхийн орлогоороо зээлээ төлөх боломжийг бүрдүүлж өгснөөр тулгамдаж буй асуудлуудыг шийдвэрлэхэд ихээхэн түлхэц болно” гэдгийг дахин тодотгов. 

"Гэр хорооллын 220 мянган өрхийн 1% нь бие даасан байдлаар цахилгаан, дулаан, бохирын дэд бүтцээ шийдсэн"

Энэ үеэр Барилга хот байгуулалтын яамнаас танилцуулга хийсэн юм. Танилцуулгад “Нийслэлийн гэр хороололд буй 220 мянган айл өрхийн нэг орчим хувь нь өөрсдөө бие даасан байдлаар цахилгаан, дулаан, бохирын дэд бүтцээ шийдсэн байдаг. Харин төрөөс бодлогоор гэр хорооллыг дахин төлөвлөх хүрээнд 25 байршилд 74 хэсэгчилсэн талбайд орон сууцжуулах төсөл хэрэгжүүлэх, эдгээрийн инженерийн шугам сүлжээг шийдвэрлэх үүрэг хүлээсэн. Энэ хүрээнд жишээлбэл, Чингэлтэй дүүргийн VII хороонд дулаан, цахилгааны асуудлыг шийдвэрлэх Дэд төв байгуулж гэр хорооллын айл өрхийг дэд бүтцээр хангах төслийг хэрэгжүүлж байгаа” тухайг дурдсан юм. 

Танилцуулгатай холбогдуулан хоёр яамны удирдлагууд гэр хорооллуудыг бүхэлд нь нэг дор төвийн шугамд холбох боломжгүй. Иймд Дэд төвүүдийг байгуулах ажлыг эрчимжүүлэх, захын хорооллуудын дэд бүтцийг сэргээгдэх эрчим хүч ашиглан шийдвэрлэх зэрэг асуудлаар санал солилцлоо.

Улмаар “Гэр хорооллын нийт айл өрхийн 100 мянга орчим нь монгол гэрт, үлдсэн 110 мянга гаруй нь байшин сууцанд амьдарч байна. Байшин сууцны чанарыг сайжруулж, дулаан алдалтгүй болгож стандартад нийцүүлэн барих, “С” ангиллаас дээш амины орон сууц барихад хөнгөлөлттэй зээл олгох, ногоон технологийг дэмжих, зээлийн хүүг бууруулах зэрэг цогц шийдлийг салбар яамд нэгдсэн бодлогоор гаргаж Засгийн газарт танилцуулан шийдвэрлэх нь зүйтэй” гэдэг дээр санал нэгдэв.  

Уулзалтын төгсгөлд Байгаль орчин, аялал жуулчлалын сайд Б.Бат-Эрдэнэ “Төсөв хүрэлцээгүй, газрын асуудал маргаантай гэх мэт шалтаг тоочоод хойш суугаад байвал хэзээ ч урагшлахгүй. Тиймээс олон улсын туршлага, дотоод бололцоондоо тулгуурлан шийдэл гаргаж бодит ажилд хамтран ажиллахыг чухалчилж байгаа” гэдгийг онцлон хэлээд жишээ болгож ӨМӨЗО-ны Ордос хотыг богино хугацаанд барьж, хүн амын төвлөрлийг сааруулах хүрээнд нүүлгэн шилжүүлэлтийг амжилттай зохион байгуулж байсан туршлагыг дурдсан  байна.

Улаанбаатарын инфляцын 82%-ийг бүрдүүлсэн 5 бараа

Эх сурвалж: ikon.mn, 2022.01.26

2021 оны эцэст дотоодын инфляц улсын хэмжээнд 13.4%, нийслэлд 14.8% хүрсэн талаар Үндэсний статистикийн хороо мэдээлсэн.

Улаанбаатарын инфляцын дийлэнх хэсэг буюу 82% нь дараах 5 төрлийн бараа бүтээгдэхүүний үнийн өсөлтийн нөлөөгөөр тайлбарлагдаж байна. Тухайлбал:

Хүнсний бүтээгдэхүүн (махнаас бусад)-ий үнийн өсөлт УБ-ын 14.8% инфляцын 4 орчим нэгж хувь буюу ⅓-ийг  дангаараа тайлбарлаж байна;

Mахны үнийн өсөлт инфляцын бүрэлдэхүүнд 2.4 нэгж хувь,

Шатахууны үнийн өсөлт инфляцын бүрэлдэхүүнд 2.19 нэгж хувь,

Импортын барааны үнийн өсөлт инфляцын 1.89 нэгж хувь

Хатуу түлш 1.65 нэгж хувийн нөлөөг тус тус үзүүлсэн байна.

Харин хэрэглээний сагсанд багтдаг бусад 300 гаруй төрлийн бараа үйлчилгээний үнийн өсөлт нийлбэр дүнгээрээ 14.8% инфляцын 2.7 нэгж хувь буюу ердөө ⅕-ийг л бүрдүүлжээ.

Цар тахлын үед дэлхийн олон улс оронд инфляц сүүлийн 10-40 жилийн дээд түвшинд хүрсэн бөгөөд, үнийн өсөлтийн шалтгаан нь хоорондоо төстэй байна:

Шатахууны үнэ: Цар тахлын эхэнд $40-оос бага байсан нефтийн үнэ олон улсын зах зээл дээр $90/баррель дөхсөнөөр шатахууны жижиглэнгийн үнэ АНУ, Евро бүсийн орнууд, Япон, БНСУ-д хурдтай өсөөд буй.

Хүнсний үнэ: НҮБ-ын Хүнс, хөдөө аж ахуйн байгууллагын мэдээлснээр дэлхийн хүнсний үнийн индекс жилийн дүнгээр 25% өсжээ. Энэ нь дэлхий даяар мах, үр тариа, тос, сүүн бүтээгдэхүүн зэрэг өргөн хэрэглээний хүнсний үнэ хурдтай өссөнийг илэрхийлж байна. 

Импортын барааны үнэ: Ачаа тээврийн гол портууд дээрх гацаа, түгжрэл, тээвэр ложистикийн саатал нь олон улсын худалдаанд сөргөөр нөлөөлж, нийлүүлэлт саатсанаар эцсийн хэрэглэгчид хүрэх импортын барааны үнийг хурдтай өсгөжээ.

Дэлхий даяар инфляц хурдтай нэмэгдэж, төв банкуудын зорилтот түвшнээс даваад буй ч үнийн өсөлтийн гол шалтгаан болох нефтийн нийлүүлэлт, хүнсний бүтээгдэхүүний үйлдвэрлэл болон тээвэр ложистикийн асуудлыг мөнгөний бодлогоор шийдвэрлэх аргагүй байгаа юм.

Олон нийтийн цагдаа ажиллуулах тогтоолыг батлав

Эх сурвалж: ikon.mn, 2022.01.26

Нийслэлийн ИТХ-ын нэгдсэн хуралдаанаар олон нийтийн цагдааг ажиллуулах тухай тогтоолын төслийг хэлэлцлээ.

Өмнөх онд нийслэлийн хэмжээнд олон нийтийн цагдаагийн орон тоог 224 байхаар баталсан юм. Улмаар 205 олон нийтийн цагдааг гэмт хэрэг зөрчлөөс урьдчилан сэргийлэх, таслан зогсоох, илрүүлэх чиглэлээр ажиллуулсан байна. Ингэснээр өнгөрсөн онд олон нийтийн газарт үйлдэгдэх гэмт хэрэг 7.7 хувь, согтуугаар үйлдэгдэх гэмт хэрэг 7.3 хувиар буурч, гудамж талбайд үйлдэгдэх зөрчлийн илрүүлэлт 46.9 хувиар өссөн эерэг үр дүн гарчээ.

Тэгвэл энэ онд Нийслэлийн Цагдаагийн удирдах газрын харьяанд 227, тээврийн цагдаагийн албаны харьяанд 82, нийт 309 олон нийтийн цагдааг ажиллуулах санал ирүүлснийг хэлэлцлээ. Олон нийтийн цагдаа нарт төрийн тусгай алба хаагчдын цалингийн сүлжээний 1 дүгээр шатлалтай дүйцүүлэн урамшуулал олгоно. Урамшуулал болон холбогдох бусад зардлыг Нийслэлийн гэмт хэргээс урьдчилан сэргийлэх ажлын зохицуулах салбар зөвлөлөөс гаргах юм. 

Олон нийтийн цагдааг ажиллуулах хууль зүйн үндэслэл нь Цагдаагийн албаны тухай хууль, Замын хөдөлгөөний аюулгүй байдлын тухай хууль, Гэмт хэргээс урьдчилан сэргийлэх тухай хуулиудын холбогдох заалтуудад тусгагдсан байдаг аж. Энэ нь цагдаагийн байгууллага орон тоогоо нэмж байгаа гэхээс илүү иргэдийн оролцоон дээр тулгуурлаж, гэмт хэрэг зөрчлөөс урьдчилан сэргийлэх арга хэмжээг хэрэгжүүлж байна гэдгийг Нийслэлийн ИТХ-ын дарга Ж.Батбаясгалан хэлэлцүүлгийн үеэр тодотголоо. 

Олон нийтийн цагдаа нар цагдаагийн үндсэн чиг үүргийг шууд хэрэгжүүлэхгүй бөгөөд гэмт хэргээс урьдчилан сэргийлэх чиглэлээр олон нийтийн санаа бодлыг авах, үйл ажиллагаандаа тусгах, цагдаагийн байгууллага гэмт хэргээс урьдчилан сэргийлэх чиглэлээр хэрэгжүүлж буй арга хэмжээг олон нийтэд хүргэх чиглэлд ажиллана гэдгийг Нийслэлийн Цагдаагийн удирдах газрын дарга, хурандаа Р.Отгонжаргал нэмж хэллээ. 

Улмаар төлөөлөгчдийн олонх нь Олон нийтийн цагдааг ажиллуулах тогтоолын төслийг дэмжсэн бөгөөд, орон тоог боломжит хэмжээнд нэмэгдүүлэх саналыг гаргасан юм.  Нийслийн ИТХ-ын XIII хуралдаан үргэлжилж байна. 

Мөн “Нийслэлийн тэргүүний тариаланч”-аар шалгаруулан шагнах тухай тогтоолын төслийг хэлэлцлээ. Хөдөө аж ахуйн салбарт олон жил үр бүтээлтэй ажиллаж, амжилт гаргасан СХД-ийн 21 дүгээр хорооны иргэн, тариаланч Д.Дамдинсүрэн, Хан-Уул дүүргийн 13 дугаар хорооны иргэн, тариаланч М.Амаржаргал нарт дээрх шагнал олгох танилцуулгыг Нийслэлийн Засаг даргын 1 дүгээр орлогч Ж.Сандагсүрэн хийж, төлөөлөгчид дэмжлээ.

ОХУ-аас БНХАУ руу Монголоор дамжуулан байгалийн хийн хоолой барих төслийн ТЭЗҮ-ийг эцэслэсэнд тооцлоо

Эх сурвалж: ikon.mn, 2022.01.25

Монгол Улсын Шадар сайд С.Амарсайхан ОХУ-ын “Газпром” НХН-ийн Удирдах зөвлөлийн дарга А.Б.Миллертэй өнөөдөр цахим уулзалт хийж, ОХУ-аас БНХАУ руу Монгол Улсын нутаг дэвсгэрээр дамжуулан байгалийн хийн хоолой барих төслийн техник, эдийн засгийн үндэслэлийг эцэслэсэн тухай тэмдэглэлд өнөөдөр гарын үсэг зурлаа.

Протоколд нэгдүгээрт, Хөрөнгө оруулалтын өмнөх судалгаа болох “Монгол Улсын нутаг дэвсгэрээр ОХУ-аас БНХА руу байгалийн хий дамжуулах хоолой барих, ашиглах төслийн Техник, эдийн засгийн үндэслэл”-ийн үр дүнг батлах, хоёрдугаарт, "Зураг төсөл"-ийн үе шатанд шилжих, зураг төсөл, хайгуул судалгааны ажлуудыг гүйцэтгэх талаар тусгажээ.

Хамтарсан Ажлын хэсгийн Монголын талын ахлагчийн хувьд Шадар сайд С.Амарсайхан уулзалтыг нээж хэлсэн үгэндээ "Гурван улсыг дамнасан, дэд бүтцийн энэхүү мега төслийн ТЭЗҮ-ийг хугацаанаас нь өмнө амжилттай боловсруулж дуусгасанд баяртай байна.

Монгол Улсын нутаг дэвсгэрээр дамжуулан ОХУ-аас БНХАУ руу байгалийн хий нийлүүлэх хоолой барих төслийн “Техник, эдийн засгийн үндэслэл”-ийг боловсруулах ажлыг хийж гүйцэтгэсэн “Газпром” НХН-ийн хамт олонд Монгол Улсын Засгийн газрын нэрийн өмнөөс болон хувиасаа талархал илэрхийлье.

Байгалийн хийн хоолойн төсөл цар тахлын хүнд хэцүү нөхцөл байдлаас үл хамааран Хамтран баталсан төлөвлөгөөний дагуу амжилттай хэрэгжиж байна.

Энэхүү төслийг эрчимжүүлэх зорилгоор “Газпром” НХН-ийн Удирдах зөвлөлийн орлогч дарга В.А.Маркелов тэргүүтэй төлөөлөгчид 2021 оны 3 болон 10 дугаар сард Монгол Улсад хоёр удаа ажлын айлчлал хийж, уг уулзалтуудын үеэр талуудын ярилцаж тохиролцсон асуудлууд бүрэн шийдвэрлэгдэж, дараа дараагийн ажлуудыг хэрэгжүүлж эхлээд байна" хэмээн онцолсон юм.

Энэхүү төсөл нь техникийн хувьд хэрэгжих бүрэн боломжтой бөгөөд эдийн засгийн хувьд үр өгөөжтэй гэдэг нь ТЭЗҮ-ээр тодорхой болсон учраас 2022, 2023 онд талууд хамтран инженерийн нарийвчилсан судалгаанууд болон байгалийн хийн хоолойн барилга байгууламжуудын зураг төслийн ажлуудыг хийж гүйцэтгэхээр төлөвлөөд байна. Монголын хэсэг дээрх хий дамжуулах хоолойн нийт урт нь 960 км бөгөөд жилд 50 тэрбум шоо метр хийг тээвэрлэх юм.

ОХУ, БНХАУ болон Монгол Улсын төрийн дээд түвшний уулзалтуудын үеэр байгалийн хий дамжуулах хоолойн төслийн асуудал тогтмол яригдаж, хамтын ажиллагаагаа идэвхжүүлэх, төслийн хэрэгжилтийг эрчимжүүлэх асуудлыг дэмжин ажиллахаа гурван улсын төр, засгийн өндөр албан тушаалтнууд удаа дараа мэдэгдэж ирсэн нь төслийг цаашид үр дүнтэй хэрэгжүүлэх гол үндэс гэдгийг талууд энэ үеэр онцлон тэмдэглэж байлаа.

Энэхүү байгалийн хийн хоолойн төсөл нь манай хоёр орны хооронд хөгжүүлж буй “Иж бүрэн стратегийн түншлэл”-ийг баяжуулан өргөжүүлэхэд чухал ач холбогдолтой төсөл бөгөөд талуудын хүчин чармайлтын дүнд амжилттай хэрэгжиж, манай хоёр улсын хувьд харилцан ашигтай, тогтвортой хөгжилд жинтэй хувь нэмэр оруулах том бүтээн байгуулалт болно гэж Монголын тал итгэл дүүрэн байгаагаа Шадар сайд С.Амарсайхан илэрхийлээд, Монгол Улсын Засгийн газар үүнд өндөр ач холбогдол өгч, өмнөө тавьсан зорилтуудыг богино хугацаанд биелүүлэхийн төлөө бүх талын дэмжлэгийг үзүүлэн ажиллах болно хэмээн хэллээ.

 

Эх сурвалж: Шадар сайдын ажлын алба

Натур худалдааны төвөөс урагшаа Нарны замыг холбосон туслах замыг өнөөдөр 22:00 цаг хүртэл хаана

Эх сурвалж: ikon.mn, 2022.01.25

Баянзүрх дүүргийн нутаг дэвсгэр Натур худалдааны төвөөс урагшаа Нарны замыг холбосон туслах замын дунд хэсэгт дулааны шугамд гэмтэл гарчээ.

Уг засварын ажил хийгдэж байгаатай холбоотой зорчих хэсгийн хөдөлгөөнийг түр хаагаад байна.

Засварын ажлыг өнөөдөр 09:00-22:00 цагийн хооронд хийхээр төлөвлөжээ.

Эх сурвалж: ТЦА

"УБДС" компани, IV цахилгаан станц, ТОСК-ын 20 албан тушаалтанд хариуцлага тооцуулахаар болжээ

Эх сурвалж: ikon.mn, 2022.01.24

Авлигатай тэмцэх газрын Хяналт шалгалт, дүн шинжилгээний хэлтэс нь 2022 оны нэгдүгээр сарын 17-21-ний өдрүүдэд нийтийн албанд томилогдохоор нэр дэвшсэн 361 иргэний хувийн ашиг сонирхлын урьдчилсан мэдүүлгийг шалган, 120 мэдүүлгийг хянан шийдвэрлэлээ. Одоогоор ажиллагаанд 241 нэр дэвшигчийн урьдчилсан мэдүүлэг хянагдаж байгаа аж. 

Өнгөрсөн долоо хоногт иргэн, аж ахуйн нэгж, байгууллагаас ирүүлсэн нийтийн албан тушаалтны авлига, ашиг сонирхлын зөрчилтэй холбоотой 43 гомдол, мэдээллийг хүлээн авч шалгаснаас 8 гомдол, мэдээллийг хянан шийдвэрлэжээ. 

Төлөвлөгөөт хяналт шалгалтын хүрээнд 19 албан тушаалтны хувийн ашиг сонирхлын болон хөрөнгө, орлогын мэдүүлгийг шалгаж, таван мэдүүлгийг хянан шийдвэрлэжээ. Одоогоор 14 албан тушаалтны хөрөнгө, орлогын болон хувийн ашиг сонирхлын мэдүүлгийг шалгаж байна. 

"Улаанбаатар дулааны сүлжээ" ТӨХК, "Дулааны 4 дүгээр станц" ТӨХК, "Төрийн орон сууцны корпораци" ТӨҮГ-ын нийт 20 зөрчилтэй албан тушаалтанд Авлигын эсрэг хуулийн 13.8.2, 13.8.3-т заасныг үндэслэн хариуцлага тооцуулахаар албан бичиг хүргүүлжээ. 

Монгол Улсад бий болсон коронавирус /омикрон хувилбар/-ийн цар тахлын үеийн нөхцөл байдалтай зохицуулан албан тушаалтнаас 2021 оны ХАСХОМ-ийг шинэчлэн гаргуулах үйл ажиллагааг эрчимжүүлэх чиглэлээр тус газраас уг мэдүүлгийг бүртгэх, хянах, хадгалах эрх бүхий  албан тушаалтнууд болон мэдүүлэг гаргагч нарт  онлайн сургалтыг тухай бүр зохион байгуулж, холбогдох албан тушаалтнуудад нэгдсэн заавар зөвлөмж өгч, арга зүйн удирдлагаар ханган ажиллаж байна.

ХАСХОМ-ийг шинэчлэн гаргаж бүртгүүлэх үйл ажиллагаа улсын хэмжээнд үргэлжилж байгаа бөгөөд уг ажлын явц 40 гаруй хувьтай байна хэмээн АТГ-аас мэдээллээ. 

ААН-үүд ойр орчмынхоо 50 метр талбайн цас, мөсийг цэвэрлээгүйгээс халтирч унаж бэртсэн иргэн хохирлоо нэхэмжлэх эрхтэй

Эх сурвалж: ikon.mn, 2022.01.24

Ойрын өдрүүдэд цас хялмаалж, халтиргаа гулгаа ихсэж байгаа тул иргэд, ААН-үүдэд дараах сэрэмжлүүлгийг нийслэлийн Онцгой байдлын газраас өглөө.

Халтиргаанаас хамгаалсан ултай өвлийн гутал өмсөх

Жолооч, явган зорчигчид замын хөдөлгөөнд оролцохдоо замын хөдөлгөөний аюулгүй байдлыг хангах

Албан байгууллага:

Ойр орчмынхоо 50 метр талбайн цас мөсийг цэвэрлэх /Хэрэв тухайн талбайд халтирч унаснаас бэртсэн бол иргэн хохирлоо нэхэмжлэх эрхтэй/

2009 онд батлагдсан Хог хаягдлын тухай хууль, Захиргааны хариуцлагын тухай хуулийн 38.2-т “...гаднах орчныхоо халтиргаа гулгаатай талбайг цэвэрлээгүйн улмаас иргэд бэртэж гэмтвэл эмнэлэг, эмчилгээний зардлыг тухайн байгууллага хариуцна” хэмээн заажээ.

Айл өрх:

Ойр орчмынхоо цас, мөсийг цэвэрлэж, аюулгүй орчинг бүрдүүлэх

Гэр хорооллын айл өрхүүд муу ус, угаадас, үнсээ ил задгай хаяхгүй байхыг санууллаа.

Шөнийн 02:00 цагаас хойш 136 тонн давс, бодисыг зам талбайд цацсан байна

Эх сурвалж: ikon.mn, 2022.01.24

Энэ сарын 23-ны өдөр буюу өчигдрөөс хойш орсон цаснаас үүдэлтэй халтиргаа гулгааг арилгах, шаардлагатай бодисыг цацаж, иргэдийн аюулгүй зорчих нөхцөлийг бүрдүүлэхээр Хот тохижилтын газар ОНӨААТҮГ байнгын бэлэн байдалд ажиллаж байна.

Тухайлбал, өнгөрсөн шөнийн байдлаар Хот тохижилтын газрын 35 ажилтан, албан хаагч зам талбайн цэвэрлэгээний шөнийн ээлжид гарч, 14 шүүртэй цэвэрлэгч машин, бодис цацагч есөн машин, тэвштэй дөрвөн машинаар зам талбайн цасыг цэвэрлэн, бодис цацаж ажиллажээ. Ингэхдээ  шөнийн 02:00 цагаас хойш нийт 136 тонн бодисыг 01:30 цагийн давтамжтайгаар зам талбайд цацсан байна.

Өнөөдөр 06:00 цагаас хойш буюу өглөөний ээлжид 22 бригадын 270 орчим зам талбайн үйлчлэгч ажилдаа гарчээ.

Мөн 16 бичил техник, таван шүүртэй машин, найман хог тээврийн машинаар зам талбайн цэвэрлэгээг хийж байгаа юм.

Одоогийн байдлаар халтиргаа, гулгаатай холбоотой дуудлага мэдээлэл ирээгүй

Шөнийн ээлжийн ажилчдын цацсан давс, бодисын хайлалт сайн явагдаж байгаа бөгөөд одоогийн байдлаар халтиргаа, гулгаатай холбоотой дуудлага мэдээлэл ирээгүй байна. Түүнчлэн зам талбайн үйлчлэгч нар халтиргаа, гулгаа үүсэх эрсдэлтэй гүүр, туннель, нүхэн гарц, өгсүүр болон уулын замыг анхааралдаа авч, шаардлагатай арга хэмжээг авч ажиллаж байна.

Өнөөдрийн байдлаар нийт 1,395.5 тонн давс, бодисын нөөц байгаа бөгөөд олон жилийн дунджаар энэ өвөл болон хавар хангалттай хүрэлцэхүйц нөөцийн үлдэгдэлтэй байгаа гэдгийг Хот тохижилтын газраас мэдээлэв. Мөн нөөцийг нэмэгдүүлэхээр татан авалтыг үргэлжлүүлж байгаа гэдгийг онцолсон юм.

Хот тохижилтын газар ОНӨААТҮГ нь Цаг уур, орчны шинжилгээний газартай байнгын хамтын ажиллагаатай байдаг бөгөөд цаг уурын албан мэдээлэл дээр үндэслэн, ажлаа урьдчилан төлөвлөж, нийслэлийн иргэдийг халтиргаа гулгаанаас урьдчилан сэргийлж, аюулгүй зорчих нөхцөлийг бүрдүүлэхээр зорин ажиллаж байна хэмээн НЗДТГ-ЫН ХЭВЛЭЛ МЭДЭЭЛЭЛТЭЙ ХАРИЛЦАХ ХЭЛТЭС-ээс мэдээлэв.

Одоогоор нийслэлийн хэмжээнд малын өвчин бүртгэгдээгүй

Эх сурвалж: ikon.mn, 2022.01.24

Нийслэлийн удирдах ажилтнуудын шуурхай зөвлөгөөн өнөөдөр болж, Нийслэлийн Засаг дарга бөгөөд Улаанбаатар хотын Захирагч Д.Сумъяабазар удирдан явууллаа.

Өнгөрсөн 14 хоногт нийслэлийн Засаг даргаас өгсөн үүрэг даалгавар 94 хувьтай биелжээ. 2021 онд нийслэлийн хэмжээнд өрнөсөн бүтээн байгуулалтын ажлыг нийслэлийн өмчид бүртгэх, энэ онд хийж хэрэгжүүлэх ажлыг эрэмбэлэх зэрэг ажлуудыг хийж гүйцэтгэсэн байна.

Улсын хэмжээнд малын өвчлөл буурахгүй байгааг Нийслэлийн Онцгой байдлын газрын дарга А.Дашням анхаарууллаа.

Одоогоор нийт 17 аймгийн 106 суманд шүлхий, нэг аймгийн нэг суманд боом, нэг аймгийн гурван суманд арьс товруутах өвчин бүртгэгдээд байгаа аж. Харин нийслэлийн хэмжээнд малын өвчин бүртгэгдээгүй байна.

Мөн тэрбээр “Өнгөрч буй 14 хоногийн хугацаанд гал түймрийн утаажилтын бүсээс 45 иргэнийг гаргаж, аюулт үзэгдэл ослоос зургаан иргэнийг аварч, 2.9 тэрбум төгрөгийн өмч хөрөнгийг хамгаалж ажилласан. 2022 он гарснаас хойш өнөөдрийг хүртэлх хугацаанд  нийслэлийн хэмжээнд объектын гал түймэр 227, аврах ажиллагааны 15, нийт 242 удаагийн дуудлагын дагуу ажилласан нь өнгөрсөн оны мөн үетэй харьцуулахад 16.9 хувиар өссөн үзүүлэлттэй байна" гэв. 

Түүнчлэн нийслэлийн хэмжээнд анхаарал татсан бас нэг асуудал нь ус мөсний халиа дош үүсэж, голын эрэг дагуу аж төрж буй айл өрхүүдэд хүндрэл учирч эхэлжээ.

Нийслэлийн Баянзүрх, Сүхбаатар, Сонгинохайрхан, Чингэлтэй дүүргүүдийн нийт 19 хорооны нутаг дэвсгэрт халиа дош үүсэж, нийслэлийн Геодези усны барилга байгууламжийн газар болон  дүүргүүдийн  Онцгой байдлын хэлтэс, Тохижилт үйлчилгээний хэлтсийнхэн халиа дошоог арилгах ажлыг зохион байгуулсан байна. 

Өнгөрсөн амралтын өдрүүдэд л гэхэд 31 ажилтан албан хаагч, дөрвөн техник хэрэгсэлтэйгээр ажиллаж 120 метр далан байгуулан, 220 метр суваг татаж урсцыг чөлөөлж иргэд,ААН байгууллагын эд хөрөнгийг авран хамгаалсан аж. 

 

Эх сурвалж: НЗДТГ-ын хэвлэл мэдээлэлтэй харилцах хэлтэс 

Халиа үүсэж, айлуудын хашаа руу ус орсон хэсэгт шуудуу татаж, 184 тонн мөсийг зөөвөрлөжээ

Эх сурвалж: ikon.mn, 2022.01.24

Сонгинохайрхан дүүргийн 26 дугаар хорооны Мандал-Овоо 31-р гудамжны Их нарантай холбогдсон авто замын гүүрний ар, урд хэсэгт хөрсний ус ихээр гарч ойр орчмын өрхүүдийн хашаа руу ус орох зэрэг хүндрэлтэй асуудлууд үүсжээ.

Иймд Сонгинохайрхан дүүргийн ЗДТГ болон Геодез усны барилга байгууламжийн газар ОНӨААТҮГ, дүүргийн Онцгой байдлын хэлтсийн албан хаагчид хамтран тус хэсэгт энэ сарын 21-23-ны өдрүүдэд ажилласан байна.

Албан хаагчид тус гүүрний усыг чөлөөтэй урсгах зорилгоор гүүрний хойд талд 1.5 километр, урд талд 2 километр орчим шуудуу татаж, 184 тонн мөсийг зориулалтын техникээр зөөвөрлөжээ.

Мөн усны урсцыг сайжруулах зорилгоор гүүрний хойд хэсэгт тогтсон усанд давс, мөс хайлуулах бодис зэргийг хийсэн байна.

Хөрсний ус ихээр гарч халиа дошин үүсэх нь байгалийн хүчин зүйлээс шууд хамааралтай тул нөхцөл байдал дахин хүндэрсэн тохиолдолд тус ажлын хэсгийнхэн үргэлжлүүлэн ажиллана гэж Сонгинохайрхан дүүргийн ЗДТГ-аас мэдээллээ.

Нийслэл рүү 15 машинаар 551 шуудай нүүрс оруулахаар завдсаныг илрүүлжээ

Эх сурвалж: ikon.mn, 2022.01.24

"Таван толгой түлш" компани өдөр тутамд 3,500 орчим тонн сайжруулсан түлшийг 615 цэгт түгээн борлуулж байгааг Нийслэлийн удирдах ажилтнуудын шуурхай зөвлөгөөний үеэр "Таван толгой түлш" ХХК-ийн Хэрэглэгчдэд үйлчлэх албаны дарга Ч.Буянжаргал танилцууллаа. 

“Тус компани хэрэглэгчдээс ирсэн 5,100 тонн түлшний захиалгыг бүрэн нийлүүлсэн. Одоогийн байдлаар манай компанийн 16 шугам хэвийн ажиллаж, нийлүүлэлт хийж, 19,500 тонн түлшний нөөцтэй байна” гэлээ.

Түүнчлэн өнгөрсөн хоёр долоо хоногт 15 машинаар 551 шуудай нүүрс оруулж ирэхийг завдсан үйлдэл гарсан байна. Түүхий нүүрсийг нийслэл хотод оруулж ирэхээр завдаж буй тохиолдол гарсаар байгааг шалгаж, тодруулах үүргийг Хотын даргын зүгээс холбогдох албаныханд өгчээ.

"Далан давхар"-ын оршуулгын газрыг хэсэгчлэн чөлөөлнө

Эх сурвалж: ikon.mn, 2022.01.24

Нийслэлийн иргэдийн өмнө тулгамдаж байгаа нэн чухал асуудлын нэг нь Самбалхүндэв буюу Далан давхарын оршуулгын газар байсаар ирсэн.

Тус оршуулгын газар нь 1930-аад оны үед байгуулагдаж, 1987 онд Ардын депутатын хурлын тогтоолоор хаагдсан ч иргэд 2000 оны эхэн үеийг хүртэл оршуулга хийсээр ирсэн байна. Нийт 73,9 га талбайг эзэлдэг бөгөөд Чингэлтэй дүүргийн дөрвөн хорооны нутаг дэвсгэрийг дамнан оршдог.

Монгол Улсын Улсын Их хурлын 2013 оны 23 дугаар тогтоолоор батлагдсан “Улаанбаатар хотын 2020 он хүртэл хөгжүүлэх ерөнхий төлөвлөгөө, 2030 он хүртэлх хөгжлийн чиг хандлага батлах тухай” бодлогын баримт бичигт тус оршуулгын газарт Дурсгалын цэцэрлэгт хүрээлэн байгуулахаар тусгагдсан хэдий ч хэрэгжээгүй өнөөг хүрсэн.  

Тэгвэл иргэдийн дунд удтал хүлээлт үүсгээд байсан Далан давхарын оршуулгын газрын асуудал бодитой ажил хэрэг болох нь.

НИТХ-ын Тэргүүлэгчдийн 2021 оны 11-р сарын 06-ны өдрийн хуралдаанаар Далан давхарын оршуулгын газарт Хүндэтгэлийн цэцэрлэгт хүрээлэн байгуулах асуудлыг хэлэлцэж 109 дүгээр тогтоол гарч, төсөл хэрэгжих талбайн солбицлын цэгийг баталсан байна. Мөн Нийслэлийн Засаг даргын 2021 оны А/733 дугаар захирамжаар уг төслийг хувийн хэвшилтэй хамтран хэрэгжүүлэх ажлыг зохион байгуулж, нэгдсэн удирдлагаар хангаж ажиллахыг Улаанбаатар хотын Захирагчийн ажлын албанд үүрэг болгожээ.

Энэхүү хүндэтгэлийн цэцэрлэгт хүрээлэн байгуулах төсөл 10 га талбайд хэрэгжих бөгөөд төсөл хэрэгжих талбайн байршлыг танилцуулж байна.

Төслийн хүрээнд шарил нүүлгэн шилжүүлэх, чандарлах ажлыг 2022 оны 4 сард эхлүүлэхээр төлөвлөж байгаатай тул тухайн байршилд талийгаач нь байгаа иргэд 2022 оны 1 сарын 1-ний өдрөөс эхлэн бүртгэл, мэдээллийн ажилтантай холбогдож дэлгэрэнгүй мэдээллийг:

Баянзүрх дүүрэг, Дүнжингарав худалдааны төвд байрлах Нийслэлийн үйлчилгээний нэгдсэн төвийн Улаанбаатар хотын захирагчийн ажлын албаны таниулах хэсэг;

“Улаанбаатар буян” ХХК-ийн төв байр;

Цахим мэдээллийн сан бүхий www.sambalkhundev.mn вэб сайт;

72100101 дугаараас;

авах боломжтой юм байна.

Гандан

Эх сурвалж Mongol TV, 2022.01.23

    

Иргэдийн эзэнгүй нохойд уруулсан гэх гомдол нэмэгдсэн тул устгал хийж байна

 Эх сурвалж: gogo.mn, 2022.01.22

Нийслэлийн Баянзүрх дүүргийн хэмжээнд 2021 онд 20 мянга гаруй эзэнгүй муур, нохой устгалд оруулжээ.

Харин энэ жил эзэнгүй ноход, муурын тоо 35-36 мянгад хүрсэн бөгөөд иргэдээс эзэнгүй нохойд хазуулж, уруулсан гэх гомдол мэргэжлийн байгууллагад ирэх нь нэмэгдсэн.

Тиймээс нэгдүгээр сарын 21,22-ны өдрүүдэд 14 хүний бүрэлдэхүүнтэй, есөн техник хэрэгсэлтэйгээр нохой, муур устгалын ажлыг эхлүүллээ. Дээрх хугацаанд гэрийн тэжээвэр муур, нохойгоо иргэд уяж гадагш гаргахгүй байх талаар мэдээлэл хүргүүлсэн.

Мэргэжлийн байгууллагын хэлж буйгаар эзэнгүй нохой, муурын тоо өсөж буй шалтгаан нь гэр хорооллын айлууд тэжээвэр амьтныхаа үржлийг хянадаггүйтэй холбоотой байна гэж Баянзүрх дүүргээс мэдээллээ.

МУИС-ийн IV байрны баруун талын 140 метр авто замыг өнөөдөр 22:00 цаг хүртэл хаана

Эх сурвалж: ikon.mn, 2022.01.21

Сүхбаатар дүүргийн 8 дугаар хорооны нутаг Н.Содномын гудамжинд авто замын зорчих хэсгийн дор байрлах 53, 54 дүгээр байрны гадна халаалтын шугамд гэмтэл гарчээ.

Тиймээс Улаанбаатар хотын захирагчийн ажлын албаны өгсөн зөвшөөрлийн дагуу гарсан гэмтлийг МУИС-ийн дөрөвдүгээр байрны баруун талын 140 метр авто замыг хааж, 2022 оны нэгдүгээр сарын 21-ний өдрийн 09:00-22:00 цагийн хооронд засварлах ажлыг хийхээр болсон байна.

Иймд жолооч нарыг бусад замыг сонгон хөдөлгөөнд оролцохыг Тээврийн цагдаагийн албанаас зөвлөлөө.

Монгол хүнс, барааны үзэсгэлэн худалдаа зохион байгуулж байна

Эх сурвалж: ikon.mn, 2022.01.21

Хүнс, хөдөө аж ахуй, хөнгөн үйлдвэрийн яам, Улаанбаатар хотын Захирагчийн ажлын алба хамтран зохион байгуулж байгаа энэхүү арга хэмжээг халдвар, хамгааллын дэглэмд нийцүүлэн задгай талбайд зохион байгуулж байна.  Жижиг, дунд үйлдвэрлэл эрхлэгчид бараа бүтээгдэхүүнээ борлуулахад нь дэмжлэг үзүүлж 10 өдрийн турш түрээсийн төлбөргүй худалдаа эрхлэх боломжийг олгож байгаад талархалтай байгаагаа илэрхийлсэн юм.  

Нийслэлчүүд та бүхэн Төв цэнгэлдэх хүрээлэнг зорьж, хэрэгцээт хүнсний болон бусад төрлийн бараа бүтээгдэхүүнээ худалдан авахыг урьж байна. 

 

Эх сурвалж: ХХААХҮЯ